|
谢纬tī1916年(日本时代)出世，tī台湾读公学校、中学以及神学院。1938年去日本读医学，1945年kap杨琼英医师结婚，1946年回台。1951年去美国进修三年，1955年开始他tī台湾ê医疗宣教事工，直到1970年6月17日受主拣召。
|
|
Beh 按怎办理谢纬 ê 告别式，真 chē单位 lóng 极力 teh 争取， sio-chiⁿ 真久。为 tio̍h 和平解决 chit 层代志，最后由谢纬胞弟谢纶出面协调，以「体会故人生前做人心意」― 处理代志以「圆满」为原则，来让步 hō͘ 总会。 Tùi 按呢以「总会葬」仪式来送别谢纬。
|
|
1970年6月17日下晡1点55分，谢纬开车经过名间乡，急 beh 往二林为患者开刀，意外车祸身亡。他 ê 牵手杨琼英 tī 车祸现场 the̍h 手巾 á 出来， chhit 谢纬 ê 面，家己 mā 目屎流、目屎滴，一面哭、一面吐大气，讲：「Ah……你……真可怜，真可怜啊！一点点 á to 无歇困......。」杨琼英心内忧伤痛苦，giōng beh 死......
|
|
谢纬讲：「我必须二点到二林。我若慢一分钟到病院，病患就加痛苦一分钟，我 bē-sái hō͘ 病人加受一分钟ê痛苦。若是我ē-tàng khah早到，甚至ē-tàng加救一条生命！」讲息，m̄ 愿劳烦别人 ê 谢纬，一 ê 人亲身开车前往二林。
|
|
谢纬有时身体 siān-tauh-tauh，beh出门ê时，关心ê牵手lóng会问他：「为什么无爱加歇困一下？」谢纬ìn讲：「死，就ē-tàng歇困。」谢纬夫人bat感慨按呢讲：「莫怪他会thiám kah倒落去，就算是铁phah ê身体，mā bē堪得这呢久长ê精力透支ah！」
|
|
谢纬tī他有生之年，维护了长老教会ê主权kap尊严，mā用他坚定ê信仰立场，保tiâu台湾基督长老教会总会tī WCC 组织ê席位。但是，总会无法度忍受政府ê压力，tī谢纬1970年6月过往了后，犹原被迫退出了WCC。直到10年后 (1980) chiah重返 WCC。
|
|
六○年代，国民党政权认为「普世教会协会」(WCC)是「容共团体」，并要求长老教会退出chit种组织。担任总会议长ê谢纬，犹原勇敢面对所有挑战，希望ē-tàng「圆满」解决chit-ê 事件，同时mā ē-tàng捍卫长老教会ê主体性。
|
|
谢纬担任台中中会议长(1966)，总会副议长(1968)以及总会议长(1969)拢是tī无出席会议ê情形之下，被选出来。thang讲是去hō͘ 人强sak出来ê。虽然m̄是出tī本身ê意愿，谢纬为tio̍h beh hō͘ 代志「khah圆满khah好」，他路尾亦是出来担任chiah-ê 职务。
|
|
虽然m̄是出tī本身ê意愿，1966年谢纬受选担任台中中会议长，koh tī未出席会议ê情形之下，1969年被推选做台湾基督长老教会总会议长。他除了日暝tī山地kap沿海之间来来去去，从事医疗救人ê工作以外，koh tio̍h处理教会事务，tùi中会到总会，致使他ê工作koh-khah繁重。
|
|
因为玛喜乐有照顾小儿麻痹患者chit方面ê经验，所以当谢纬tī二基病院beh成立「附设小儿麻痹保育院」ê 时，头一个想tio̍h ê siōng适当人选，就是她。
|
|
谢纬去美国进修teh-beh tńg来台湾chìn前，1954年7月tī加州旧金山「柏克莱第一长老教会」ê祈祷会中，讲述台湾现今ê医疗状况，以及他计划tī tńg来台湾了后ê宣教工作kap医疗理想时，感动了mā去参加祈祷会ê玛喜乐太太。
|
|
1970年6月谢纬受主拣召，过无joā久，二基病院业务开始萎缩，收入无法度维持营运，员工续落来陆续离职，院务渐渐荒废。吴震春看tio̍h chit种情形，禁bē-tiâu心中一chūn悲哀，认为「二林基督教病院ê荒废，是基督徒ê见笑代」。因此，伊开始积极二基ê「复原」工作。
|
|
虽bóng tùi南投去二林 ê 路途真遥远，谢纬犹原 kā 病院 ê 员工讲：「无论 tang 时病人需要我，我会随时来。」
|
|
谢纬认为做医生ê，应该抱tio̍h救人第一为宗旨，绝对m̄是kan-ta为tio̍h thàn钱nā-tiāⁿ，因为，救人所得tio̍h ê快乐，时常赢过金钱。伊讲：「做医生ê快乐，m̄是得tio̍h金钱，是得tio̍h患者ê sìn-nāi。」
|
|
中中医疗团tī台中kap彰化沿海地区巡回医疗3年了后，谢纬选定二林镇来创设基督教病院。1964年11月初3 tī当时人口数5万6千goā人ê二林镇成立「基督教沿海巡回医疗病院」。这是第一间由台湾人所独力创办ê教会病院，是台湾人ê骄傲，mā显出台湾人ê尊严。
|
|
谢纬tùi 1961年起，积极投入tī差不多得bē-tio̍h任何医疗援助ê中部沿海地区ê教会医疗服务 ― 「台中中会医疗服务团」。1964年创办了第一间不靠外资，由台湾人家己兴建ê基督教病院 ―「二林基督教病院」。当时长老教会各中会陆续成立医疗团，最后将医疗团发展成设立基督教病院ê，只有台中中会医疗团。二林基督教病院ê设立，以及二林喜乐保育院ê创办，是医疗团tī彰化沿海地区「意外」ê成果，mā tī台湾医疗史内面，留落基督徒医生tī偏远地区美好ê脚迹。
|
|
谢纬写信hō͘ 孙理莲，表示家己已经kap王金河谈过相关ê问题。伊感觉有chit koá tāi-chì必须ài说明清楚，chiah ē-tàng化解in二人之间ê误会。谢纬讲：「人生ná亲像一盘棋，有输mā有赢，咱mài计较输赢，只要专心、认真，抱tio̍h喜乐ê心情，尽本分去做就好lah。」
|
|
有一 pái，因为西德药厂赠送一批药剂 ê 关税问题，hō͘ 王金河 kap孙理莲中间产生误会，「怜悯之门」mā 差一点 á 遭遇 tio̍h 停办 ê 命运。经过谢纬 tī 王金河 kap 孙理莲二人中间进行沟通 kap 了解了后，chiah hō͘ 真相大白。
|
|
1970年5月23日，谢纬 kap 夫人杨琼英同齐前往北门，参加免费诊所创办10周年感恩礼拜，并以「为主甘愿做戆人」为题证道。
|
|
包括谢纶kap助手刘敬成等医护人员，早起10点 goā kap谢纬同齐坐计程车tùi南投镇出发，接近下晡2点chiah来到，开始谢纬接续落来ê诊疗工作，tńg来到南投，已经是暗时10点40分。
|
|
谢纬看tio̍h chit种情形，心内真m̄-kam，随时就答应孙理莲ê邀请，决定beh到当地义诊。1960年5月23日正式成立「北门怜悯之门免费诊所」，由孙理莲、王金河、谢纬负起医治乌脚病患者ê责任。
|
|
王金河带孙理莲一阵人到乌脚病患ê厝内探访，深入了解病患ê症状以及生活状况了后，tī台湾各地已经从事社会慈善事业真多年ê孙理莲，心中出现了欲按怎进一步帮助乌脚病患ê念头，乌脚病患者ê医治，总算显露出一道希望ê曙光。
|
|
1960年谢纬koh接受一项特别ê任务kap挑战，就是将伊ê医疗触角延伸到海边，用伊hit双非常有价值ê双手，tī台南县北门乡替贫苦无助、痛苦无依ê乌脚病患者进行截肢手术。
|
|
等开刀息，谢纬叫in入去伊ê办公室，对in讲：「病人tī咱ê手中，任何ê动作lóng bē-sái têng-tâⁿ ê……chit项事bē-tàng hòng-hòng。一旦入去开刀房，病人宝贵ê生命就掌握tī咱ê手里，设使tī开刀ê过程我若有疏忽ê所在，lín护理人员mā有责任提醒医生，因为，咱ê工作lóng仝款重要。」这是谢纬尊重生命ê态度。
|
|
孙理莲bat讲：「谢纬ê手实在太有价值lah」。伊讲chit句话ê意思，表明谢纬ê手是beh为病人开刀， m̄是用来驶车ê。所以，为tio̍h无欲hō͘ 谢纬过头操劳，tī伊41岁生日ê 1957年3月2日hit工，病院特别买一台红色ê吉普仔车hō͘ 病院kap伊使用，mā聘请一位司机。
|
|
1955年，tī谢纬兴建肺病疗养院ê同时，mā同齐kap孙理莲tī埔里镇中山路起一间「基督教山地中心诊所」(埔里基督教医院前身)。这间诊所tī仝年10月建设完成，1956年正月16举行开幕典礼，第一位主治医师是卢昆山，黄玉端是第一位护士，谢纬受邀请义务看诊koh兼任第一任院长。
|
|
无偌久，孙理莲tī埔里镇内所起ê「基督教山地中心诊所」，原住民患者jú来jú chē，所在不够使用，孙理莲就向谢纬借用设tī镇郊鲤鱼潭畔，tú 起好ê肺病疗养院，来hō͘ 原住民患者使用。为tio̍h按呢，谢纬只好tī肺病疗养院无偌远ê所在，家己另外出钱koh再买八分地来起另外一间疗养院。
|
|
1953年12月，孙理莲亲身去到美国水牛城探望谢纬，koh邀请伊tńg来台湾了后ē-tàng同齐tī埔里地区起病院，为原住民服务。谢纬期待真久ê「基督教肺病疗养院」，tī 1956年正月26日开幕。
|
|
1954年tú tùi美国进修回台ê谢纬，tú学tio̍h siōng新ê医学技术，尤其是伊身兼医生kap牧师两种专业角色，tī当时ê台湾社会，thang讲是不可多得ê人才。根据谢纬ê小学同学，tī南投开业ê叶国庆医师转述，当时台北马偕纪念病院bat内定谢纬为hit-ê病院ê院长，谢纬kā伊婉拒，随时全心投入医疗宣教ê事业。
|
|
谢纬tī美国前后三年ê外科进修，告一段落。1954年7月离开美国东部，沿途tī真chē场合说明伊来美国ê目的，以及tńg去台湾了后所beh进行ê医疗计画来募款。到旧金山ê时，玛喜乐太太（Mrs. Joyce Meredith McMillan）受tio̍h谢纬ê精神感动，当场就奉献美金325元。8月底tńg来到故乡南投，开始展开伊ê医疗宣教事业。
|
|
鲍伯・冯雷医师问谢纬，需要joā-chē钱chiah ē-tàng开始起一间疗养院？谢纬回答讲，差不多美金五千元。两个人khêng-khêng 咧，身躯顶只有美金五kho͘ gîn。鲍伯笑笑á讲：「这是一个好ê开始，你kā收起来，然后到我连络ê教会去，kā咱所看tio̍h ê异象kā-in讲。」Tùi美金五kho͘ gîn ê信心开始，谢纬kap鲍伯・冯雷分头设法募款，以完成谢纬回台了后，tī埔里设立肺病疗养院ê心愿。
|
|
1953年3月，谢纬kā太太讲，有一间神经外科病院同意伊去hit-pêng进修。M̄-kú，院方kā伊讲，若beh tī-hia研究脑神经外科，至少tio̍h需要5年ê时间。原本伊计划tī美国进修一、二年就beh回国，chit时koh听讲beh多留5年，伊一时m̄知如何是好，伊koh问太太ê意见。
|
|
1952年ê 2月初，因为tú到美国无偌久，语言kap文化mā tú仔teh学习kap适应，病院却tī无事先通知ê情形下，将谢纬解聘，理由是因为伊ê英语无偌好 ..............
|
|
有一工，孙理莲问谢纬是m̄是愿意到美国去做进一步研习？伊讲：「若按呢你就koh-khah ē-tàng充实家己来为上帝做工，替病人服务。」对谢纬来讲，这是另外一种挑战，伊同意beh去美国。因此，谢纬离开门诺会山地医疗团ê工作，tī 1951年秋天前往美国进修外科手术。
|
|
有一工谢纬遇tio̍h孙理莲教士，伊kā谢纬讲，伊对山地同胞中间染病kap性命kiông-beh无去ê人，内心有一种极大ê负担。Tī将近一年ê工作中间，谢纬注意tio̍h 散赤ê原住民同胞。M̄-nā án-ne，谢纬有koh-khah chē ê 心得：美国人比咱koh-khah拚(piàⁿ)；牺牲m̄是折磨、痛苦，颠倒是快乐。
|
|
In将一台美国军用卡车，改装做载运医药品kap罐头、牛奶等补给品路用ê医疗专车，koh用peh山潦水ê方式，进入偏远山区替原住民看病，这是台湾医疗史上第一批由外国宣教师 kap本地ê医护人员、传道者、翻译人员所组成ê专业医疗团。
|
|
二次战后台湾当时ê社会处境，卫生环境无好，民众染tio̍h肺病ê人真chē，家境又sàn-chhiah，这种情形koh是山地乡上（siōng）严重，是极需要社会援助ê 弱势团体之一。真chē外国民间组织kap教会团体积极投入救济ê行列，一方面协助政府从事战后ê救援工作。仝这ê时阵，谢纬mā开始进行伊ê 医疗kap宣教事业。
|
|
当时设tī南投县名间乡ê赤水基督长老教会，已经二年无牧师牧会。陈辛修长老前往南投教会拜托吴天赐牧师与谢纬接洽，看会thang绍介伊去赤水斗相共否(tàu-saⁿ-kāng bò͘ )？
|
|
1945年8月15日，日本无条件投降。战争既然已经结束，谢纬带tio̍h新婚5 kò goā月ê牵手，tī 1946年4月24日tńg来到台湾。 彼当时(hit-tong-sî) 转来到故乡南投ê谢纬，已经完成神学kap医学教育，伊无koh逃避，随时开始伊ê传道kap医疗事工。
|
|
1942年左右，tī留日家族ê聚会里，杨琼英kap谢纬koh相tú。杨琼英对谢纬ê印象真好，因为伊真会晓照顾 kha̍h oàⁿ 到日本读书 ê表兄弟姐妹，而且受过牧师养成教育ê谢纬，讲话真实在，所以杨琼英感觉谢纬是一个真有爱心koh真有责任感ê人。
|
|
对tī谢纬来讲，1945年是伊生涯关键ê一年，mā是人生ê转斡(tńg-oat)点。大战teh-beh结束ê前几kò-goā月，mā度过一段逃难ê日子。后来谢纬停止脚步，用平静ê心思考：「我是teh逃避什么leh？当然m̄是上帝。我若是teh逃避人，án-ne我beh按怎ē-tàng帮赞in leh？」
|
|
谢纬tī神学院一面读书，一面准备医学院ê课程，mā积极筹备前往日本ê代志。M̄-koh因为担心日本政府会搅扰(kiáu-jiáu)牧师ê生活以及压制教会ê活动，伊bat想 tio̍h欲去东京ê一间大学研究文学。但是，谢纬koh意识tio̍h家己iáu有医疗传道ê理想，所以当太平洋战争爆发ê时chūn， 伊iáu 是进入日本ê医学院。
|
|
谢纬因为着急beh去日本读医学院，考完毕业考了后，无参加学校ê毕业典礼。Chit点引起院长满雄才ê无欢喜，杨士养牧师极力为谢纬讲情。满院长chiah同意koh「破例」一pái，颁发毕业证书hō͘ chit位「迟到早退」ê学生。
|
|
谢纬讲：ùi chit 时了后，我立志无因为名誉心（虚荣心） iô-choah ， tùi 按呢 beh 受纯然 ê 圣化，做上帝 ê 器具来活动。若 ē-tàng 坚强向 chit ê 目标迈进，我 ê 名誉心就会消除。上帝 ah！ 我将家己献 hō͘ 祢，做祢 ê 器具，请祢欢喜接纳。
|
|
谢纬时常 tī 下课了后就到满雄才牧师 ê 宿舍，研究音乐、练习钢琴、小提琴， koh-khah 将才华伸长到作曲方面。伊 koh 真爱声乐，伊认为 tī 悲伤抑是孤单 ê 时,唱歌 ē-tàng hō͘ 情绪放轻松，得 tio̍h 内心 ê 清静，慢慢仔 kā 世俗 ê 各种下贱现实 ê 一面 pàng bē-kì。
|
|
谢纬无逃避读神学校，因为这只不过 kap 家己原来 ê 「生涯规划」顺序倒反 (tò-péng) nā-tiāⁿ 。吴天赐 chhoā 谢纬去台南神学校，院长满雄才kap 谢纬面谈了后，感觉真满意， tō 同意 chit 位 「迟到」 (oàⁿ-kàu ) ê 学生入学。
|
|
原来就对文学真有趣味ê谢纬， tī 中学四年级 ê 时 mā 去 kap lâng 参加高校考试，但是， soah 考 bô-tiâu 。中学五年毕业了后，伊 koh 再赴考，犹原是落榜。老母要求伊随时去读台南神学院。 Hit 时台南神学校已经开学一个 goā 月。
|
|
谢经、谢纬、谢纶三 ê 兄弟同齐 tī 同一间学校(台中一中)读书。In 每礼拜日拢到台中柳原教会做礼拜，谢纬同时参加圣歌队， koh tī 教会司琴，并担任主日学教员。中学时期谢纬就认为传福音无应该 kan-ta tī 礼拜堂内底讲道，是tio̍ h 进入社会，接触 koh-khah chē ê 人群。
|
|
因为一摆 ê 意外事件，彻底改变了谢纬 ê 一生。 Tùi án-ne，伊愿意献 hō͘ 主用，到死为止。
|
|
Hioh-joa̍h ê 时，阿纬 mā kap 其他 ê 小朋友 tī 教会排演「圣诞剧」。吴天赐牧师 iáu 会 tùi 真 chē 戏剧中间，选几出 á khah 好 ê，带 in chit- ê 小「剧团」到附近 ê 教会去「公演」...
|
|
谢纬 ê 老母，吴上忍，是吴葛 ê 第三 cha-bó͘-kiáⁿ。谢纬 ê 老父，谢斌 tī 南投镇上开设「大同医院」。原来是信仰台湾民间宗教 ê 谢斌，27 岁娶吴上忍 choè 某，通过家后 ê 引 chhoā 来成做基督徒。
|
|
故事中 ê 主角，有充满传奇 ê 一生，伊感性 ê 另外一面，tsit-sut-á to 无掩盖 (khàm) 透露出真性情。谢纬 ná 亲像就 tī我 ê 身边，伊同时 kap 我 tī 星空下对话；梦中，伊 tùi 我微微 á 笑。记忆， tńg 去到以前；回忆， tī 不知不觉中，说明 tio̍h 「是旧，犹久永新」 (Sī kū, iáu-kú éng sin) ê 故事。
|
|
这本书ê作者无嫌艰难与辛苦向多方面收集有关资料，费心整理，用朴素浅现通俗快明，无加装饰(chng-thāⁿ) ê文笔，将谢纬ê「历史」、心路历程、奉献生涯等等，缓缓仔(ûn-ûn-á)写出来，忠实交代于大家面前。
|
|
tī久长ê年代中，谢纬，这位台湾基督教史上bē-tàng欠缺ê牧师，我无印象；谢纬，这位为着救人ê性命煞牺牲家己ê医师，我也无印象。直到九○年代，因为王金河医师对乌脚病ê贡献，才(chiah)知谢纬这个名，也开始刻tiâut tī我ê头脑内。
|
|
本书以《台湾另类牧师・医师—谢纬》为题，我感觉非常贴切。 但愿本册ê出版，ē-tàng 使 koh-khah 多人认识谢纬这位台湾另类牧师・医师，也使谢纬彼款深刻丰富ê人格及生命特质影响、感染koh-khah 多ê台湾人。
|
|
谢纬tī上帝面前所立ê约，是伊一生ê目标，也是伊一定会遵守ê。伊ê一切，属tī上帝，所以上帝若差伊tī甚么所在事奉，伊就非常欢喜，欢喜tī彼个所在为需要ê人服务。
|
|
甘愿做戆人的谢纬
|
