《台湾另类牧师．医师―谢纬》

 | | | 转寄

3-04 迟到早退ê学生

作者 陈金兴 2011.08.14

1937年，中日战争爆发了后，日本总督府极力推动「皇民化运动」，koh鼓励大家接受日本神道信仰，定期参拜神社，进行「正厅改善」kap「寺庙整理」运动，引起教会极力ê反抗，致使台南神学院被强迫关门。

关于当时日本压制教会ê情形，谢纬tī〈在所不辞〉chit篇文章中án-ne讲： 「Tī我完成最后一年学业ê时chūn，日本政府已经加强in对教会生活ê压制。若我现在成做牧师，我会受tio̍h秘密警察ê监视，三不五时就来搅扰，以及各种规章ê限制。」

Tī谢纬teh-beh毕业ê时，因为当时台湾ê政治情形jú来jú紧张，日本压迫基督教ê情形mā加真严重，致使伊koh-khah决心beh ài去日本读医学院。Tùi án-ne伊就向神学院kap教会当局申请赴日报考医专，并说明回台了后，有be̍h服务tī医疗传道工作，chit-ê申请有得着批准。谢纬tī 1938年chiaⁿ 月25日ê日记上有按呢写讲： 「(教会)传道局正式通知我ē-tàng去参加医专考试，传道局有许可，我chiah thang去。Chit-ê tāi-chì无joā爱hō͘人知影，惊hō͘人批评……事到如今，hō͘人批评mā好，我lóng m̄惊la̍h。我所惊ê只有一件事，就是我惊本身背叛上帝……我m̄是为tio̍h追求平安á 是好过日ê生活chiah来选择chit条路。上帝啊，求祢帮助我chit-ê决心，永远bē改变。

谢纬无kap一般神学生仝款，tī毕业了后直接分发到教会做传道师ê另外一个原因，谢纬夫人杨琼英讲： 「谢纬tī神学院teh-beh毕业ê时，同学lóng teh讨论beh到tó 一间教会ê同时，伊ê心内mā teh kún-ká：我kám beh去教会？我若m̄去教会，上帝是m̄是会欢喜？伊lóng m̄ 敢向别人讲伊beh读医学院ê事，惊别人认为伊beh ài thàn大钱，m̄去传福音。其实伊m̄是，伊是beh医疗kap传道相结合。」

另外，伊tī＜我ê生涯＞一文中，mā清楚按呢写：
1. 因为战争ê缘故koh-khah àn怎to无tī教会工作ê信心lah。
2. 我宁愿做自由传道。
3. 若án-ne做ê话kap教会以外ê世界有koh-khah好ê关系。


1938年3月19日，谢纬自台南神学校毕业。但是，因为伊着急beh去日本读医学院，考完毕业考了后，无法度参加学校ê毕业典礼。Chit点引起院长满雄才ê无欢喜，想beh拒绝分毕业证书hō͘ 伊。杨士养牧师听tio̍h chit-ê tāi-chì，极力为谢纬讲情。伊去向院长表示，既然谢纬已经完成毕业考试，而且各科成绩mā lóng及格，照理学校应该颁hō͘ 伊毕业证书chiah-tio̍h。满院长听完了后，chiah同意koh「破例」一pái，颁发毕业证书hō͘无参加毕业典礼ê谢纬，hō͘ chit位「迟到早退」ê学生，会得thang安心kap顺利前往日本继续伊ê医学院生涯。