《台湾另类牧师．医师―谢纬》

 | | | 转寄

4-01 Tī东京ê亲族兄弟情

作者 陈金兴 2011.08.21

1938年1月，神学院iáu-boē毕业，谢纬就写一封航空批hō͘ 当时teh东京读日本齿科医专ê台中一中室友陈柑菓。Tùi án-ne，陈柑菓照约束ê时间，前往车站接谢纬kap谢纶到伊税厝ê所在。当时，只要捐款就ē-tàng m̄免考试入学，但是谢纬无想beh án-ne，伊beh遵照一般程序参加考试，因为伊深信上帝会带领伊所beh行ê路，m̄管成功á 是失败。

3月中到东京ê谢纬，对tī真久无接触ê数学khah pháiⁿ 应付，所以决定beh补习一年chiah koh再参加考试。谢纬kap谢纶两兄弟就先tī「东京城北预备学校」补习功课。隔转年，谢纬顺利考tiâu设tī新宿区ê「东京医学专门学校」(今东京医科大学)；谢纶因为细汉ê时听力受损，依照规定bē-tàng报考医专，也考入去「名古屋药学专门学校」就读。两兄弟chū 按呢tī 无仝所在读书(chheh)。


照咱所知，谢纬ê外公吴葛以多产出名(共十六位子女)，家族庞大(toā-bong)，后代子孙繁多(hoân-to)，到日本进修是吴家ê传统。而且，chiah-ê gín-á无论先来后到，为tio̍h tī生活上ē-tàng互相照应，lóng会相招toà-tī仝一位或附近地区，这mā成做吴家后代ê 不成文规定。因此，谢纬tī日本ê时有真chē表兄弟姐妹mā tī hia求学，后来伊mā搬去kap 伊ê表兄弟作伙toà。

根据谢纬ê表小弟刘瑞腾医师回忆(hoê-e̍k)讲，当in tī东京读书(chheh)ê时，前后大概搬五摆厝，就是渋谷、中野、代代木、大久保及下北泽等所在。Kap谢纬toà作伙ê，除了刘瑞腾以外，其他ê表兄弟iáu包括刘俊雄(刘瑞腾胞兄)、吴晨钟、吴雅仪、汪焕文及杨东杰(杨琼英胞弟)等人。谢纬延续谢家ê惯例，每工暗时聚集众表兄弟举行家庭礼拜，而且家己弹风琴，或独唱或kap大家同齐吟唱圣诗。课余(khò-î)，谢纬时常kap刘俊雄、汪焕文行围棋。

因为iáu有真chē亲戚beh tùi台湾来读书，为tio̍h方便照顾三顿kap khiā起，杨琼英ê老母特别tùi台南请一位妇仁人前来下北泽煮饭。Chit位妇仁人年岁约50岁，无结婚，koh吃素(chia̍h-chhài)，in lóng称呼伊「叶官」(hio̍h koaⁿ)。Tú 到日本ê时，叶官ê日语m̄是真圝转 (liàn-tńg)，mā无厝边kap伊讲台语，koh加上m̄-bat字，性地koh龟怪，hō͘ 伊tùi án-ne感觉真孤单。但是，谢纬对叶官真好，常常陪伊开讲，所以叶官mā kā谢纬tòng-choè家己ê gín-á仝款看待。

谢纬到日本读书ê时已经23岁，平平tī东京ê chiah-ê表兄弟中间，属谢纬年纪siōng大，是这阵表兄弟中ê领导者、保护者。当chit几个少年人作伙，有tâng-sî会吵架(oan-ke)、相骂(sio-mē)，伊tiāⁿ-tiāⁿ mā担任和解者ê角色，时常用当年tī台南神学院，院长满雄才ê话苦劝in讲：「人kap人中间，tio̍h kap音乐仝款和谐(hô-hâi)，以和为贵。」谢纬每礼拜日tō 到东京台湾教会做礼拜，kap当时ê牧师郭马西（1891-1966）熟识。