《台湾另类牧师．医师―谢纬》

 | | | 转寄

3-03 决心报考日本医专

作者 陈金兴 2011.08.07

做医生是谢纬 ê 愿望， tī 医治病人 ê 同时， mā ē-thang 传道理，四界去宣扬福音。 Chit 款医病方式 ê 自由传道， koh-khah 是伊自头到尾所期待 ê。但是， tī 伊 chìn 前，无一个台湾人是 lia̍h 「医疗宣教」做一生职志 ê ， mā 就是讲 chit 种做法并「无例可循」，致使青年谢纬一直处于 tiû-tû (犹豫)、困惑、无助，以及 m̄ 知如何是好 ê 中间。 M̄- koh ， tī 神学校研读神学二年了后，谢纬无 hō͘ 厝里 ê 人知影 ê 状况下，开始「偷偷 á」动手准备考医学院 ê 课程。

伊 tī 1936 年 4 月 20 日 ê 日记上按呢写，讲： 「Tùi chit 学期开始，需要准备毕业了后 ê 升学考试 lah ，目标是医学院。但 chit-ê tāi-chì 除了 tī chia ê 朋友以外， lóng未 (boē) hō͘ 人知影。过去我有二摆(高校考试)痛苦失败 ê 经验， chit-pái 绝对 bē-tàng koh 重覆失败，想 beh 好好 á 打拚用功， iáu-beh 将家己用功 ê 份量，每工 kā 记录落来。忠实 kā 记落来 ê 话，可能就 bē pîn-toāⁿ lah！」

事实上，谢纬心中 mā 为 tio̍h 神学校毕业了后 tio̍h 先做传道师，或是 (he̍k-sī) 到日本读医学校 teh peh-pak 。1936 年 5 月初 2 到初 9，中国布道家宋尚节 (1901-1944) 博士 tī 台南神学校操场，搭竹棚仔作为会场，举行「奋兴布道大会」，聚集了大约 5千人。正当心头拿 (lia̍h) boē 定， khiā-tī 十字路口徘徊、操烦 ê 谢纬， mā tī 人群中央 (tiong-ng)。听了宋尚节博士 ê 一 koá 话了后，伊 hit 粒困惑 ê 心， chiah 得 tio̍h tháu 放。 Tī 明白上帝 ê 旨意了后，伊 koh-khah 坚定家己 ê 方向。





● 宋尚节博士1936年来台举行布道大会。








伊 tī 日记顶面按呢写： 「我想宋尚节博士 ê 话，已经 hō͘ 我确定家己 ê 生活方针 lah。当我因为是 m̄ 是 thang 进入医学院 á 陷入苦闷 ê 时，听了宋博士 ê 一 koá 话，原本内心 ê 自责竟然奇妙消失。 M̄-nā 按呢 nā-tiaⁿ ，就 tī hit 瞬间 (sùn-kan) ，我已经坚信我所做 ê 决定是正确 ê 。就 ná 准宋博士所讲 ê ，或做传道师，或做医生， lóng 是为上帝 teh 工作。因为 chit 句话，我 ê 内心有非常清楚 ê 感动。同时， ùi chit 时了后，我立志无因为名誉心（虚荣心） iô-choah ， tùi 按呢 beh 受纯然 ê 圣化，做上帝 ê 器具来活动。若 ē-tàng 坚强向 chit ê 目标迈进，我 ê 名誉心就会消除。上帝 ah！ 我将家己献 hō͘ 祢，做祢 ê 器具，请祢欢喜接纳。

Tī 宋尚节 ê「奋兴布道大会」了后，神学校 mā 组一 ê 布道团，前往附近去布道， 5 月 15 日这一工，是谢纬第一 pái tī 街头布道，地点是 tī 现今新丰镇公所前 ê 广场。神学校毕业 ê 前一年， 1937 年 4 月 25 日 ê 日记上 koh 看 tio̍h 谢纬内心 ê 争战： 「我迷路 la̍h 。一年了后我 ài 怎样行？去日本内地就读？ á 是照别人 ê 推荐，冒险渡洋(去美国)？去日本是照家己 ê 计画，渡洋有真大 ê 吸引力……Aih，beh 选择 to̍h 一边 chiah 好？有人讲渡洋 mā 是另外一种选择，不过 soà 破坏了我 ê 计画……tio̍h 怎样处理卡好？」