《台湾另类牧师．医师―谢纬》

 | | | 转寄

3-02 Tī 神学院 ê 生活点滴

作者 陈金兴 2011.07.31

当时学校 ê 学生人数大约有四十名左右(注1)， 教授 mā 无 chē (注2)， 因此，老师 kap 学生做伙凑阵（tàu-tīn）拢真和睦。谢纬时常 tī 下课了后就到满雄才牧师 ê 宿舍，研究音乐、练习钢琴、小提琴， koh-khah 将才华伸长到作曲方面。伊 mā tī 每礼拜三暗时 kap 满牧师娘学习声乐。伊真爱声乐，伊认为 tī 悲伤抑是孤单 ê 时,唱歌 ē-tàng hō͘ 情绪放轻松，得 tio̍h 内心 ê 清静，慢慢仔 kā 世俗 ê 各种下贱现实 ê 一面 pàng bē-kì。 Tùi 文学 iau kú 思思念念 ê 伊，有 tang 时-á 会作诗、写小说。 Tùi中学时期就养成每工运动惯势 ê 谢纬， bat tī 长荣中学、长荣女中 kap 台南神学院联合运动会比赛 ê 时，得 tio̍h 赛跑 (cháu-pio) 冠军。




● 台南神学院音乐会




谢纬 ê 其他兴趣 iáu 包括行围棋 kap 看电影，有时 mā 会 sio-chio (呼朋引伴) 到台南东市场 ê「盛埸」(sakariba,さかりば)担头-á（tàⁿ-thâu-á），或是附近夜市-á 请同窗食鱼丸汤、烧肉粽、担 á 面…等。谢纬积极、活泼 ê 个性，不时参加校内外各种聚会 kap 活动。

1937 年谢纬 tī 神学校四年级 ê 时， mā bat 担任学生会会长。钟子时牧师当年 tú 进入台南神学校读书 ê 第一工， tī 校门口看 tio̍h 一位身穿黑色学生服，脚穿棕榈 (soaⁿ-chang) 做 ê 木屐、头毛蓬松 ê 青年，杨作舟 kā 伊讲， hit-ê 就是 ùi 南投来 ê 谢纬， in 谢家是望族。

Chit 一年 ê 七月初三到初五，谢纬组队去 peh 新高山(玉山)。 Kap 伊做伙去 ê 同伴有神学校教授黄主义牧师、学生苏振声、钟子时，加上新楼病院 ê 医师黄永昌、许寸金 kap 汪药剂师等人。 In 顺续去阿里山， koh 再循 (sûn) tio̍h 东埔、水里落山，来到南投大同病院，接受谢家款待、 tī hia 过暝， hit chi̍t 暗 in 一阵人 mā 参加谢家 ê 家庭礼拜。隔转工，钟子时 in beh 离开转去 ê 时，谢纬问伊：「身躯是 m̄ 是 iáu 有钱？出门在外 bē-tàng 欠 (khiàm) 所费。」随时 tùi 橐袋仔(lak-tē-á) 底 jîm 出银票hō͘ 钟子时。同年(siâng-nî)，伊 oan-ná 受邀请担任赖炳炯牧师结婚时 ê 子婿伴(男傧相)。

............................................................................................................


(注1)
1931 年至 1938 年（谢纬毕业）同时在学 ê 前后期学生有 40 人。以入学年分计算，1931 年 13 名（刘华义、苏天明、欧进安、罗约伯、陈光辉、许赞育、廖间淑、杨招鉴、萧朝金、潘纯荣、许乃萱、邱天登、翁西庚）；1932 年 4 名（何荣如、赖炳烔、廖三炮、许溢超）；1933 年 5 名（吴德元、林和引、钟茂成、康嘉音、汪焕文）；1934 年 5 名（黄东识、谢纬、施锡圭、赖喜华）；1935 年 4 名（高约拿、杨作舟、金进安、李连登）；1936 年 5 名（姚正道、陈约翰、杨信得、许德谦、苏振声）；1937 年 4 名（周金耀、吕春长、钟子时、戴明传）。《台南神学院校友名录》，2001 年 6月， 第 11 页。

(注2)
除了雄满才院长之外，iáu 有巴克礼牧师、武田公平牧师、高金声牧师、杨士养牧师、黄俟命牧师、黄主义牧师等。