《台湾另类牧师．医师―谢纬》

 | | | 转寄

11-03 谢纬 tiàm tī 世间 ê 最后一刻

作者 陈金兴 2012.05.20

1970年6月17日下晡2点 goā，当 teh 大同病院协助看诊ê汪清医师，忽然看 tio̍h 二位警察入来，无出声，恬恬 khiā-tī 诊疗桌头前。大约过了十秒钟，其中一位，面貌肃穆而且神情沉重，the̍h 一张小字条 hō͘ 汪清，对他讲：「这是名间派出所 phah 过来 ê 电话记录，lín 赶紧去现场处理！」汪清一下看，顶面 kan-ta「大同病院院长谢纬身亡。」拾字。

这 kah-ná 是去 hō͘ 雷公 hmh-tio̍h ，重重 phah tī 汪清身上。回想 tio̍h tú-tú 家己 chiah 亲目看谢纬出门，汪清一时 m̄ 知 beh 按怎 chiah 好。他 m̄ 敢惊动 tī 客厅看书 ê 谢纬夫人，随时私底下 chhoē 黄天宝（南投县医师公会总干事）kap 谢载烈（大同医院同仁）同齐赶去车祸现场。

谢纬 tī 名间发生车祸 ê 消息，真紧就传回10公里外 ê 南投街仔。大同病院隔壁 ê 一位阿婆，走去问杨琼英：「听讲阿纬先生 ê 车发生事故？」Kui 面侥疑 ê 杨琼英问讲：「敢是真 ê？」四围 ê 气氛开始变 kah 真沉重，她ê脑海内，随时浮出一种歹 ê 兆头。虽然 m̄ 知影 chit ê 消息是 m̄ 是真 ê ，杨琼英目头 kat-kat，随时请人 chhoā 她去现场。

因为无清楚车祸发生 ê 确实地点，心内真着急 ê 杨琼英，坐tī o-to-bái 顶，沿路两旁四界 chhoē，却 iáu 无看 tio̍h 车 ê 影迹，mā 无发现任何车祸事件。她一路祈祷讲：「上帝 ah！求祢保守阿纬，留他 ê 活命。他若因为车祸致使断脚断手，我愿意照顾、帮赞他一世人……。」 到名间派出所听警方 ê 说明了后，她就 kah-ná 飞仝款，赶去现场，却发现谢纬早 to̍h 无 khùi-si-á，已经死。杨琼英捶心肝 koh chàm 脚，m̄ 敢相信目 chiu 前所看 tio̍h ê 一切。

她问上帝：「Ná-ē 按呢？我无法度理解！」

下晡1点55分，谢纬开车经过名间乡，急 beh 往二林为患者开刀，意外 lòng　tio̍h 公路对向 ê 路树，车祸身亡，结束他55年tī 世间 ê 日子。他死 ê 时 chūn，身躯真完整，kah-ná 安然 teh 困，无流血；无别人 tī 车内伤亡；他 ê 车 mā 无 lòng　tio̍h 路边 ê 人。小轿车左旁 ê 车门开开，谢纬坐 tī 驾驶座里，头壳 kap 肩胛头 chhun 出 tī 车外，被发现 ê 时，谢纬已经断气。





●谢纬发生车祸 ê 时所穿 ê 衫。










●谢纬发生车祸 ê 时所穿 ê 西装裤。





杨琼英赶到现场，虽然恳切哀求看 ē-tàng 倚近探视谢纬 bò͘ ，但是警方人员却极力劝阻，一直 thèng-hāu 到 hip 相、检验了后， chiah kā 遗体搬 soá 到另外一丛大树脚， chit 时她 chiah得 tio̍h 允准接近谢纬。杨琼英 the̍h 手巾 á 出来， chhit谢纬 ê 面，家己 mā 目屎流、目屎滴，一面哭、一面吐大气，讲：「Ah……你……真可怜，真可怜啊！一点点 á to 无歇困。我若无 hō͘　你出来就好 lah……，我若阻挡你开车就好 lah……，但是你却 hiah-ni̍h 爱家己开车……。」杨琼英心内忧伤痛苦，giōng beh 死！

谢纬发生车祸来过往 ê 消息，真紧 to̍h 传遍南投镇 ê 大街小巷，听 tio̍h ê 人 lóng 惊 一 tiô，感觉真无 chhái、真 m̄-kam。真 chē 人知影 chit-ê 消息，随时放落 khang-khoè，走去名间现场关心。人 kap 车 jú 来 jú chē，无偌久，忽然天昏地暗，落大雨。有一位计程车司机主动表示，因为他非常尊敬谢纬，所以愿意载运谢纬 ê 遗体 tńg 去。 Tùi 名间乡沿路到南投街仔顶，来关心 ê 人， e-e 阵阵，大家 lóng 是忧头结面，有人流目屎，有人恬恬无讲话。当计程车到大同病院门口 ê 时，车门一 phah 开，众人随时合力 kā 谢纬 ê 遗体扛入去厝内。