《台湾另类牧师．医师―谢纬》

 | | | 转寄

11- 04 谢纬 ê 告别式

作者 陈金兴 2012.05.27

二林基督教病院是谢纬创办 ê（1964），最后却 mā 因为他 beh 赶去二林为病人开刀， tī 路中丧失性命。

Beh 按怎办理谢纬 ê 告别式，真 chē 单位 lóng 极力 teh 争取， sio-chiⁿ 真久。Tī 情义上，谢纬为 tio̍h 二基病院贡献非常大，koh 因为前往 chit 间病院来意外身亡，二基希望举行「院葬」；谢纬 bat 担任台中中会议长（1966），因此，台中中会主张「中会葬」；谢纬出身南投，又 koh 是南投教会 ê 牧师（义务职），所以，南投教会全体长执、会友以及家族希望「教会葬」；长老教会总会认为谢纬当时是 tī 总会议长任内因公殉职 ê ，所以应该 tio̍h 举办「总会葬」。为 tio̍h 和平解决 chit 层代志，最后由谢纬胞弟谢纶出面协调，以「体会故人生前做人心意」―　处理代志以「圆满」为原则，来让步 hō͘　总会。 Tùi 按呢以「总会葬」仪式来送别谢纬。















6月22日（礼拜一）下晡1点，tī 南投镇中山街39号（现在79号）南投基督长老教会隆重举行告别礼拜，由总会副议长高俊明牧师以「息劳归天」为题证道。讲道中，高俊明坚定 koh 有力讲：「上帝既然 beh 息谢纬牧师 tī 世间 ê 劳苦重担，自然有他特别 súi ê 旨意。谢牧师虽然离开咱，代先 tńg 去祖家，咱应该学习谢牧师爱上帝、爱人 ê 精神。咱今仔日失去一位可敬、可爱ê谢牧师， ǹg-bāng 将来 ē-tàng 出来 koh-khah chē 位学（o̍h）他、亲像他 ê 谢牧师 — 台湾 ê 史怀哲。」












来参加告别式 ê，有政府首长官员、天主教 kap 基督教等 ta̍k 教派 ê 主教、牧师，以及长老教会总会全体干事、各中会议长、总委、中委、亲戚、朋友等三千 goā 人。出殡 ê 行列，koh-khah 是引人注目。平常时车辆真少 ê 南投街仔，tùi 每一条路看过去，人是 e-e 阵阵，如准 teh「做醮」。因为出殡行列 siūⁿ 过头长，宪兵 kap 警察单位出动大批人马维持交通。That tī 路边 kap 亭仔脚 ê 人群，有 khiā-teh ê、 跪 teh ê，甚至 mā 有哭倒在地 ê。「痛失英才」、「英年早逝」、「哲人已远」，讲出 hiah-ê 人对谢纬最后 ê 心声，除了怀念， koh 真 m̄-kam。

谢纬 ê 丈人杨云龙以挽联追悼他 ê 子婿：

谢神救恩效主牺牲 克尽忠牧殉使命
纬世颓风仁心惠众 发扬医德立标竿


《台湾教会公报》亦以头版刊出「总会议长谢纬牧师因公殉职」，并附挽联：


谢无怨言忠诚善牧务为公
纬有古道尽职良师痛急逝




谢纬受召 chìn 前，tī 1970年5月以总会议长身份，由夫人杨琼英陪同，做伙到台南市主持台南神学院 ê 毕业典礼。结束了后，他放弃台南神学院ê聚餐，就直接到市内设 tī 民权路 ê 杨云龙眼科病院，他 ê 丈人厝内食中昼。食完了后，谢纬 kap 牵手同齐赶紧开车到市府路，探望小妹谢瑶， koh 再往南去高雄县冈山镇，拜访大姐谢琼。这是 m̄ 是料想家己无 joā 久就会「遇难」，代先 kap 远远 tī 南部 ê 亲人相辞？是一个疑问， mā 值得思考 kap 想像。