《台湾另类牧师．医师―谢纬》

 | | | 转寄

11-02 一分钟 ê 遗憾

作者 陈金兴 2012.05.13

中年ê谢纬，因为时常工作过头，koh真少有充分歇困ê时间，感觉家己ê左旁胸坎kap胃有时chūn会痛。本身是医生ê谢纬，家己诊断病状，认为左旁胸坎ē痛，可能是冠状动脉硬化引起血管塞teh，或是心包油(心肌梗塞)。他mā家己怀疑是m̄是患tio̍h胃癌。感觉身躯不爽快，他想欲减少工作量，soà m̄知欲tùi tah-ūi减起。所以，他只有「准备心」，若上帝beh召他tńg去天家，他mā乐意顺趁上帝ê旨意。

谢纬ê行程排kah真满，莫怪他tī 1968年12月13日ê日记顶面会siàu念「家」ê温馨：「Tùi chit-ê礼拜日开始lóng连续出门，四界奔走，真thiám。明仔载（礼拜六）ē-tàng tī厝里，感觉真轻松。」Iáu有，1969年ê圣诞暝mā讲：「最近常常外出，chit两三工无出外，hō͘ 我感觉家庭是我siōng爽快、siōng温暖，歇困ê所在。」

1970年6月16日暗时11点goā，谢纬当teh北门乌脚病院为患者开刀，忽然接tio̍h二林基督教病院急诊室值班护士ê电话，通知谢纬二林有病人需要开刀。谢纬向对方表示，因为北门ê手术tio̍h ài到半暝chiah会完成，所以他明仔载chiah ē-tàng到二林。谢纬吩咐护士，先替患者phah止痛药仔，an-tah病人ê情绪，替患者办理toà院手续。



●谢纬行医所用ê医疗公事包，
是丈人杨云龙医师送hō͘ 他 ê 50岁生日礼物。




谢纬翻头继续开刀，直到隔工（17日，礼拜三）半暝点半chiah离开北门，赶tńg去南投。当他到南投ê时，已经是透早4点。谢纬小khoá歇困了后，tī 6点半写一张信hō͘ 总会副议长高俊明牧师。

7点参加家庭礼拜了后，谢纬就前往埔里基督教病院kap肺病疗养院巡回看诊。10点40分，谢纬ê车被发现停tī潘启扬内科诊所门口，原来是过分疲劳ê谢纬tī车内困去。潘启扬医师请他入去内面歇困，他讲m̄免，因为beh tńg去南投。Kap潘医师讲息，他中昼tńg来到南投大同病院，接替夫人杨琼英看诊。食过中昼饭，他去房间内 bîn-chi̍t-ē。

但是，无到一时仔久，夫人to̍h看tio̍h谢纬雄雄tùi眠床顶落来，他iáu阁爱困爱困，一面行，一面chhiāng-kha-ke teh穿袜á，如亲像「金鸡独立」。谢纬急beh出门，牵手看tio̍h chit款情形，心内真毋甘，苦劝他多歇困一下，并关心问他讲：「你chiah tùi埔里tńg来无偌久，歇困iáu未到10分钟koh ài出去，按呢敢未siuⁿ thiám？」

谢纬应她讲：「Bē。我必须二点到二林。我若慢一分钟到病院，病患就加痛苦一分钟，我bē-sái hō͘ 病人加受一分钟ê痛苦。若是我ē-tàng khah早到，甚至ē-tàng加救一条生命！」

一向真有责任感ê谢纬，koh kā太太讲，hit工到二林看完病患了后，beh去彰化，有人beh请他食暗顿，所以可能会khah oàⁿ一时仔 tńg来。1点30分，m̄愿劳烦别人ê谢纬，一ê人亲身开车前往二林。