《台湾另类牧师．医师―谢纬》

 | | | 转寄

11-01 死，就ē-tàng歇困

作者 陈金兴 2012.05.06

谢纬有时siān-tauh-tauh，beh出门ê时，关心ê牵手lóng会问他：「为什么无爱ke歇困一下？」谢纬ìn讲：「死，就ē-tàng歇困。」谢纬ê大囝婿汪清医师问他：「你ê工作chiah-ni̍h-chē，你是凭什么来完成neh？」谢纬回答讲：「认bat每一件工作ê价值，koh再运用坚强ê意志kap信心来完成它。当上帝kap你同在ê时，你就ē-tàng做任何ê工作。」谢纬认为歇困是一种奢侈（chhia-chhí）。

谢纬过身前ê 10年(1960-1970)，他ê工作量达到siōng高峰，mā实在hō͘人oh得相信。估计chit期间他一礼拜中间所走ê医疗行程，包括南投、埔里、二林以及北门，至少500公里以上。加上1964年了后，koh续落来担任台中中会副议长、议长、总会副议长、议长等职务，需要时常出外开会，或是处理教会相关事务。厝内底ê人kúi-nā-pái ài谢纬珍惜家己ê身躯、弃sak一koá工作ê时，他却讲：「趁我iáu强壮有精神ê时，多做一koá代志。Kìⁿ-nā珍惜生命ê人，就会丧失生命。」

他就是按呢拚命teh工作，往往一连kúi-nā工，每工工作16个小时以上。虽然按呢，他竟然只要真少ê食物kap困眠，就ē-tàng保持充沛ê活力kap坚强ê意志。每pái谢纬全心投入工作ê时，lóng是两lúi目睭眼神真有气力，如准向世界宣告：无任何一种外在ê压力thang动摇我ê信念！因为谢纬chit种对tī工作ê全心投入，他真少有家己ê时间，「歇困」对伊来讲，koh-khah是一种「奢侈」。

谢纬夫人就bat感慨按呢讲：「莫怪他会thiám kah倒落去，就算是铁phah ê身体，mā bē堪得这呢久长ê精力透支ah！」

1966年正月20是二九暝，大同病院ê员工lóng tńg去围炉，只chhun家己厝内ê人teh食团圆饭。但是，nā有患者来看诊，谢纬就家己看，家己配药仔。Hit暗半暝十二点有一ê人来khà门，拜托谢纬往诊。虽然已经真thiám，但是他认为chit种时chūn会来求诊ê患者一定真严重，所以谢纬赶快外出往诊。原来是一位吐血ê患者，家境非常sàn-chhiah，kan-ta母仔子两人相依为命。看诊了后，谢纬表示m̄免the̍h任何医药费，但是患者ê厝边却坚持beh替患者付钱。谢纬心内想，hō͘ 对方有做善事ê机会mā bē-bái。所以，包括往诊、注三支射kap药仔钱，kan-ta the̍h十块银，这是他hit年所做ê最后一件善事。
● 谢纬伉俪。(1969年)

1967年正月初8 tī日记顶面按呢写：「昨暝hō͘人叫起来三pái看患者，今仔日早起起床ê时间soà比以往khah晚，差不多七点五分。所以赶快洗面来赴早起七点ê家庭礼拜。像chit种真冷ê暗时hō͘人叫起来二、三pái，身躯确实是真thiám。但是我iáu是beh 按呢做。若是因为家己ê pîn-toāⁿ，本来应该ē-tàng被救ê患者，致使无时间thang被救ê时chūn，我就感觉对chit-ê患者真失礼。虽然真thiám，犹久mā是beh起来，若无按呢做，我会对不起家己ê良心。」