《台湾另类牧师．医师―谢纬》

 | | | 转寄

10-04 长老教会重返WCC

作者 陈金兴 2012.04.29

1970年国民党政府koh-khah强烈要求长老教会退出WCC，并出言威胁：「Lín若m̄退出，后果会真严重。」对这种讲法，教会内部意见无仝。长期白色恐怖之下，小khoá违背国民党政策ê，轻者被捕落监，严重者被枪杀ê，满满是。

因此，针对WCC一案，反对者大部分m̄敢公开表明；偏向政府ê教会领袖，势力真正大。1970年3月30日tī台南神学院召开台湾基督长老教会第17届总会会议，beh koh改选议长。因为政府当局强力要求总会退出WCC，真chē议员（牧师kap代议长老）担心会受tio̍h当局ê特别「照顾」，m̄敢去参加会议。何况，因为WCC chit-ê hō͘人真歹剃头ê烫手山芋，koh-khah是无人敢担任议长，所以hit-pái会议因为出席人数未达到法定要求，soah致使流会。

总会委员会真紧tō开会决定下回开会ê日期kap地点。为tio̍h chit-ê tāi-chì，谢纬tī当年3月31日ê日记顶面按呢写：「总会成立以来，siōng bái、siōng见笑ê场面，真正遇tio̍h了」。他为tio̍h总会「流会」chit件代志，一直自责，感慨万千：「身为总会议长，真正感觉家己一定tio̍h负起责任。」这mā致使已经任满议长一年teh-beh卸任ê谢纬，只好「续任」到仝年ê 7月底。

谢纬tī他有生之年，维护了长老教会ê主权kap尊严，mā用他坚定ê信仰立场，保tiâu总会tī WCC组织ê席位。但是，台湾基督长老教会总会无法度忍受政府ê压力，tī谢纬过往了后，犹原被迫退出了WCC。谢纬ê日记只写到1970年4月17日，所以，咱m̄知他遇难chìn前，是m̄是有来自当局 koh-khah大ê压力，kan-ta知影tī下chi̍t回会议前无偌久ê 6月17日，谢纬就因为车祸来意外身亡。

总会议长谢纬过往了后，由副议长高俊明牧师暂代议长职务。仝年7月30日tī淡江中学召开总会年会两工，由高俊明主持会议。依照议程，WCC ê讨论，排tī khah后壁。高俊明原本准备到时呼吁：「Chit-ê tāi-chì属tī信仰问题，咱是一个个宗教团体，bē-sái为tio̍h政治理由，受政治压迫来退出WCC。」高俊明希望ē-tàng清楚表白chit-ê立场，m̄-koh是m̄是会被接纳，高俊明并无把握。

会议开始了后，高俊明tú好有重要ê代志，必须「离开议场」私下kap别人商量，所以拜托副议长刘华义牧师代替主持会议。当高俊明chi̍t-ē离开，随时有人临时提议，ài kā后面议程中ê「退出WCC案」，提前讨论。提议通过，就随时开始讨论。当时偏国民党ê议员叫大家举手赞成退出，in极力表示目前教会ê处境已经非常危险，若无退出，后果将不堪设想。

Chit ê案就án-ne真紧通过。当高俊明tńg来到议场ê时，知影chit款情形，非常痛心，他讲：「Hit时chūn，我感觉政府实在真gâu用一koá奇奇怪怪ê手段」。Tùi án-ne，1970年7月30日，台湾基督长老教会退出WCC。直到10年后 (1980) chiah重返 WCC。