《台湾另类牧师．医师―谢纬》

 | | | 转寄

10-03 长老教会被迫退出WCC事件

作者 陈金兴 2012.04.22

「普世教会协会」（World Council of Churches ,WCC）是全世界siōng大ê基督教组织，tī 1948年成立，当时已经有五亿ê基督徒成员。台湾基督长老教会认同普世教协ê神学观点，1951年加入成做会员，mā是台湾唯一ê会员。因为普世教协规定，信徒五万人以上ê教会组织，chiah有资格入会。当时，除了长老教会，台湾并无其他教派ê人数超过五万人。

六○年代了后，中国共产党渐渐得tio̍h中国人民ê支持，并成做军事强国。WCC认为，一个国家人口chiah-ni̍h-chē，武力koh chiah-ni̍h强，无应该被排除tī国际社会之外，若无将它纳入联合国，以国际规则约束，将对世界ê公义kap和平，造成负面ê影响kap极大ê威胁。因此，WCC建议联合国，许可中国入会。

国民党政权对这点感觉十分不满，而且指责WCC「容共」，并要求长老教会退出chit种「容共团体」。当时，tī以「杀朱拔毛、反攻大陆」为基本国策ê时代，in透过报纸等种种媒体，讲WCC是容共、拥共，长老教会是WCC会员，mā是容共、拥共，形同叛乱团体。国民党政府利用媒体，发动攻击，来压迫长老教会退出WCC组织。但是长老教会认为，全世界ê基督徒拢是一体ê，有ê生活tī自由世界，有ê生活tī共产主义统治之下。教会关心所有受苦ê基督徒，mā关心中共统治下，受压迫ê基督徒。长老教会一再向国民党政府解释立场，但是in拒绝接受。

面对一连串政府压迫长老教会退出WCC ê事件，担任长老教会总会议长ê谢纬，以一贯「甘愿做戆人」ê精神，继续kap政府周旋、协商，去做无人愿意做，但是koh siōng需要有人去做ê代志。事实上，面对国民党政府对长老教会一再ê施压，强烈要求总会退出WCC chit件事，确实hō͘ 身为议长ê谢纬，陷入天人交战ê情境中间，也thang讲是他一生中siōng挫折kap无奈ê时刻。

1969年7月31日，担任议长iáu-boē半年ê谢纬，tī他ê日记顶面按呢写：「最近真正感觉家己ê能力、生命ê界限、人ê一生，是上帝所安排ê，hō͘ 咱无法度预测。M̄知影是什么原因，hō͘ 我感觉我ê人生终点，一工一工迫近tī目chiu前。」

谢纬感觉若无WCC事件hō͘ 他操烦，他就ē-tàng非常自由、快乐前往各地从事他ê医疗救人工作。Mā就是讲，toh位有急诊，他就ē-tàng随时行动，甚至改变原来ê既定行程，因为，「救人第一」是他ê基本原则。

虽然án-ne，谢纬并无逃避他ê议长责任，他犹原勇敢面对所有挑战，以坚决ê意志，温柔ê态度，希望ē-tàng「圆满」解决chit-ê 事件，同时mā ē-tàng捍卫长老教会ê主体性。虽然对政治无兴趣，但是考虑tio̍h kui-ê台湾教会ê前途，他开始kap政府官员互动。为tio̍h做好教会kap政府之间ê沟通桥梁，谢纬时常自我反省，而且不断祈祷。