《台湾另类牧师．医师―谢纬》

 | | | 转寄

10-02 谢纬被推选做第16届总会议长

作者 陈金兴 2012.04.15

1967年1月24日，谢纬tùi台中中会议长卸任，改任中会第37届中委。过了一年，1968年2月11日长老教会召开总会，chit工beh改选议长kap副议长，谢纬ê名出现tī副议长ê候选名单中间。他为着bô-ài被选做副议长，所以thiau-kò͘-ì 无去参加会议，透早就到埔里去巡回看诊，当时他ê心内感觉真轻松自在。

但是，hit暗beh困ê时，却接tio̍h孙鸿沂牧师ê电报，告知谢纬已经当选总会第15届副议长，ài他赶紧去就任。Chit时ê谢纬，心中pi̍k-pho̍k-thiàu，他想beh chhoē理由推辞chit项职务。因为若现在接落副议长ê工作，就下一届他一定tio̍h担任议长，若按呢，他就会koh-khah无闲，致使影响tio̍h他ê医疗宣教事工。因此，第二工他用书面ê方式，说明他bô-ài去就任ê理由kap决心，并委托南投教会林钋寿长老将批信带去总会。

M̄-koh，hit工beh暗á，他ê大姐谢琼、林钋寿长老、钟子时牧师以及孙鸿沂牧师娘lóng khà电话hō͘ 谢纬，劝他应该顾到台中中会ê「面子」，tio̍h去就任总会副议长ê职务。隔工，谢纬去二林看诊ê时chūn，koh接tio̍h孙鸿沂牧师ê电话，孙牧师一直拜托他去就任。经过kúi-nā pái ê推辞，结局ke̍h bē kòe众人ê好意kap热情，谢纬只好答应接落chit份职务。

Chit-ê时chūn，虽然已经妥协，但是他心中实在是无比ê滚绞：「我无欢喜做ê代志，kah-ná一步一步teh踏入去，这m̄知是上帝ê旨意，抑是我家己ê软chiáⁿ。我感觉beh讲 “ No.” 真困难。」


● 第15届总会议长黄加盛(右)、副议长谢纬(中)、书记高俊明(左)。

就tī谢纬ê副议长任期届满chìn前二礼拜，包括台中中会ê议长、总干事以及真chē牧师就开始「劝进」他竞选总会议长ê动作。但是，谢纬koh再详细考虑了后，他感觉应该对上帝忠实chiah-tio̍h，因为家己无感觉有chit份负担，他所想ê，是他ê医疗传道使命，所以无想beh担任下一届议长。

Chit ê消息chi̍t-ē传出来，包括中会议长、牧师，南投县长林洋港lóng去拜访谢纬。甚至，连国民党中央党部mā透过县党部主任秘书，来苦劝谢纬出任总会议长。1969年2月3日，谢纬虽然koh一pái「thiau-kò͘-ì」缺席总会会议，但是，他犹原被推选做台湾基督长老教会总会第16届议长。Chit层事hō͘ 他踌躇真久，心中开始有真大ê争战，对牵手讲：「In一直叫我去，beh按怎khah好？」杨琼英对他讲，既然去hō͘ 人选tâu，就应该去就任。所以，虽然m̄是出tī本身ê意愿，谢纬为tio̍h beh hō͘ 代志「khah圆满khah好」，tùi án-ne，他路尾亦是去赴任总会议长―谢纬thang讲是去hō͘ 人强sak出来ê。