《台湾另类牧师．医师―谢纬》

 | | | 转寄

4-03 谢纬kap杨琼英结婚

作者 陈金兴 2011.09.04

1921年出世ê杨琼英，老父杨云龙是眼科医师，tī台南市民权路家己开业。老母吴顺规，是谢纬老母吴上忍ê小妹。细汉ê时，杨琼英bat跟(toè)老母到南投拜访阿姨，当时就已经见过谢纬。M̄-kú 了后m̄-bat koh再联络，对伊mā无特殊ê感觉，kan-taⁿ知影有一位比家己khah大5岁ê表兄若定(nā-tiāⁿ)。

杨琼英tī 1933年tùi台南州「末广公学校」毕业了后，就到日本读「惠泉女学园中学」。毕业了后，因为伊感觉替病人服务真正好，就kap tó-sàng(老父)讲伊想beh去考护理学校。但是杨云龙soah讲：「bē-sái，你tio̍h去考医学院。」杨琼英就乖乖á去考，考tiâu仝款tī新宿区ê「东京女子医学专门学校」(今东京女子医科大学)，toà在学校宿舍，1943年毕业，但是伊对护士ê服务工作犹原有兴趣。

1942年左右，tī留日家族ê聚会里，杨琼英kap谢纬koh相tú。Tú开始ê时，两ê人kan-taⁿ恬恬观察对方。杨琼英对谢纬ê印象真好，因为伊真会晓照顾 kha̍h oàⁿ 到日本读书 ê表兄弟姐妹，而且受过牧师养成教育ê谢纬，讲话真实在，所以杨琼英感觉谢纬是一个真有爱心koh真有责任感ê人。

谢纬毕业无 joā 久，就去静冈县松崎伊 ê 表哥汪同文医师 hia 斗相共(tàu-saⁿ-kāng)，tī-hia 伊koh再 tú tio̍h 杨琼英。 谢纬ê＜在所不辞＞一文中有按呢写讲：「我踏入亲戚ê厝ê时chūn，第一个意外就是看tio̍h我ê表小妹。自从到日本以来，我就bat见过伊，但是kan-taⁿ是
tìm-thâu相借问nā-tiāⁿ，bô-gî-ngō͘
伊已经大汉成做一位美丽ê淑女 la̍h…。」 (由左至右:谢纬、杨东杰、杨琼英)

叶官mā感觉谢纬kap杨琼英若ē-tàng成做夫妻( ang-á-bó͘ )，thang讲是「天作之合」，就主动为两人传讯息。M̄-kú过无 joā久，谢纬认为犹是直接kap杨琼英面对面交谈khah好，所以就主动约杨琼英出来见面。经过几nā pái ê交谈了后，彼此lóng留落美好ê印象。结婚chìn前，谢纬bat问杨琼英，结婚了是m̄是会放弃医学来照顾家庭？杨琼英表示伊会。谢纬知影家己beh行ê路，是非常不容易ê，mā会有真chē荆棘(chhì-phè)，伊问杨琼英，m̄知伊有法度担当无？杨琼英讲有。Tùi án-ne， 1944年4月30日tī南投教会kap台南太平境马雅各纪念教会ê礼拜中，同时向会友报告in两人teh-beh结婚ê 消息，当做是订婚（当时教会内规是要连续三周“唱礼拜”，没人异议才ē-tàng订婚）。

原本厝内ê人希望in tńg来台湾了后chiah结婚，m̄-kú当时战争已经进入尾声，情势真乱，担心m̄知tang时chiah ē-tàng tńg来到台湾，所以就tī双方家长ê同意之下，谢纬kap杨琼英tī 1945年11月17日结婚，由中江英树(汪培英1878-1949)牧师证婚。






In ê结婚誓言án-ni写： 「我ê爱情求主助，爱(thiàⁿ)你赢过全世界，taⁿ我立志献家己，永永专专归hō͘ 你。」谢纬kap杨琼英两人tī每年ê结婚纪念日，lóng重新亲笔将誓言过抄，来表白两人对tī爱情ê专一无变。