《台湾另类牧师．医师―谢纬》

 | | | 转寄

8-01 盐乡ê乌脚病

作者 陈金兴 2012.01.01

时序进入1960年，谢纬tī埔里山区起肺病疗养院，并担任基督教山地病院院长，koh tī埔基护校任教，iáu tio̍h兼顾南投大同病院ê业务，有时mā应邀tī礼拜日讲道 á 是开会，已经非常无闲。Chit时koh接受一项特别ê任务kap挑战，就是谢纬将伊ê医疗触角延伸到海边，用伊hit双非常有价值ê双手，tī台南县北门乡替贫苦无助、痛苦无依ê乌脚病患者进行截肢手术，对按呢嘉惠了上千名ê患者，koh一pái为台湾医疗史记录光辉ê一页。

● 医治乌脚病ê铁三角

1960年美国宣教师，基督教芥菜种会ê创办人孙理莲为tio̍h救助乌脚病患，tī台南县北门乡买地，设立「北门怜悯之门免费诊所」（Pak-mn̂g Mercy’s Door Free Clinic），免费医治kap照顾病患。孙理莲负责募款；北门乡当地医师王金河tī免费诊所看诊以及照料病患；南投镇ê谢纬医师义务为患者开刀。对按呢，一位美国人kap二位台湾本土医师tī偏远ê滨海地区从事医疗慈善事业。Chit三ê人被称做医治乌脚病患ê「铁三角」。In中间，谢纬kap王金河两位医师bat分别得tio̍h立法院「厚生基金会」ê第二届（1992）kap第七届 (1997)「医疗奉献奖」。

● 盐乡怪病

台湾早tī日治时代ê 1906年tō发现乌脚病 (black foot disease)， 但是案例无chē。到了五○年代chiah开始大流行，其中koh以嘉南沿海一带ê布袋、义竹（嘉义县）、北门、学甲（台南县）四乡镇siōng严重，对当地居民有真大ê威胁。1953年kan-ta八掌溪下游一带ê乌脚病患者就有533人，全台各地mā有bē少ê案例，但是无被重视。1956年台南县安定乡复荣村居民发生chit种怪病，当时全村553人中间，有490人出现皮肤有角化现象，比例达九成以上。

Chit-ê tāi-chì透过新闻报导了后，省卫生处以迁村为对策，kā kui-ê村搬到距离复荣村大约2~3公里外，另外建立一个新ê村，名叫大同村。Chit时chūn，chiah引起医界kap学者，亲像台大医学院叶曙教授、陈拱北教授、曾文宾教授、连倚南教授等极度ê重视kap关切，积极投入研究ê行列，发掘病源，规划防治措施。

为tio̍h防止疫情扩散，建议政府设法做具体有效ê改善，医疗行动chiah j热烈展开。除了早期「旧流行区」以外，陈拱北调查乌脚病ê流行情况了后，发现koh有新ê流行区，亲像台南县ê盐水镇、新营市、安定乡kap其他西南沿海乡镇mā发现有乌脚病患。Chiah-ê流行地区ê lim水tī过去lóng用深井水，直到1978年全面改做水道水了后，乌脚病疫情chiah渐渐得tio̍h有效ê控制。

台南县ê北门乡，以前被称做「北门屿」，到1945年chiah改名北门。因为倚海，土地盐分非常高，水源有限，而且浅水井因为水质过头咸，无适合hō͘ 人kap牲畜(cheng-seⁿ) lim食，所以，in引进挖掘深井（koh称地河井）ê方法。

讲到乌脚病ê症状，根据患者描述，病发ê时ná老鼠teh啮(gè 啃)脚，脚趾头á 与手趾头á会反黑、溃烂、发炎，mā会发出一阵阵ê臭味。病情万一恶化，唯一治疗ê方法，就是手术切除患部。因为真臭，厝内ê人lóng m̄敢倚近，甚至有人kā患者 hiat tī厝内，远走他乡一去不回。真多患者因为生活无人照顾，有人自杀。