《台湾另类牧师．医师―谢纬》

 | | | 转寄

7-06 尊重生命ê护校老师

作者 陈金兴 2011.12.25

山地中心诊所ê原住民患者chhoē到无够额ê护士thang来kā in照顾，hia ê医疗人员mā严重欠缺，in彼此中间ê话语koh无相通。Tī chit款情形下，谢纬kap孙理莲参详了后，为tio̍h beh栽培护理专业人才，koh解决因为语言、风俗kap生活习惯无仝来产生ê沟通问题，就决定开办护士训练班，招收初中毕业ê原住民少女来读2年ê书。

Tùi án-ne，该中心诊所tī 1958年2月tī埔里基督长老教会设立了「埔里基督教山地护理训练班」，后来名称改做「埔里基督教病院附设护理学校」（简称「埔基护校」），并且聘请卢坤山医师、潘启扬医师kap谢纬同齐担任chit间学校ê讲师。

谢纬到埔里除了tī肺病疗养院kap山地病院门诊部替患者看病、开刀以外，当埔基护校成立ê时，伊to̍h开始教传染病学、精神医学、复健矫正学、细菌学、生理解剖学、寄生虫学kap药物学。谢纬上课ê时，tī黑板面顶kut-la̍t写、打拚画，真认真教书，无joā致意学生是m̄是专心斟酌teh学习。伊ê华语无真标准，koh参杂tio̍h日语，以及日本腔口ê英语teh上课，常常致使chiah-ê惯势山地腔华语ê学生，听kah「雾煞煞」，但是伊iáu是无嫌费气讲到下课，了后koh随时去看诊。

埔基护校ê课程为期二年，毕业ê学生就留tī病院做护士，无toh派到大湳肺病疗养院去服务。谢纬除了tī课堂上讲授医学课程以外，mā常常以实务教导学生按怎处理急救ê病人，包扎孔嘴以及注射。Tī开刀房为患者手术ê时，谢纬就kā在场协助ê五、六位护士解释各种手术器材ê用途。

埔基护校第一届毕业生ê史惠贞，bat担任过谢纬开刀时ê助手。伊讲，有一pái当伊kap谢纬「上刀」ê时，bat kap另外一位护士偷偷á teh开讲，koh学谢纬开刀ê面chhiuⁿ kap动作，结果无小心soà the̍h tio̍h m̄-tio̍h ê 剪刀。谢纬随时将m̄-tio̍h ê手术刀hiat tī土脚，别ê护士随时赶紧 koh the̍h正确ê剪刀hō͘ 伊。


等开刀息，谢纬叫in入去伊ê办公室，对in讲：「病人tī咱ê手中，任何ê动作lóng bē-sái têng-tâⁿ ê……chit项事bē-tàng hòng-hòng。一旦入去开刀房，病人宝贵ê生命就掌握tī咱ê手里，设使tī开刀ê过程我若有疏忽ê所在，lín护理人员mā有责任提醒医生，因为，咱ê工作lóng仝款重要。」

这是谢纬尊重生命ê态度。


护校ê学生来自台东、花莲、宜兰、台北、桃园、新竹、苗栗、台中、南投、嘉义、高雄kap屏东各地ê原住民，包括泰雅尔族、太鲁阁族、赛夏族、布农族、邹族（当年称曹族）、阿美族、排湾族、鲁凯族、卑南族kap客家、汉人共172人（170名女性、2名男性）。Chit间学校因为siūⁿ 过偏远，师资kap设备koh不足，tī 1973年beh申请立案无通过soà来停办。总计tī 15年中间，办了12届，拢总有151名护士毕业。