《台湾另类牧师．医师―谢纬》

 | | | 转寄

7-05 谢纬ê双手真有价值

作者 陈金兴 2011.12.18

自1955年10月起，谢纬就开始tùi南投镇到埔里镇为原住民义诊。孙理莲bat讲：「谢纬ê手实在太有价值lah」。伊讲chit句话ê意思，表明谢纬ê手是beh为病人开刀， m̄是用来驶车ê。所以，为tio̍h无欲hō͘ 谢纬过头操劳，tī伊41岁生日ê 1957年3月2日hit工，病院特别买一台红色ê吉普仔车hō͘ 病院kap伊使用，mā聘请一位司机，名叫做张辉坤。



●陪伴谢纬tī埔里山区nǹg来nǹg去从事医疗ê埔基「红车」，tī 1975年功成身退。




真无闲ê谢纬为tio̍h患者ê需要，tī南投kap埔里两所在走chông。伊一方面为病人开刀，一方面又koh是护校ê讲师，需要kā学生上课；有时chūn参加会议，暗时mā常常去替无方便到病院就医ê患者khiā家「往诊」。

1964年3月初4 ê日记顶面有按呢记载讲，hit工伊早起tī埔里上课二小时，十二点goā kap司机tī镇内ê路边摊吃中昼，然后到鲤鱼潭疗养院看诊，下晡二点为病人开刀。手术完，koh外出往诊。暗时八点二十分tī爱兰教会开会到九点半chiah起程tńg去南投镇，十点五十分到厝里。大同病院已经休诊，chit时chūn soà有人来chhi̍h 电铃，谢纬就kā患者看病，续落来koh出外往诊。

谢纬每pái beh替病人手术ê时，一定lóng会代先祈祷。因为惊讲电火无够光，koh再由工作人员提蕃仔油灯(煤油灯)来照，伊真注意手术间各种设备ê安全以及对病人手术了后负责任ê态度。3月初9这chit工，谢纬tī埔里替病人手术toā-ām-kui (甲状腺肿大)。Teh手术ê时，m̄知是绑ê线lēng去，á是其他问题，病人ê血一直choāⁿ出来，伊赶紧重新处理khang-chhùi，chiah止血。但是，到暗时十点半，埔里ê护士khà电话hō͘ 已经tī南投厝里ê谢纬，讲病人koh有状况，伊随时tùi南投赶去埔里处理。Hit暗koh再tńg来到南投ê时，已经teh-beh半暝二点。