《台湾另类牧师．医师―谢纬》

 | | | 转寄

8-02 乌脚病患ê福音

作者 陈金兴 2012.01.08

王金河(左)kap谢纬仝年 (1916) 出世，1941年tùi东京医学专门学校毕业，是谢纬ê学长。

但是，自学校毕业了后，就各奔前程，无koh联络。当in sûi-lâng tńg来到台湾将近20年了后，因为同齐帮赞乌脚病患chiah koh作伙。1944年，王金河tńg来到穷赤koh偏僻ê故乡北门开设「金河诊所」，伊是一ê基督徒医生，mā是北门乡当地唯一ê医生。


1960年3月27日，日本神学大学教授法兰克林博士 (Dr. Franklin) 由台南神学院吴振坤教授陪同，来到北门关心乌脚病患者。Hit工，王金河带法兰克林去看一位名叫王营ê患者，伊m̄-nā chheⁿ-mê，koh做过乞丐。当时伊kah一领破糊糊ê棉被，倒tī厝内臭giâ-giâ ê大厅里。王金河掀开王营ê棉被，发现有几nā百只ê礐仔虫(ha̍k-á-thâng蛆) tī伊hit支已经孵脓(pū-lâng) ê脚指头kap小腿teh sô teh nǹg ，王营是痛到haiⁿ bē soah 。

亲目看着chit-ê情景ê法兰克林，离开王营ê khiā家就问王金河，对tī chit种症头，政府是m̄是有甚么机构teh照顾？北门屿 教会本身对乌脚病患是m̄是有甚么措施？王金河ìn伊讲，当时政府有委托台湾大学teh做研究，台大病院提供六床免费病床来医治乌脚病；讲到北门屿教会，因为是旧年9月chiah设立ê，iáu属起步阶段，所以对tī乌脚病患mā iáu boē开始关怀。法兰克林听完，吐chi̍t-ē气，讲：「台湾ê教会kah-ná iáu teh困。若是主耶稣chit时来到台湾，伊一定会先来chia看顾、安慰chiah-ê乌脚病患ê。」

Tī实地了解状况ê法兰克林，tńg去了后tō随时写一份报告书，讲述伊亲目看tio̍h乌脚病患时ê心中感触，以及伊对tī chit种怪病tī当地seⁿ-thoàⁿ 想欲处理ê建议，并将chit份文件分别寄hō͘伊认bat ê朋友kap各慈善机构，将chit ê消息传播出去，来chhoē求奥援。

Tī台湾各地已经从事社会慈善事业真多年ê孙理莲，知影了后，tī 4月初7随时kap台湾大学医学院教授董大成、张凯贤等人前往北门关心，这是王金河第一pái见tio̍h孙理莲。王金河带孙理莲一阵人到乌脚病患ê厝内探访，深入了解病患ê症状以及生活状况了后，孙理莲对王金河讲：「你是基督徒，mā是医生，你认定有需要toà院治疗ê乌脚病患，我lóng 欲收容，送in到大病院医治、手术、装义肢，等复建了后，koh再kā in送tńg来，一切lóng免费。」

王金河心内teh想，ná 有chiah-ni̍h好khang ê代志？虽然伊有kā孙理莲soeh-ló͘-la̍t，但伊并无kā chit件代志khǹg tī心上。M̄-kú ，一礼拜后，真正照所讲ê，孙理莲将乌脚病患者王营、王品、洪水龙kap洪掌四人送往屏东基督教病院治疗。

话讲倒转来，chit种当患者病情恶化需要toà院治疗ê时，tio̍h ài往南送到屏东医治，á是北送彰化基督教病院就诊较适当实在tio̍h ài考虑，因为两地m̄-nā路途拢真遥远，患者koh可能会因为延误就医来丧命。因此，孙理莲心中出现了欲按怎进一步帮助乌脚病患ê念头，乌脚病患者ê医治，总算显露出一道希望ê曙光。