《台湾另类牧师．医师―谢纬》

 | | | 转寄

8-04 北门行脚 来去匆匆

作者 陈金兴 2012.01.22

免费诊所正式开办了后，谢纬固定安排tī每礼拜四下晡替患者开刀，其他ê 时间若有病患需要进行截肢手术，无论是thàu风落雨，伊mā是随时前往义诊。6月18日伊为乌脚病患王品开刀，这是此间免费诊所第一pái替病人手术。

50冬前，免费诊所ê医疗器材无齐全，手术房无冷、暖气，其他设备mā真简单。起初王金河用一片材床当做手术台，过chit-chām了后，chiah由一位美国外科医师照伊ê遗愿，捐赠一座正式ê手术台。

因为金河诊所只有一、二位护士，脚手不足，所以当谢纬替病人开刀ê hit一工，伊会家己tùi南投带护士、助理以及手术用ê器材、消毒过ê药纱布同齐前往北门。包括谢纶kap助手刘敬成等医护人员，早起10点 goā kap谢纬同齐坐计程车tùi南投镇出发，路中tī嘉义市歇困食中昼。接近下晡2点chiah来到距离南投镇约150公里ê北门乡，开始谢纬接续落来ê诊疗工作。

谢纬到免费诊所了后，lóng会代先巡视 toà院kap teh等门诊ê患者，亲切kap in请安、安慰。了后lim一杯茶，就行入克难式ê开刀房，khiā-teh工作五、六点钟。往往开刀到三更半暝，tńg来到南投ê时，已经是隔tńg工一、二点。谢纬除了为乌脚病患截肢以外，iáu替列做贫户ê盲肠炎、脱肠、痔疮……等病人开刀。患者每礼拜平均差不多五名，有时达到十二ê人。


对tī乌脚病患因为当时医疗技术ê限制，必须截肢，感觉真无奈而且怜悯ê谢纬，tī 1964年1月初4 ê日记中，表露出伊ê痛心： 「今仔日beh去北门，连续三日lóng无tī厝，感觉真thiám。但是，北门有三个乌脚病ê病人tio̍h截肢，最近感觉án-ne做kah-ná是teh破坏身躯，真无愿意án-ne做，但是koh无新ê治疗法。这是一件对患者好ê tāi-chì，但是我ê内心感觉真失礼，我ê行为kap我ê内心有争战，切断脚koh bē koh生出来。若是二只脚lóng切掉，感觉非常悲惨，所以我一直teh想，kám无其他新ê治疗法。七点工作结束，koh tī-hia同齐食晚顿，tńg来到南投，已经10点40分。」

1月30日，又koh到了谢纬前往免费诊所ê日子，hit工早起beh出门chìn前，发现家己ê大便是黑色ê。原本想歇困一工，但是伊想tio̍h有病人等伊去手术，所以伊iáu是去北门。隔工ê排便犹原是黑色ê，谢纬家己诊断，应该是十二指肠溃疡。