《台湾另类牧师．医师―谢纬》

 | | | 转寄

8-05 为主甘愿做戆人

作者 陈金兴 2012.01.29

2月20日，谢纬 tī 北门为乌脚病患手术，切除七位病人ê脚， koh 真感慨讲：「kám讲无根本 ê 治疗方法？」虽然截肢m̄是根本 ê 办法，但是彰化沿海各乡镇，犹原有真多患者欲进入「怜悯之门」来接受治疗。

谢纬 án-ne 拚命为乌脚病患服务ê精神，实在感动真 chē人。 M̄-koh，当年陪谢纬同齐前往北门ê谢纶，却谦虚讲：「阮 kan-ta 一礼拜去替患者开刀一 pái，无算什么。阮开刀了后就 tńg来南投， chhun 落来照顾病患 ê khang-khoè， lóng 落 tī 王医师夫妇身上。王金河医师被称做「乌脚病之父」，一点 á lóng 无超过。因为当时有芥菜种会募集经费， koh tú 佳哉北门屿当地有一位愿意斗脚手 ê 基督徒医师王金河，免费诊所 chiah 会得 thang 成立， hiah-ê 患者 chiah 有机会接受医治 kap 照顾。」

Chit 种完美ê组合，谢纬夫人杨琼英mā讲：「这真正是上帝美好ê安排。」 mā 就是讲，医治乌脚病 ê 这「铁三角」， tī 北门怜悯之门免费诊所 ê 经营上，每一个「角」，lóng 是 bē-tàng 欠缺 ê。

除了为病人开刀以外，谢纬 mā 真关心北门屿教会传道师 ê 生活。1964年9月中，伊 bat 问当时驻堂ê传道师谢薰芳， tī 传道工作上有遭遇甚么困难 bo͘h ？谢薰芳 ìn 伊讲，无论是探访 tī偏僻庄头 khiā 起 ê 会友，或是去访问退院 ê 患者， lóng tio̍h 靠行路，hō͘ 伊 tī 时间 kap 体力上，lóng 感觉有一点 á 力不从心。谢纬听完，后礼拜 koh 去手术ê时，tō 拿一千 goā 元， hō͘ 谢薰芳买一台铁马骑。

另外，北门屿教会ê会友，大部份 lóng 是散赤 ê，经济 khah 困难，无法度负担传道师年终二个月 ê 慰问金 ( 计二千元 )。谢纬知影 chit-ê tāi-chì 了后，tī 后礼拜去北门ê时，koh chah 二千元 hō͘ 谢薰芳做年终奖金。

1970年5月23日，谢纬 kap 夫人杨琼英同齐前往北门，参加免费诊所创办10周年感恩礼拜，并以「为主甘愿做戆人」为题证道。