《台湾另类牧师．医师―谢纬》

 | | | 转寄

8-06 孙理莲 kap 王金河中间 ê 误会

作者 陈金兴 2012.02.05

因为孙理莲人 tī 台北，所以将免费诊所 ê 行政 kap 财务管理 lóng 交 hō͘ 王金河负责。有一 pái，因为西德药厂赠送一批药剂 ê关税问题，hō͘ 王金河 kap 孙理莲中间产生误会，「怜悯之门」mā 差一点 á 遭遇 tio̍h 停办 ê 命运。

1966年6月初1，孙理莲雄雄khà电话hō͘ 谢纬，讲北门免费诊所ê工作beh停止，叫伊隔工m̄免去北门lah，理由有真chē，其中一项就是她kap王金河ê意见bē ha̍h。谢纬讲完电话了后心想，chit二位lóng是为tio̍h上帝teh工作，现在却为tio̍h一点á意见bē ha̍h，就beh中止chit-ê事工，伊感觉真可惜，认为免费诊所ê工作敢采(kiám-chhái)会当停止，但是hiah-ê患者ê病痛，却是无办法中止ê。

为tio̍h chit件事，伊khà电话kap董大成教授连络，但无得tio̍h真好ê解决办法。伊感觉tī北门chiah-ni̍h偏僻ê所在，iáu有chiah-ni̍h-chē人欲去hia就诊、手术，是一件真无简单ê事，这表示免费诊所ê服务，得tio̍h病患kap家属ê信任。一旦chit-ê事工beh随时取消，伊无办法忍受。Tùi án-ne，伊kā chit件tāi-chì khǹg tī祈祷ê中间，求上帝帮助，看有什么办法thang koh再继续。

隔工，谢纬照常到北门，去为二个乌脚病患kap脚趾头有癌症ê人动手术。而且伊决定，为tio̍h hō͘ chit-ê有意义ê工作ē-tàng继续落去，伊一定beh尽力做王金河kap孙理莲之间ê和解者。

Tī北门ê王金河mā接tio̍h孙理莲ê电话，孙理莲真怒(siū)气表示因为王金河侵占芥菜种会ê钱，所以beh将免费诊所关起来，讲完就挂断电话。王金河为tio̍h beh清楚了解状况，koh khà电话hō͘ 孙理莲，却lóng无人接听。无故被指责，hit暗伊就坐夜快车去台北，等了两工，孙理莲á是无愿意见伊。Tùi án-ne，满腹冤屈ê王金河就到南投kap谢纬诉苦。谢纬kā王金河讲，伊相信这一定是一个误会，ài王金河mài急，mài siū-气，tio̍h祈祷，一切信靠上帝。

经过谢纬tī王金河kap孙理莲二人中间进行沟通kap了解了后，chiah hō͘ 真相大白。

原来，西德药厂有生产一种用tī末梢血管扩张ê新药（Complamin），并将chit种药剂寄hō͘ 台大病院做人体试验使用。台大病院认为chit种药剂若hō͘ 乌脚病患使用，应该ē-tàng减轻in ê痛苦，tùi án-ne就原封不动交hō͘ 免费诊所使用，这批药剂ê关税是台大病院负担ê。

王金河感觉chit种药剂ê效果真好，当这批药剂已经使用完，就向台大病院koh再申请第二批药剂，并建议由西德制造商直接寄到免费诊所。M̄-kú ，这批药剂是必须缴关税chiah ē-tàng提领，王金河就代先家己纳税了后，chiah向芥菜种会请款。但是，tī台北ê孙理莲只知影台大病院bat赠送一批已经付完关税ê药剂，却m̄知影有第二批药剂ê事，就认为王金河ê请款是为tio̍h图利家己，虽然她有派员到北门了解，但是，iáu未详细查证就想beh关闭免费诊所。