《台湾另类牧师．医师―谢纬》

 | | | 转寄

8-07 谢纬化解免费诊所关门ê危机

作者 陈金兴 2012.02.12








Tùi án-ne，谢纬写信hō͘ 孙理莲，表示家己已经kap王金河谈过相关ê问题。伊感觉有chit koá tāi-chì必须ài说明清楚，chiah ē-tàng化解in二人之间ê误会：

第一、谢纬bat前往会计处查阅帐簿，感觉一切lóng无问题。免费诊所teh处理外界捐款方面，mā真清楚。但是，问题在tī in无hō͘ 孙理莲看会计报表chiah产生误会。若芥菜种会需要，in会kā报表，包括过去到现在ê，全部lóng交hō͘ 她。

第二、tī建筑新院舍ê时，王金河in有更改计划，khàm khah贵ê厝顶，chiah增加总支出。Tī工程进行期间，王金河向外界募集十二万元，其中二万元指定beh购买药品，mā已经买，chhun落来十万元。In向芥菜种会ài四万元，但十四万元并无够所有ê建筑费用，无够 ê费用lóng由王金河支付。

第三、免费诊所ê员工反应，in感觉芥菜种会ê专员去视察ê时，除了无详细公平检视以外，伊ê态度就kah-ná是主人对待奴仆一般， hō͘ 北门ê人感觉hit位专员不如孙理莲ê友善。Koh讲，当孙理莲到北门ê时chūn，免费诊所ê工作人员想beh单独kap伊讲话ê时，不时hō͘ 芥菜种会ê人阻挡，或是孙理莲无时间。In想beh有koh-khah chē ê时间kap她谈话。

第四、王金河医师非常希望孙理莲ē-tàng继续乌脚病ê医治工作，若她反对王医师继续留tī免费诊所，伊愿意离开。谢纬感觉王医师用了真chē家己ê钱tī工作上，但是伊却表示为tio̍h无欲妨害免费诊所ê运作，愿意全部放弃。这就thang 看出伊非常看重chit-ê工作，所以谢纬感觉孙理莲应该hō͘ 王金河继续tī这个工作上付出。

了后，王金河koh一pái去台北。当伊tī火车顶ê时，就一直祈祷，祈求主赐hō͘ 伊一粒 「冷静」ê心。到了芥菜种会事务所，孙理莲kap董大成已经tī-hia thèng候。伊对孙理莲讲：「你是头家，我boeh尊重你。但你是慈善家，á我是医生，tī医学方面，我有我ê专业。另外，你交代十分，我做十二分，我将免费诊所ê工作，当做家己ê事业teh做。我bē晓做出失礼上帝ê事。」

经过和平使者谢纬ê chhiâu-chhek（斡旋）了后，m̄-nā消除孙理莲ê愤怒kap误解，同时mā洗清王金河ê冤屈，增进两人之间ê了解， hō͘ 「北门免费诊所」会得thang渡过面临关门ê危机，继续经营。

两年了后，谢纬回想chit段往事ê时，tī日记顶面按呢写： 「…古早人讲『人生kah-ná梦』，真正感觉是án-ne。想当初设立chit-ê北门诊所，买土地kap建设方面有种种困难，我kap王医师lóng同齐来挑战chit件事。Koh来就是王医师kap孙牧师娘之间有一koá误会，最后有排解。到taⁿ一koá真快乐ê事、痛苦ê事、悲伤ê事tī我ê脑海里tńg-se̍h。Ǹg望通过chiah-ê试炼，tùi今仔日起，北门ê事业，上帝beh hō͘ 它koh-khah坚固，ǹg望是án-ne。」

音乐kap行围棋是谢纬tī真无闲中间ê娱乐。伊时常对旁观者讲：「人生ná亲像一盘棋，有输mā有赢，咱mài计较输赢，只要专心、认真，抱tio̍h喜乐ê心情，尽本分去做就好lah。」