《台湾另类牧师．医师―谢纬》

 | | | 转寄

9-01 谢纬起先办基督教病院ê念头

作者 陈金兴 2012.02.19

谢纬自1960年1月起接任南投教会ê第二任牧师，koh担任台中中会第30届中委。为tio̍h hō͘ 基督徒医疗服务团 ē-tàng顺利组成，来服务贫苦病患，谢纬tī 1961年5月中亲自拜访中部地区真chē基督徒医生，受访ê医生lóng大受感动，mā愿意kap谢纬同齐筹组医疗团，并参加义诊活动。从事医疗传道工作，医疗团ê医生每礼拜固定奉献一工，无分日暝teh参加巡回看诊。


Tùi án-ne，tī众人ê期待中，「台中中会沿海医疗团」（简称「中中医疗团」）tī 1961年6月6日tī彰化教会正式成立，谢纬被选做医疗团首任主席。中中医疗团ê成员包括医生、药师、护士、检验师、牧师kap司机等。该医疗团自1961年8月18日开始tī彰化县草港地区从事医疗传道工作，医疗团ê医生每礼拜固定奉献一工，无分日暝teh参加巡回看诊。
●中中医疗团团员

　　当时tī台湾ê基督教病院以及疗养慈善机构，lóng由外国人一手包办，包括出钱创办以及经营，thang kā in称做「外国人病院」（Foreigner Hospitals）。谢纬kap真chē外国ê慈善机构接触kap合作过，包括门诺会、世界展望会以及芥菜种会等。伊看tio̍h chiah-ê外国人为台湾做出hiah-ni̍h chē ê贡献，深深感受到chit-kú ê台湾，非常需要培养在地人「自立、自治、自养」ê责任，来进一步彰显台湾人ê尊严，tùi án-ne确立了伊自办「基督教病院」ê坚定信念。谢纬讲：「咱mā会、咱也ē-tàng办基督教病院……全省医师总人数中，基督徒医师占百分之二十ê高比例，为什么一定tio̍h靠外国人，才ē-tàng做到neh？……番薯beh发根、ài自立、tio̍h自觉，应该是咱家己办，家己打拚ê时chūn lah」。

当时担任台中中会副议长ê谢纬，就tī 1964年1月成立了「中中基督徒医师联谊会」，开始积极筹划成立病院，并四界募款，各种筹备工作继续teh进行。Chit间病院iáu未正式落成chìn前，就已经开始对外看诊，并依中中医疗团ê模式，每一位医生轮流安排每礼拜前往二林看诊一pái，包括陈曜煊看妇产科、侯安息负责内科kap小儿科，谢纬专责外科等。10月20日，谢纬召集几位医生开会讨论有关兴办病院ê tāi-chì，有一koá医师为tio̍h chit间病院是m̄是ē-tàng顺利开办表示忧心。Chit时陈曜煊却真有自信讲：「绝对有办法」。因为chit位医生chiah-nih积极koh有把握ê发言，使谢纬对tī起病院ê信心大受鼓舞。