《台湾另类牧师．医师―谢纬》

 | | | 转寄

5-03 山地医疗序曲

作者 陈金兴 2011.09.25

门诺会（Mennonite）是基督教ê一ê教派，1525年tī瑞士正式成立。Tī早期ê发展过程中相当复杂，koh定定看tio̍h in受压迫，出现危机，最后tī荷兰神父门诺西门（Menno Simons, 1496-1561）ê领导下，尽他气力挽救势面，才坚固chit-ê教派ê基础。自按呢，「门诺」ê名渐渐成做别人对这ê教派ê称呼。

门诺会ê信徒siōng早主要分布tī荷兰、德国kap前苏联等国家，现在以美国、加拿大khah chē。1920年tī美国宾州Akron成立ê 「门诺会中央委员会」（Mennonite Central Committee, MCC，koh称做「门诺会互助促进会」）成做门诺会从事医疗、救济kap教育开发ê机构。MCC自1905年tō是tī 中国传教，1949年对hia徙(soá)到台湾，最后一位宣教师tī 1952年离开中国。

经过二次大战摧残ê台湾可讲是破破烂烂无一所在完全，各地亟待救援，尤其是偏远ê山地。1947年，彼时担任台湾基督长老教会山地传道部长ê孙雅各牧师(注)，关心山地医疗资源ê欠缺，tú好koh知影门诺会打算欲离开渐渐hō͘ 共产党控制ê中国，tùi án-ne利用度假ê零用金75 kho͘ 美金，坐船到上海去见MCC ê救济工作人员，邀请in到台湾为山地原住民从事医疗传道kap救济工作。

自按呢，门诺会中央委员会（MCC）就组团到台湾考察，确定救济工作ê需要了后，tī 1948年2月正式派遣一批工作人员来台，kap长老教会ê同工tī 1948年组成「门诺会山地巡回医疗团」（Mennonite Medical Mobile Clinic, MMC），开始tī台湾山地展开巡回医疗工作。

谢纬tī 1950年到1951年参加门诺会山地巡回医疗团，这ē-sái讲是伊从事医疗宣教事业ê「预备动作」(暖身运动)。这段宝贵ê山地医疗经验，确实为谢纬带来相当程度ê冲击，mā koh-khah坚定伊日后从事医疗宣教ê决心。

............................................................................................................

(注)
山地医疗团的催生者，孙雅各牧师（James I. Dickson, 1900-1967），当时除了tī台湾神学院教书以外，每礼拜六就开吉普车(jeep)进入山区逐所在去传道，伊是台湾原住民传道事工的开拓者。