《台湾另类牧师．医师―谢纬》

 | | | 转寄

5-02 赤水教会义务传道

作者 陈金兴 2011.09.18

当时设tī南投县名间乡ê赤水基督长老教会，已经二年无牧师牧会。1947年8月，赤水教会ê陈辛修长老tī田中火车头遇着田中教会ê陈坤聪执事，陈坤聪关心赤水教会到今犹无牧师，就向伊推荐南投大同病院ê谢纬。陈辛修tī隔转工就前往南投教会拜托吴天赐牧师与谢纬接洽，看会thang绍介伊去赤水斗相共否(tàu-saⁿ-kāng bò͘ )？

谢纬虽然无闲病院ê业务，m̄-kú 伊mā真愿意来担任赤水教会ê义务传道。仝彼年9月ê第一主日早起，谢纬就 kap南投教会许清廷执事同齐骑铁马到赤水教会。谢纬tī礼拜中讲道，许清廷指挥圣歌队。Tùi-án-ni了后，m̄-nā是礼拜日，连周间谢纬mā找时间去探访会友、主持暗时祈祷会、家庭礼拜，并发动南投教会牧师、会友去赤水举办野外布道会。若遇着无法度避免ê代志阻挡chiah会拜托伊ê小弟谢纶前往。

谢纬tī 1948年12月17日tī台湾基督长老教会台中中会受设立做教师；1949年2月28日受封立做南投教会牧师，并同时受聘做该教会无给职副牧师，协助吴天赐牧师。谢纬历经「传道师」、「教师」进一步koh「牧师」ê身份，tī赤水教会义务传道连续三年，直到1950年8月聘陈添登传道师为止。

谢纬tī 1951-1954年去美国进修，chit ê期间赤水教会会友渐渐增加，礼拜堂厅ê座位不够，tùi án-ne有计画欲起新ê礼拜堂。开会决定欲买建筑用地了后，教会写phe去美国向谢纬报告chit件 tāi-chì。

Tī美国进修ê谢纬，建议in用「养猪」ê方式来筹备建堂经费。1953年9月陈添登传道师离任，soah致使起礼拜堂ê事工搁置(khoà-hē) 三冬。谢纬回国了后，继续关心赤水教会建堂ê 代志，koh再鼓励用养猪变卖所得ê经费来起礼拜堂。

赤水教会最后tī 1956年12月12日tī现址举行新礼拜堂献堂感恩礼拜。历尽沧桑，而且数度迁徙ê百年教会，tī谢纬ê协助之下，稳定成长。