《台湾另类牧师．医师―谢纬》

 | | | 转寄

7-03 谢纬续建第二间肺病疗养院

作者 陈金兴 2011.12.04

无偌久，孙理莲tī埔里镇内所起ê「基督教山地中心诊所」，原住民患者jú来jú chē，所在不够使用，孙理莲就向谢纬借用设tī镇郊鲤鱼潭畔，tú 起好ê肺病疗养院，来hō͘ 原住民患者使用。为tio̍h按呢，谢纬只好tī肺病疗养院无偌远ê所在，家己另外出钱koh再买八分地来起另外一间疗养院。

差不多经过四冬goā，1960年7月初3第二间肺病疗养院正式落成启用，名称犹原叫做「埔里基督教疗养院」（俗称大湳平地疗养院）。当时有潘启扬、蔡坤飞kap陈少聘夫妇等医护人员kap谢纬同齐工作，并邀请黄珠心医师驻院负责医疗，伊bat tī日本ê疗养院服务过一段时间，比较khah有经验。

当时来chia就诊kap住院ê患者，有一半是完全免费ê。经营ê费用，除了大部分是谢纬家己出钱(大同病院ê收入)以外，mā得tio̍h其他美国朋友，包括鲍伯・冯雷医师ê帮赞。其中，美国国际学生协会 (International Students Inc. ISI) ê大力支持，是平地疗养院siōng重要ê经费来源。In赞助建设疗养病房，并购买医疗器材，像X光机、手术台等。

讲到ISI 长期tùi美国募款寄来台湾赞助肺病疗养院这chân事，tī美国mā有人对ISI提出质疑讲：「Lín认为是当地ê基督徒ē-tàng管理hiah ê机构mah？当地ê工作人员ē-tàng胜任hit项资金ê运作mah？」

ISI 就 kā in讲，谢纬tī美国进修了后，tńg来到台湾透过ISI ê资金，tī 1956年1月设立了一间有100床ê肺病疗养院(大湳山地)。为tio̍h beh起第二间疗养院(大湳平地)，谢纬koh开始积极对外募款、兴建。当疗养院开始营运ê时，谢纬kap工作人员lóng定期将财务报表寄hō͘ ISI，in每chit sián钱lóng会记kàu真详细，资金ê用途mā交代kàu清清楚楚。ISI koh讲，谢纬in m̄-nā ē-tàng独立运作，而且koh做kàu真好，资金ê运用，iáu比其他接受美国援助ê国家koh-khah省。

1965年ê圣诞节，谢纬写phe hō͘ 美国ê朋友，报告肺病疗养院ê情形，mā表明希望疗养院ē-tàng有自立ê一工，总是因为当时ê肺痨病人iáu真chē，恐惊须要koh努力kúi nā年。了后，伊koh陆续收tio̍h美国朋友ê捐款，ē-tàng tī新ê疗养院起护士kap员工ê宿舍，以及礼拜堂。谢纬发现有真chē患者tī疗养院聚集poa̍h-kiáu，hō͘ 伊真头痛，感觉tī-hia疗养ê病人应该有一个精神寄托，就聘纪明申牧师担任「院牧」，负责病人灵性方面ê指导以及院务行政等工作。

因为医疗技术ê进步以及公共卫生ê改善，肺痨病人jú来jú少，设tī埔里ê基督教肺病疗养院tī 1980年结束服务。经过谢纶长老、谢纬夫人杨琼英医师kap家族商议了后，tī 1982年将二ê所在lóng捐献hō͘ 台湾基督长老教会总会。总会陆续将「大湳山地肺病疗养院」kap「大湳平地肺病疗养院」改做「谢纬纪念青年营地」以及「谢纬纪念松年营地」。