《台湾另类牧师．医师―谢纬》

 | | | 转寄

7-02 起造第一间肺病疗养院

作者 陈金兴 2011.11.27

1953年12月，孙理莲亲身去到美国水牛城探望谢纬，koh邀请伊tńg来台湾了后ē-tàng同齐tī埔里地区起病院，为原住民服务。谢纬除了以医生ê角度关心台湾当时众多ê肺痨病患以外，mā因为伊ê大兄长期染tio̍h肺痨，hō͘ 谢纬感受tio̍h病患kap家属ê痛苦，促成伊积极设立疗养院ê行动。因此，谢纬tùi美国tńg来了后，to̍h开始进行疗养院ê兴建工作，同时mā kap孙理莲同齐创办基督教山地中心诊所。

埔里镇，tī南投县ê北旁，徛台湾地理中心。1955年hit时ê人口5万goā人，tī全县13乡镇中间，埔里镇为人口siōng chē koh ba̍t-ba̍t-sī(ba̍t-chut-chut稠密) ê所在。其中原住民人口大约占全县人口数4%。台湾早期，tì-tio̍h肺痨病ê人有够chē，山地感染ê死亡率比平地khah高出两倍。

1955年ê年初，tī成立了「中寮布道所」了后，谢纬to̍h开始筹建肺病疗养院。依当时参与筹备工作ê李庆耀讲，原本筹备小组计画将疗养院设tī南投镇三块厝ê「园á」，因为tī-hia有谢纶ê现有土地以及厝宅thang提供做使用。M̄-kuh，in kap孙理莲讨论了后，孙理莲认为疗养院应该设tī埔里山区khah适合。

Tùi án-ne，谢纬4月to̍h邀请南投教会李庆耀kap陈梓和做伙到埔里四界探听询问，打拚chhoē土地。当时ê埔里教会牧师罗文福，兼任埔里镇镇民代表会主席，谢纬去kā伊拜访，并说明beh起疗养院ê计画。经过罗文福积极kap有关单位liân-hē了后，兴建ê地点chiah有下落，最后选 tī埔里近郊，属tī公有地ê鲤鱼潭畔。Tùi án-ne，筹备小组向埔里镇公所协商了后，镇公所同意免费提供土地使用，并约定该笔面积二甲五分goā ê土地，kan-ta限定做兴建医疗院ê路用。

续落来办理相关手续。本来beh将土地所有权登记tī孙理莲名下，soà因为伊是外国人，无符合法令要求。为tio̍h beh the̍h-tioh使用权，谢纬就将户籍soá到埔里镇，由伊登记做土地所有人。该笔土地面顶ê杉树栽(地上物)费用由谢纬、李庆耀kap陈梓和三ê人共同负担，各付5千元。5月中签约完成了后，筹备小组to̍h随时进行规划tī chit块土地。

Chit间疗养院ê建设工程，包括蓝图设计、房舍建造以及监工委托谢纬ê 阿舅吴可免负责。经过八月日了后，谢纬期待真久ê「基督教肺病疗养院」兴建完成，tī 1956年正月26日开幕，这是台湾第一间肺病疗养院，（后来称做大湳山地疗养院），大部分收容治疗原住民患者。设tī湖畔ê chit间疗养院，tiàm tī幽静山林ê中间，除了有几间用砖仔起造ê细间病房以外，iáu有一间灶脚、一间礼拜堂kap几条á步道，是疗养ê好所在。