《台湾另类牧师．医师―谢纬》

 | | | 转寄

7-01 山kap海ê医疗乐章

作者 陈金兴 2011.11.20

除了tī南投大同病院看诊以外，具有「拓荒者」精神，koh勇敢接受挑战ê谢纬，开始参与真chē医疗kap宣教事业ê推展工作。包括1955年协助开拓中寮布道所、筹画kap兴建埔里基督教肺病疗养院、埔里基督教山地病院；1960年开始到北门免费诊所义诊，成做第一位替乌脚病患开刀ê外科医生；1964年创办二林基督教病院等，tī埔里、台南北门以及彰化二林ta̍k所在留落伊súi ê足迹。

● 开拓中寮布道所

南投教会tī 1909年设立，经过四、五十年了后，教势扩展到附近乡镇，中寮乡(旧名乡亲寮)mā有bē少会友。中寮乡距离南投镇约有10公里，属偏远山区，当地ê会友前往南投教会做礼拜路途tiàu远，koh交通不便。礼拜日信徒tùi中寮山区行路到南投教会做礼拜，往往chi̍t-choā就ài两点钟以上。谢纬非常体谅会友ê辛苦，礼拜日中昼lóng会留in tī大同病院做伙吃中昼。

1865年马雅各医师来台宣教，台湾基督长老教会为tio̍h纪念chit摆有意义ê宣教历史，tī 1954年通过设教百周年纪念「教会倍加运动」（P.K.U.）案，建议全教会应该把握时机，尽全力传道kap开拓教会，向望(ǹg-bāng)教会、信徒会当倍增，来当做10年后设教百周年纪念大典ê奉献礼物。谢纬kap小弟谢纶tùi án-ne 就kap吴天赐牧师同齐去中寮开拓教会。

1954年10月中，谢纬就kap吴坤渊、陈梓和专工到中寮乡租一间店来做临时ê布道所。Koh tī 1955年1月聘台中中会巡回牧师吕春长举办连续5工ê布道会，这成做南投教会分设「中寮布道所」之开始，mā是台中中会tī倍加运动中设立ê第一间教会，若tī全总会是排名第二。1956年3月由黄丽川（县警局长）、陈国亮（县府民政局指导员）kap吴天赐牧师向南投糖厂买土地兴建礼拜堂，tī 12月27日落成，举行献堂感恩礼拜。续落来，除了谢纬前往义务讲道以外，南投教会ê谢纶长老、李庆耀长老kap陈梓和长老等人mā前往协助教会事务。长期当做南投教会支会ê中寮布道所，tī 2006年1月17日升格为独立堂会。



● 谢纬(前排左五)kap中寮教会领洗礼ê信徒合照。(1960年)
前排右二为南投教会陈梓和；右四为张温柔。


谢纬除了协助开拓中寮教会以外，伊mā长期tī hia义务传道、参加周间ê聚会。当时南投kap中寮间，暗时无公车thang坐，中寮只靠一条犹未khōng tiám-a-ka ê石头á路对外联络，弯来弯去，真chē所在peh崎koh落崎。谢纬常常为tio̍h参加拜五暗ê家庭礼拜，家己tùi南投骑铁马到中寮。聚会soah，谢纬kap会友phò-tāu，关心in ê生活状况。有时，虽然信徒一再留伊tī in tau过暝，但是为tio̍h隔工iáu有真chē tāi-chì ài做，伊犹原家己透暝骑一点外钟ê铁马，chiah tńg来到南投。