《台湾另类牧师．医师―谢纬》

 | | | 转寄

9-03 快乐来自患者ê sìn-nāi

作者 陈金兴 2012.03.04

由台湾人家己来设立基督教病院，是谢纬ê负担kap理想，chit-ê愿望tī 1964年达成。Tùi hit tia̍p开始一直到1970年伊不幸过往ê chit六年中间，谢纬kan-ta单纯做一位外科医生，义务为患者开刀。Chit段时间，他iáu-koh兼任埔基院长，每礼拜一到埔里巡回看诊；拜四到台南县北门免费诊所为乌脚病患开刀；1966年被选做台中中会议长了后，时常tī拜二主持中会会议；1969年受推选做总会议长，增加koh-khah chē ê大小会议， koh ài主持真chē教会ê落成典礼以及牧师ê就任式。

虽然chiah-nih无闲，谢纬犹原安排tī每礼拜三下晡到二林义诊。一礼拜中间，来回tī五间病院（大同病院、埔基、肺病疗养院、二基kap北门免费诊所）四界看诊，tùi南投县ê偏远山区到彰化县ê海边，甚至远到台南县ê盐乡地带。患者爱伊，伊mā疼惜患者，医、病之间ê感情升华到「mài kā医术当做算术」ê境界。因为，谢纬认为做医生ê，应该抱tio̍h救人第一为宗旨，绝对m̄是kan-ta为tio̍h thàn钱nā-tiāⁿ，因为，救人所得tio̍h ê快乐，时常赢过金钱。

每pái伊义诊ê chit一工，求诊ê患者就特别多，甚至真chē患者讲，看tio̍h谢纬，病就好一半。Chit几年中间，伊只有三pái boē-tàng前往二林看诊，一pái是到日本去进修考察；另外一pái是因为工作siuⁿ无闲致使胃出血；最后一pái，就是伊车祸身亡。

Tùi南投到二林ê路途真tiàu-oán，两地交通不便。生性khîn-khiām ê谢纬，通常tùi南投镇坐巴士(公路局)出发，经由县境名间乡，koh再进入彰化县二水乡，最后来到终点站——二林镇。

另外一条路线，是tùi南投坐省公路局ê公车到草屯，一路poâⁿ-chhia 到彰化、溪湖，koh再到二林。

← 五、六○年代ê「公路局」巴士。

谢纬tī 1965年8月20日hit工beh去二林ê时chūn，外面tú好teh落大雨，天顶koh teh tân雷公、sìⁿ-nà。牵手真担心，对伊讲：「chiah-ni̍h歹ê天气，你就mài去lah，hit-pêng可能bē有患者。」虽然天气是án-ne，谢纬却认为，若有一个患者前来就诊，án-ne就算伊冒tio̍h风雨ê危险前去，mā是有价值，而且伊iáu beh对hit-ê患者koh-khah亲切。Tī伊ê坚持之下，杨琼英就hō͘ 伊出门。谢纬hit工chhiàⁿ一台计程车，tùi南投出发，经过彰化到溪湖，想tī 溪湖换坐客运到二林。但是因为路面淹水，客运停驶，伊只好koh再tùi溪湖坐计程车去二林。当谢纬来到病院ê时，hia已经有八个患者teh thèng-hāu，其中有一位是需要动手术ê。

谢纬讲：「做医生ê快乐，m̄是得tio̍h金钱，是得tio̍h患者ê sìn-nāi。」