《台湾另类牧师．医师―谢纬》

 | | | 转寄

2-02 高校考试落榜

作者 陈金兴 2011.07.17

原来就对文学真有趣味ê谢纬， tī 中学四年级 ê 时 mā 去 kap lâng 参加高校考试 (注1)，为 tio̍h 方便将来报考台北帝国大学，想欲进入文学部读书。但是， soah 考 bô-tiâu 。中学五年毕业了后，伊 koh 再赴考，犹原是落榜。 Chit 时 chūn ，高校考试 nn̄g-pái 拢考 bô tiâu ê 谢纬，真 ǹg 望 ē-tàng koh 再去日本报考文学部。但是受老母拒绝，并要求伊随时去读台南神学院。老父 mā 对伊 án-ne 讲： 「当年你破病 tī 绝望中奉献家己，上帝有听你 ê 祈祷。 Taⁿ 你头前 ê 圣工已经有好 ê 计画， tio̍h 继续祈祷，若是上帝 ê 旨意，伊一定会亲像十年前仝款 àⁿ-lo̍h 听你 ê 祈祷！因为你已经属tī 伊； mài koh 家己 tī hia 挂虑烦恼 lah ……」。

谢纬 ê 父母为 tio̍h 伊 ê tāi-chì，tō 真着急去向吴天赐牧师求助。彼时 tī 埔里乌牛栏教会(今爱兰教会)牧会 ê 吴天赐马上 tō赶到南投。谢斌除了向吴天赐说明谢纬报考高校 bô tiâu ê 经过情形以外， koh sūn-soà 问吴天赐岂 (kiám) 犹会记得谢纬 tī 9 岁破病 ê 时，因为 in 四 ê 人 ê 祈祷 chiah 得着医治 chit chân 代志？吴天赐表示会记得，续落来伊问讲：「阿纬 kiám 无照誓约去读神学院 mah？」谢斌 ìn 讲「无」，并表示谢纬因高校考试 nn̄g 摆拢无 tiâu ，每工 tī 厝内无精无神、馁志消沉，已经án-ne 过一年 goā ，所以想 beh 拜托吴天赐拨工 chhoā 谢纬到台南去读神学院，有得着吴天赐答应。

Tùi án-ne ，吴天赐有照谢斌 ê 请求，提醒谢纬细汉 ê 时对神 ê 应允，到神学院去读 chheh 。想 beh phah 破传统 ê 谢纬，用无仝ê思维对吴天赐讲：「我 beh献 hō͘ 上帝， m̄-kú 方式有真 chē种，无一定 tio̍h 用 tī 教会做牧师 ê 方式……。」话虽然是 án-ne 讲，不过伊犹久有听父母 ê 话，最后，谢纬也是由吴天赐 chhoā 去台南。 Hit 时台南神学校(注2) 已经开学一个 goā 月。

.............................................................................................................

(注1)
日治时代学生中学毕业了后，需要代先受过预科教育， chiah 有资格进入大学， tī 1941年 (昭和16年) 台北帝国大学增设预科以前，「台湾总督府台北高等学校」(高校)是台湾岛内唯一升大学(台北帝国大学) ê 管道。当时台湾人子弟 (男)若 beh 考台北帝国大学，一般正规 ê 顺序为公学校 6 年，中学 5 年，高等学校 3年， koh 再参加考试。中学 m̄ 免读完 tō ē-thang 报考高校；高校 mā 无一定读完 tō ē-thang 报考台北帝国大学。但是， mā ē-tàng tī 中学毕业了后，直接到日本报考大学。女子 ê 学制是公学校 6 年，中学 5 年，读到高等女学校，若 beh koh 读大学，就 ài 到内地日本。

(注2)
台南神学院（Tainan Theological College And Seminary）是一个神学教育机构， 1865 年英国长老教会差遣马雅各医生来台布道。因为感受着培养本地宣教人才 ê 需要，就 tī 1869 年 tī台南二老口医馆之礼拜堂开办「传道者速成班」。了后 tī 台南 kap 高雄旗后 mā 成立「传教者养成班」。到 1876 年合并，创办「台南大学（神学校)」。第一任校长是巴克礼牧师（Rev. Dr. Thomas Barclay M.A. 1849-1935)，学生只有十几个、教师三名、教室一间、宿舍一栋。1913 年更改校名为「台南神学校」。1925 年巴博士退休，由宣教师满雄才牧师（Rev. W.E. Montgomery) 担任校长。1948 年 koh 再更改校名为「台南神学院」，招考高中毕业生修业四年。