《台湾另类牧师．医师―谢纬》

 | | | 转寄

2-01谢纬ê青年时期

作者 陈金兴 2011.07.10

谢纬虽然经过一场大病，但是并无影响伊 ê 求学过程。13 岁小学毕业 hit 年，伊 kap 大兄同齐考入去「台中州立台中第一中等学校」(台中一中)。彼时学校规定所有 ê 学生 lóng tio̍h toà 学寮，谢纬 kap 大兄 toà 仝一间寝室，另外一位高 in 一届 ê 学长， koh 平平是故乡南投 ê 朋友吴坤渊 toà tī in 对面。

1931 年 ê 时 ，in ê 小弟谢纶 mā 考入去台中一中， chit sî-chūn 包括经、纬、纶三 ê 兄弟同齐 tī 同一间学校度过快乐 ê 中学生活。每年四月是新学年 ê 开始， in lóng tio̍h 换寝室住， chit 种制度 thang hō͘ 学生之间增加 koh-khah 广阔 ê 交谊。谢纬 tī 学校 ê 生活真规律，每工早起 8 点离开宿舍去上课，下课了后就到网球场 phah 网球一点钟。运动了后，大约 4 点 goā 就直接转去宿舍复习功课。

除了拜六或是礼拜日出外去买日常用品以外，平常时 tō 无 tī goā-kháu lōa-lōa-sô。谢纬 kap 大兄、小弟每礼拜日拢到台中柳原教会做礼拜，伊同时参加圣歌队， koh tī 教会司琴，并担任主日学教员。彼时柳原教会 ê 牧师是刘振芳。










●柳原教会

林川明 tī 1929 年到 1934 年担任南投教会传道师， tī 伊任期 ê 中间，伊有成立「教会青年会」（YMCA）(注)， 同时 koh 组织圣歌队。谢纬 tī 中学 kap 读神学院 ê 时期 mā 参加过南投教会 ê YMCA。










谢纬 kā教会当做家己 ê 厝仝款，除了参加定期聚会以外， koh 常常去教会参加灵修、读书 kap 康乐等种种 ê 活动。林川明 tī 南投教会 ê 时， tú 当谢纬 ê 青年时期，两人时常互谈，交换意见，林川明 ē- sái 讲是谢纬请益 ê 对象。

为 tio̍h 量早培养谢纬牺牲服务 ê 精神，林川明利用工作有 khàng-phāng ê 时， tō 带 tio̍h 谢纬到山顶，去探访散赤 ê 会友，藉这个机会训练伊刻苦耐劳 ê 能力，以及培养关怀基层弱势 ê 情怀。谢纬知影家己将来 oē 做牧师，所以伊常常 kap 林川明讨论做牧师 ê 相关问题。 Chit 时，伊开始产生一种 kap 一般做牧师无仝 ê 想法，伊认为传福音无应该 kan-ta tī 礼拜堂内底讲道，是tio̍ h 进入社会，接触 koh-khah chē ê 人群， mā 就是 beh hō͘ 教会 kap 社会相结合。因为 chit 种理念之产生，确立了伊「自由自在 ê 传道方式」― 自由传道。



(注)
Tī 1932 年所创设 ê「台湾基督教青年会联盟」，英文名为 “YMCA”。但是外国宣教师并无 kā 它称做 “YMCA”，是用 “ Yo͘ng People's Society ” 替代，thang 直接翻译做「青年会」抑是「青年社」，表示当时 ê 教会青年会并 m̄ 是国际性 ê「基督教青年会」( Yo͘ng Men's Christian Association，YMCA )组织，只是长老教会中 ê 青年团体，但是以「青年会(YMCA)」为名举办各种活动。为 tio̍h beh 整合全省教会青年，有 tī 1949 年 5 月 3 日正式成立了无分南北 ê 「台湾教会青年团契」（Tâi-ôan Kàu-hōe Chheng-liân Thoân-Khè 简称T.K.C.）总会。




●1945 年所成立 ê「台北市中华基督教青年会」是台湾 siōng 早 ê「基督教青年会」(YMCA)。