《台湾另类牧师．医师―谢纬》

 | | | 转寄

6-01 起帆(khí-phâng)去美国进修

作者 陈金兴 2011.10.16

有一工，孙理莲问谢纬是m̄是愿意到美国去做进一步研习？伊讲：「若按呢你就koh-khah ē-tàng充实家己来为上帝做工，替病人服务。」对谢纬来讲，这是另外一种挑战，伊同意beh去美国。因此，谢纬离开门诺会山地医疗团ê工作，tī 1951年秋天前往美国进修外科手术。Tī美国纽约州ê病院中，谢纬熟识了鲍伯・冯雷（Dr. Bob Finley）医师，以及tī加州旧金山ê教会中，mā感动了玛喜乐太太（Mrs. Joyce Meredith McMillan）来台湾奉献医疗服务将近半世纪。

因为五、六十年前台湾iáu tī戒严体制之下，beh出国是一件真不容易ê代志。谢纬beh到美国进修ê消息，hō͘ 南投街仔ê乡亲以及教会ê会友，m̄-nā振奋无停，mā感觉非常光荣。Tī庄脚ê小所在，难得有一片欢欣鼓舞ê这种气氛。除了谢纬ê亲朋好友kā伊chiān-pia̍t(饯别)以外，1951年9月30 tī南投教会、10月初7 tī赤水教会mā分别为谢纬赴美进修举行欢送礼拜。

10月初10，36岁ê谢纬款一寡á简单ê行李，由牵手、tiūⁿ-ḿ(岳母) kap李庆耀等人陪同，tùi南投到彰化火车头，坐夜快车到基隆港口去坐船，启程赴美国东部，tī纽约市 (New York City) 落船。伊先tī布鲁克林 (Brooklyn) 区ê「圣约翰英国国教病院」(St. John Episcopal Hospital) 实习兼进修英语。

家己一ê人坐船过海来到美国纽约了后ê谢纬，chit段时间kan-taⁿ ē-tàng靠tio̍h写批tńg去kap台湾厝内ê人联络，用chit种方式来化解思乡之情。Tī伊结婚纪念日前两工写批 hō͘ 太太ê时，有提起家己回想tio̍h六年前大战tú结束无偌久，in 两人tī日本结婚，有得tio̍h大家ê祝福，到taⁿ内心iáu-koh非常感谢上帝。如今in lóng已经成做人ê父母 lah，koh过无偌久mā会老，tùi án-ne来感叹岁月真是不饶人！

除了感谢kap感叹之外，因为谢纬认为tī美国ê chit段时间，是伊自我装备ê最后机会，因为这种责任感ê 催逼，hō͘ 伊禁bē-tiâu有淡薄仔挂心。伊虽然早就已经决定tī美国进修告一段落了后，beh转去台湾一世人尽心尽力为主做工。但是伊家己认为头脑无比别人khah聪明，能力mā无比别人khah强，今仔日ē-tàng有chit-ê服事ê机会，lóng是tùi上帝所领受ê，完全是上帝hō͘ 伊ê恩惠，所以mā希望杨琼英 ē-tàng kap伊同齐献身，同齐工作，同齐分忧解劳。