《台湾另类牧师．医师―谢纬》

 | | | 转寄

5-05 牺牲是一种快乐

作者 陈金兴 2011.10.09

门诺会山地巡回医疗团需要医生协助，chit时chūn，kap谢纬是台南神学院前后期校友ê吕春长向孙理莲kap高甘霖推荐谢纬加入团队。自按呢，谢纬 tī 1950年10月起开始kap高甘霖、吕春长等chiah-ê人做伙去做山地巡回医疗事工。

谢纬tī＜在所不辞＞中讲起： 「有一工我遇tio̍h孙理莲教士，伊kā我讲，伊对山地同胞中间染病kap性命kiông-beh无去ê人内心有一种极大ê负担。『谢医师，chiah-ê 艰苦koh 散赤ê人需要你。咱有一个巡回诊所，ē-tàng四、五ê人同齐往诊。』这是我头一ê挑战，我并无逃避。阮同齐peh嵁硈(khâm-khia̍t) ê 山路；困tī土脚顶；阮tī茫雾中抑是雨里行踏，归身躯湿kô͘-kô͘，m̄-koh阮kap主做阵行，拯救人ê性命，按呢 hō͘人感觉兴奋。」

谢纬参加山地医疗团 ê时间虽然m̄是真久，但是tī将近一年ê工作中间，hō͘ 伊注意tio̍h 散赤ê原住民同胞。M̄-nā án-ne，谢纬有koh-khah chē ê心得：美国人比咱koh-khah拚(piàⁿ)；牺牲m̄是折磨、痛苦，颠倒是快乐。

因为台湾ê山地真崎(kiā)，加上当时中部iáu未有横贯公路，交通相当不便，beh从事山地医疗非常艰苦。医疗团若beh深入原住民部落(番社)常常tio̍h爱行七、八点钟，潦水过溪、趡(nǹg)过o͘- lu-lu ê树林，除了家己搬运行李之外，且(koh) tio̍h运送物资kap医疗器材。In所lim ê水无经过消毒，逐三顿mā真chhìn-chhái 吃。谢纬tī chit种ê生活条件下面，尽心尽力工作。根据吕春长ê回忆，谢纬常常在一工内诊断治疗五百名以上ê患者，chit种ê工作量其实是相当大，伊m̄-nā lóng无怨言，iáu充满喜乐。

孙理莲按呢讲： 「阮tio̍h爬山过溪，tī任何条件之下困、食。谢纬常常一工看几若百ê病人，有时chūn上千。就算阮有一阵工作人员tī边仔斗参共(tàu-saⁿ-kāng)，伊犹原是过头tio̍h磨。但是无论tú-tio̍h joā-ni̍h-á困难ê工作，伊并无失志抑是激动，反tńg时常快快乐乐。」 除了按呢以外，谢纬tī医疗团工作一站仔了后，伊kā吕春长讲：「我以后无beh koh领chit 份津贴lah，因为美国人到台湾做善事(行善)，咱the̍h in ê钱，对上帝讲未得过，tī人面前，头举未起来，对家己mā心未安。」不领取医疗团 ê津贴以外，伊tī山地kap医疗同工作伙ê时，mā时常tùi裤袋á jîm钱出来买凉ê或(á)是饼招待in。

医疗团工作ê主要地点选tī当地 ê乡公所、派出所以及学校等公共场所。高甘霖牧师相当强调医疗kap传福音两项应该结合，tùi án-ne tī山地巡回医疗服务中，in会带患者做礼拜kap放福音影片，ín-chhoā了真chē原住民来信主。早起时由谢纬或(á)是吕春长领诗唱福音短歌，续落来由吕春长用挂图布道。了后，谢纬kap三、四位医师做医疗工作。吕春长、孙理莲kap高甘霖就tī边仔分发药品，顺soà做简单ê外科治疗，一直到暗时。