《台湾另类牧师．医师―谢纬》

 | | | 转寄

6-02 谢纬开始 tī美国 ê 新生活

作者 陈金兴 2011.10.23

1952年ê 2月初，因为tú到美国无偌久，语言kap文化mā tú仔teh学习kap适应，病院却tī无事先通知ê情形下，将谢纬解聘，理由是因为伊ê英语无偌好。 Chit-ê 代志 hō͘ 伊hiông-hiông感觉前途黑暗，馁志失望，真想自按呢就结束tī美国ê进修，随时tńg去台湾。但是，伊读了《圣经》〈约伯记〉以及唱圣诗〈至好朋友就是耶稣〉了后，koh恢复了信心。Tùi án-ne，谢纬积极拜托朋友斗参共另外chhoē病院。

关于chit段忽然临到ê打击，伊写phe请太太放心，因为伊ê美国朋友，真正对伊真好，m̄-nā鼓励安慰伊，iáu四界为tio̍h伊探听其他病院，伊相信无偌久就会有好消息。果然，就tī朋友ê热心帮助之下，伊真紧就有四、五个面试ê机会。

Tī面试ê时，谢纬lóng无掩khàm kā对方讲，家己被解聘ê理由是因为英文程度不好。但是hiah-ê病院soah kā 谢纬讲，in bē因为chit-ê理由m̄任用伊。甚至iáu有ê kap谢纬交谈了后向伊表示，对一个外国人来讲，谢纬ê英文程度已经有够好lah，tùi 按呢就kā伊录取。

谢纬tùi 1952年2月16日开始去纽泽西州(New Jersey) 一间设tī河边ê「圣玛莉病院」（St. Mary's Hospital）上班，除了月给70元以外，院方iáu提供吃kap住。因此，除了三顿m̄免烦恼以外，伊iáu有属tī家己ê房间，m̄免tī外面另外soè厝toà。

Tī生活kap工作lóng渐渐安定了后，谢纬写phe hō͘ 太太，向伊报告美国ê 种种代志，mā相当关心厝内gín-á kap亲人，并特别请太太加关照丧夫已经9年ê老母。同时，因为大兄已经染tio̍h肺病十goā冬，病情有时好，有时坏。谢纬mā提醒杨琼英，若是大兄ê身躯iáu无恢复到真好，就hō͘ 伊加歇困，mài hō͘ 伊常常出来看诊。

身处异乡ê游子，生活kap以前仝款规律，tī病院ê实际临床案例中，得tio̍h真多宝贵ê经验。Tī伊真无闲ê医疗工作中，犹原无bē记得伊对上帝ê应允，以及感谢厝内ê人对伊ê栽培kap照顾。9月l2日ê家书按呢写： 「第一、我是一ê奉献hō͘ 上帝ê人，所以无论做任何代志，lóng beh lia̍h上帝做中心。第二、自细汉到大，我得tio̍h厝内ê人ê温暖以及受tio̍h家庭hō͘ 我ê恩惠，我真感谢。我是一个欢喜大家庭生活ê人，我会koh-khah爱护我ê家庭。」

同时，伊对tī将来学成归国了后beh何去何从，iáu无按算，伊透过家书向爱妻表达家己ê想法： 「将来若教会医疗需要我斗脚手，我会尽心尽力去做。设使无chit-ê需要，我个人若有一间病院ê时，我计划tī病院体系之下，另外成立社会关怀部，来免费帮赞hiah-ê无能力就医ê贫困患者。若上帝怜悯我，koh容允我活到60岁以上，到时，就会kā医疗事业传hō͘ 后辈，我就ē- tàng全心去传福音lah。」