《台湾另类牧师．医师―谢纬》

 | | | 转寄

9-07 喜乐之家 ê 成立

作者 陈金兴 2012.04.01

因为玛喜乐有照顾小儿麻痹患者chit方面ê经验，所以当谢纬tī二基病院beh成立「附设小儿麻痹保育院」ê时，头一个想tio̍h ê siōng适当人选，就是她。起初，玛喜乐心中非常踌躇，m̄知应该离开埔里hiah-ê可怜、sàn-chhiah ê原住民病患bò͘？Koh-khah m̄知家己是m̄是有能力完成谢纬ê付托？过chi̍t-chām-á了后，玛喜乐答应谢纬ê邀请，tī 1964年5月进入筹备中ê二林基督教病院。当玛喜乐tú-tú到二林ê时，看tio̍h chiah-ni̍h-chē小儿麻痹孩童，她问上帝讲：「我ē-tàng为 in做一寡仔什么mah？」

当二林基督教病院11月初3开幕ê时，hit日就来了222位小儿麻痹患者。病院四界，目睭所看会着ê，lóng是tī土脚teh爬ê gín-á。当时ê玛喜乐亲目睭看着有hiah-ni̍h chē患者需要帮忙，就决定beh专心来照顾in。1965年8月，二林基督教病院内底有成立「附设小儿麻痹保育院」，委托玛喜乐负责hit-ê保育院ê院务。因为医生资源欠缺，就邀请屏东基督教病院ê医生前来支援诊断治疗，病患分别tī二林开刀，或是远送屏东治疗。仝年11月，hit-ê保育院开始接受由高甘霖牧师所主持ê「基督教儿童福利基金会」（CCF）ê协助。1967年9月，改名做「二林基督教保育院」，继续接纳治疗小儿麻痹孩童。但是，因为入来病院ê病童jú来jú chē，病房无够安置当时ê 60名小儿麻痹院童。为tio̍h因应koh-khah chē ê其他病患ê需要，二基病院只好将chiah-ê小儿麻痹患者独立出去。

玛喜乐知影必须替chiah-ê gín-á另外chhoē所在，伊mā体会到必须chhoē一koá外援，chiah有够额替in发展未来。1968年6月，玛喜乐邀请tùi世界展望会来ê司德凤（Betty Stanton）小姐担任喜乐保育院第一任院长。仝年7月，玛喜乐tńg去美国拜访世界展望会斗saⁿ-kāng。经过展望会ê杂志报导了后，得tio̍h bē少ê捐款援助，有够额阿嬷tī二林高中对面买2,200坪ê土地（喜乐保育院现址）建院。1969年koh得到展望会赠送一台专车。仝年11月成立董事会，正式独立收容院童70名，并tī 1970年5月24日正式立案，改名为「彰化县私立基督教喜乐保育院」。










玛喜乐bat受颁第五届「医疗奉献奖」（1995年）。1998年得到省府荣誉省民证kap彰化县荣誉县民证、内政部台湾永久居留证。1999年获颁中华民国华夏三等奖章、2000年获总统颁授紫色大绶景星勋章kap台湾基督长老教会总会荣誉宣教师证。并以91岁高龄tī 2005年获颁第三届「总统文化奖」（社会服务类「太阳奖」），这是第一位外国人得tio̍h ê奖项。