《台湾另类牧师．医师―谢纬》

 | | | 转寄

自序：「是旧，犹久永新」话『谢纬』

作者 陈金兴 2011.06.12




● 谢纬 ê 小弟谢纶长老/药剂师（1919-）。
( Hip tī 2011 年 1 月 17 日 南投市 谢寓 )




1959年「八七水灾」ê 时，我 toà-tī 南投镇平和国小附近 ê 「下庄 á」， khiā 家「涂埆厝」（thô͘-kat-chhù）去 hō͘ 大水冲倒，家伙全部流去。教会 ê 礼拜堂暂时变做收容所。阮 tī-hia 住几工了后，谢纬 ê 小弟谢纶（1919-）长老 tō 主动来向我 ê 阿公讲，in ē-tàng 将 in tī 南投国校边三块厝仔 (saⁿ-tè-tshù-á)「园仔」( hn̂g-á )内底 ê 「马厩」hō͘ 阮全家「无限期」khiā 起。 阮就搬过去住。直到1971 年 8 月，我到彰化读高中， tsiah 搬离开马厩。 Tī 这12年久期间，谢家除了无拿厝税以外，谢纶长老夫妇 koh 时常送阮物资，帮助阮度过生活难关。





● 细汉 bat 住过 12 年 ê 「马厩」。
( Hip tī 1979 年 8 月 14日 )



细汉 ê 时，我 tī 南投教会参加主日学、儿童献声队、青年团契（TKC）、拜三祈祷会、拜五家庭礼拜、拜六圣歌队、夏季学校、野外家庭礼拜等活动。每工放学了后，就走去教会 phah 乒乓，暗时 koh 去 hia 写功课，差不多以教会为家。有时 tsūn ， kap 教会 ê 小朋友到「大同医院」，不是去看病，是大家同齐去 tshoē 谢家ê gín-á 作伙 sńg 。大同 ê gín-á ，大部分比我 khah 大汉， in 并无因为我 ê 出身寒微就有什麽看轻 ê 意思。 Tī 大同病院， khah 大部分 ê 时间看 tio̍h 谢纬夫人杨琼英（1921-）医师 teh 看诊，真少 tú-tio̍h 谢纬医师。

Mā 是 teh 读小学 ê 时，一 ê 冬天 ê 半暝，我感冒发烧，阿公随时赶紧走去大同病院 tshi̍h 电铃 hoh kiù lâng ，彼时已经过了看诊ê时间。伊向开门 ê 人说明来意了后，过几分钟，谢纬医师随时 moa 一领大衣，手捾 kha-báng kap 听诊器出门。虽然北风阵阵吹 tio̍h 冷冷清清 ê 街路，伊犹原精神饱足， tī 冷风中坐三轮车亲自来厝里「往诊」。 Tī 伊为我问诊完 koh 注射了后， tō 邀请阿公、阿嬷同齐祈祷，恳求上帝怜悯 tsit ê 幼嫩 ê 身躯， hō͘ 伊 thang 得 tio̍h 医治，早日康复。了后，谢纬医师请阿公 kap 伊同齐坐三轮车到诊所 the̍h 药仔。阿公 tńg 来厝了后，真感激对阿嬷 kap 我讲，「阿纬仙」无 kā 咱 the̍h 半 sián 钱。

另外，有一摆 tī 学校边 ê 店仔买物件食中昼。过了无几分钟，腹肚忽然真痛，我面色反白， tī 土脚滚 liàn 。同学看 tio̍h tsit款情形，随时前来关心。 In 问我 boeh 去 tó 位看医生，我就直接讲：「大同」！虽然是中昼时，大同病院 iáu 有门诊患者，杨琼英医师放落 tú teh 做 ê 工，随时来处理我 tsit位「急诊」 ê 小朋友。诊断结果，是急性肠仔炎。注射、食药仔了后， tī 诊疗床歇困一下，我 koh tńg 去上课。医药费，犹原是免 lah。倒 tī诊疗床 ê 时，我无看 tio̍h 谢纬医师， kan-ta 看 tio̍h 杨琼英医师继续看诊，谢纶药师 tī 药局内面无闲 teh 配药仔。我心内 teh 想，谢纬医师走去 toh 位 leh ？

Khǹg tī 心内已经很久 ê 往事，是点点滴滴存在 ê 问题， mā 是我 kap 谢纬牧师/医师亲身接触 ê 经验。同时， tī 小小 ê 心灵上，产生了好奇 kap 疑问：

为什么伊是牧师， mā 是医生？既然是牧师，伊怎(thái)会无 kap 其他牧师仝款， tī 一间固定 ê 教会内底讲道？伊是医生， thái 会日时头 á tī 大同病院内面真少看 tio̍h 伊亲像别ê开业医 hit khoán 为病人看病， hoán-tńg khah chia̍p 看 tio̍h 牧师娘杨琼英医师 teh 看诊？


1970 年 6 月 17 日下晡，谢纬 tī 南投县名间乡不幸车祸身亡 ê 坏消息，传 tńg lâi 南投小 só͘-tsāi。为 tio̍h 办理治丧事宜，我 mā tī 教会帮忙写讣音，寄 hō͘ 一千 goā 间教会以及相关单位。6月22日出殡 hit 工，先 tī 南投教会举行告别式，续落来 soá 去墓园。 Tùi 礼拜堂内、外 e-e 阵阵 ê 各地来宾，以及送葬行列所经过 ê 两旁街路，我所看 tio̍h ê 是 hiah-ni̍h tsē ê 民众，目屎 tsho̍p-tsho̍p 滴 teh 来 kā 伊送别。亲身在告别礼拜 kap 送葬行列 ê 圣歌队 ê 中间，我感受 tio̍h tsit 种情景，比「做醮」 ê 场面 iáu koh kah 大。心中禁 bē-tiâu gông-ngia̍h ：为何一个人 ê 过往，会有 tsiah-nih tsē ê人，无论是熟识 á 是bô 熟识 ê ，来为伊流目屎，毋甘伊来离开世间？

2010 年 tú-á 是谢纬归天40周年，将我 ê 硕士论文《谢纬 kap 台湾医疗宣教》改写做《台湾另类牧师●医师―谢纬》，出书来纪念伊。若 ài kā 本册列为谢纬传记，资料犹有 khah 不足；讲它是回忆录， mā 难登大雅之堂，我 kā 它称做「故事」。故事中 ê 主角，有充满传奇 ê 一生，伊感性 ê 另外一面，tsit-sut-á to 无掩盖 (khàm) 来透露出真性情。 Tī 写作 ê 过程中，谢纬 ná 亲像就 tī 我 ê 身边，伊同时 kap 我 tī 星空下对话；梦中，伊 tùi 我微微 á 笑。

5月初，谢纬牧师娘杨琼英医师回台， hō͘ 我有机会 kap 荣幸将文稿 the̍h 到南投，请伊过目指正。伊犹原亲像 khah-tsá hiah-nih 亲切，且（koh）精神真好、身躯勇壮。言谈 ê 中间，散发出慈母温柔和蔼、疼惜晚辈 ê 一面。这， hō͘ 我想起当年，伊身兼太太、母亲、媳妇、牧师娘、医生娘、医师等无仝角色， tī 大家族中，相夫教子，行医济世，来帮助先生完成心愿 ê 种种。伊是一位坚强而且智慧 ê 女性。阮同齐回顾几十年前 ê 老相片，费神细思相片中 ê 人 kap 代志。记忆，跟 tùi 已经变黄 ê 相纸， tńg 去到以前；回忆， tī 不知不觉中，说明 tio̍h 「是旧，犹久永新」(Sī kū, iáu-kú éng sin) ê故事。

● 杨琼英牧师娘/医师（1921-）。( Hip tī 2011 年 5 月 10日 南投市 中心诊所 )

Tsit 本册会 thang 顺利出版，感谢上帝 ê 保守。同时，藉 tioh tsit pái ê 机会，向真 tsē「无名英雄」表示我 ê 谢意：
杨琼英牧师娘、汪清医师 kap 伊 ê 夫人慧华姐、李庆耀长老、林荣章长老 kap 谢赐悰兄等，提供珍贵 ê 相片 kap 文献。 Iáu 有，谢纶长老、谢光亮医师、吴慕圣副院长、卢俊泰医师、阙盟昌长老、黄敏生医师、林荣章长老、陈耀东长老、阮宗兴长老、赵文崇医师、吴瑶瑛老师、刘丽玲老师、郭文隆长老、张金城牧师、郭宽城牧师、陈静芝药师、野间 晃 ( Akira Noma ) 副教授 kap 我 ê 牵手雅萍、tsa-bó͘-kiáⁿ 圣音等，对 tī 本书提供宝贵意见，并参与校对工作， mā 时常hō͘ in 鼓励 kap 鞭策；真 tsē 未赴提起 tioh ê 亲朋好友， tī 背后恬恬 á teh 祝福。若无， kan-ta 靠头脑复杂、心思单纯 ê 我，是无法度完成任何 khāng-khoè ê 。

另外，杨琼英医师、庄万寿老师、郑仰恩老师 kap 林荣章长老 tī 真无闲 ê 中间， koh 特别拨时间为 tsit 本书写序；郑瑞明老师、赵文崇医师、阙盟昌总经理 kap 徐光宇总经理等恩师至友，乐意推荐本册，一并致上谢忱。也真盼望各位先辈继续指正。

最后，特别感谢前卫/草根出版社林文钦社长，无一点仔踌躇（tiû-tû）就欢喜替我出版这本书，编辑团队辛苦编排、制版、付印， hō͘ tsit 本书 oē-thang 顺利诞生，献 hō͘ 各位读者。


陈金兴

Tī 2010年5月28日 脱稿
Tī 2011年6月10日 修改
彰化 白沙坑