《赖永祥讲书》

 | | | 转寄

《教会史话》(1_073)盲人事工ê出现

作者 赖永祥 2008.12.07

耶稣摸青瞑ê目睭！是的，Jesus touched the blindman’s eyes（马太福音九：29）。台湾盲人教育ê开拓者是英国长老教会ê宣教师甘为霖（Rev. William Campbell）。甘为霖tī伊ê「台湾布教之成功」有一篇（work for the Blind，见该书651~667页），叙述伊做一ê盲人事工ê机缘kap beh为着盲人刊印净凸版、点字版ê经过。

根据伊tī 1889年4月24日ê报文，大约7年前（1882年）甘为霖着想beh为盲人做一kóa代志，m̄ koh因为其他事务去延着，一直到1889年ê热天才真正开始chhòng。当时甘为霖当leh巡回岩前，见着一位盲人（指温旺？），是被介绍为洗礼访问道理chiah来ê人。一看就知道伊是非常聪明ê人，但他ê目箍空洞-。这ê人讲，十多年前tī附近ê庄脚路，有5、6 ê人ùi树林跳出来就giú伊倒地，挖去伊ê的目睭。根据伊讲约有100人就是按呢hō͘吴志高chit kóa人或其他恶霸挖去两ê目睭。此人ê话深深刻tī甘为霖ê心，也通过甘为霖ê报导，引起伊故国真多朋友ê同情，包括bat完成尚早盲人圣经ê格拉斯格人阿尔斯顿（John Alston）ê查某kiáⁿ等人。

甘为霖估计tī台湾kap闽南__就是厦门腔音通用ê地区___大约有2万5千ê盲人（台湾有1万7千名）。大部分ê盲人m̄是乞丐就是算命仙（相士）。m̄ koh也有人被雇捣碎稻谷、踏水车供水hō͘水田，也有人制篮修篮。做乞丐ê人数真chē.，命运尚苦ê是tī中年chiah hō͘人强暴失明chit kóa人。

甘为霖牧师真同情盲人，伊想教育会改善in ê处境，尤其对年青者koh khah有路用，所以就决心beh来做盲人教育ê事工。大约tī 1885年伊着已经准备好厦门音罗马字净凸活字（embossed type），chia ê字脱胎于文（Dr. Moon of Brighton）n所用者，用这kóa活字伊刊印了四种书，一是初学书（Primer），一是读本（a reading book），一是马太福音（分2册），一是「庙祝问答」。字体khah大，用粗手mā会冻认出来，学会晓罗马拼音了后，方便可用。可惜这kóa挣凸版本尚过大koh重。所以后来也就开始采用白雷尔式点字（Braille system）。要制作一本文式净凸活字ê圣经，会有62大册，需款10磅（Ten pounds stering）以上；改用白雷尔式点字，只要49册，而费用折半。学「点字」需要一点用功，对中年者手指粗ê人来讲尚困难，m̄ koh为着少年人beh求khah高ê知识，学会晓了后有真多项用处。甘为霖对两种有作多项此较kap引证，ti7chia着无beh koh加讲a。对布教ê看点来讲，有盲人ê用书，phah开了盲人接近福音书、诗篇….而得救ê门；对肓人ê福址来讲，不再是文盲，知识ê门已经开a。 　
《台湾教会公报》 1953期 主后1989年8月6日