《赖永祥讲书》

 | | | 转寄

《教会史话》(1_072)盲人信徒温旺被thâi

作者 赖永祥 2008.11.30

甘为霖牧师写「台湾布教之成功」chit本册，mā公开了另外一ê kap吴志高有关ê事件，就是温旺被thâi。详情请读该书412~420页kap 517~519页。

温旺（Un Ong）吉贝耍人，早年因为一寡小代志kap吴志高ê党徒有冲突，所以有一暗tī路nih被袭击soah来受伤，最惨ê人就是两lúi目睭去hông挖--去。后来伊听道得救，无koh再怨恨伊ê敌人，甚至亲身到吴志高hia见证主爱。或者吴志高是为beh收买伊，所以表示愿意提供金钱，mā爱伊参与tī店仔口（白河）ê生意。m̄-koh伊以「主ê徒无应该kap非信徙合股作生意」为理由，来拒绝--伊。

事件发生ê前年（1876）夏天，有一ê小事件.吉贝耍信徒ê牛，hō͘一群党徒掠去，chhōa领这一群;人ê章兴（Chiong-hin）ti7leh赶hit只牛ê时被信徒认出--来，soah告到地方官衙，m̄-koh代志着按呢无结果a。章兴恨信徒去kā tâu，就呛声beh报仇，伊ê目标是温旺，因为温旺为信徒同僚要求公道尚有力。

1877年4月14日，温旺去店仔口beh领一笔钱，in子温木（Un Bok，11岁）kap吉贝耍教会肯年向茂春（Hiong Baw-chhun）偕行。一行tī回程ê时，到了牛稠埔头，tú着7、8 ê匪徒由章兴chhōa领，匪徒就giâ刀斩茂春到伊失去知觉，后 温木ê头kap肩胛头，最后凶杀温旺致死。茂春后来恢复知觉想beh逃走，被凶恶有名后山头出身ê名土（Thuh）者发觉，一直追到许秀才ê大厝门前，好加在民众出来解救，chiah被送交hō͘番社官衙法办。

隔tńg工有2位信徒赶去嘉义县beh禀告，到底是庄脚人，无法托人备辨官方要求ê册面，不会o͘-se，也就无任何结果。番仔田总爷陈朱英（Tan Chu-eng）bat去吉贝要耍作过调查。由他知影被掠ê土在番社监狱3日就逃走，tī路中因为抢了一ê苦力ê衣服被hit ê苦力追到属于吴志高ê糖铺（a large sugar-store） 官员要求吴志高交出人，m̄ koh去hông拒绝。章兴无去hông掠去，返吉贝耍仍颇得意而不隐蔽伊所做ê代志。6日了后信徒tī远离凶杀现场数哩外找到温旺ê尸体，头盖受着kòng伤，归身躯拢有伤痕，身上有6箍。

如此，有白水溪之遭难、有温旺之遭杀，有其他真多对信徒ê侮辱kap迫害，再加上吉贝要礼拜堂被烧毁（1877年12月11日）等事件常常传出，甘牧师只好央求英领事Frater ê协助，坚决要求官方爱好好仔处理chit件代志。最后嘉义县重开公审，判所有凶手就范，总爷被降级处分，吉贝要礼拜堂爱赔偿新建，有新ê告示严饬保护教会。

《台湾教会公报》 1952期 主后1989年7月30日