《赖永祥讲书》

 | | | 转寄

《教会史话》(1_020) 巴克礼推动白话字

作者 赖永祥 2007.09.09

台湾ê南北基督长老教会，多年使用罗马拼音ê白话字。Chit种白话字是用ABC字母kā台语ê声音kap语调拼出来者，thang正确来kā圣经或其他意思传达hō͘读者，而且短时间就thang学会晓用。

巴克礼牧师是推动白话字siōng出力ê，其回忆记载：「Ttui3我初到台湾，就确信三件事，到taⁿ经过五十年，iáu坚信不移。第一，若ài有健全koh有活命ê教会，每一个信徒不分男女，lóng tio̍h研读圣经。第二，chit-ê目标，使用汉字是达bē-tio̍h ê。第三，使用罗马拼音ê白话字，thang达到chit-ê目标。白话字真适合妇女、儿童kap未受教育hiah-ê人ê使用; 读册人只用汉字，就是对白话字ê轻视。因此我决定以身作则，用白话字来代替汉字。我一生ê中间只有一pái使用汉字圣经讲道，á为hit一pái感觉遗憾。我当然知影，只用白话字，会hō͘人误为无读册无知识，但想tio̍h可能带来ê利益，我就不在乎loh。」(Band. “Barclay of Formosa”，p.67)

1885年7月，巴克礼牧师创刊了白话字刊 ―― 「台湾府城教会报」。其ê 发刊词án-ne讲：「Lín家己读圣经，会受圣灵ê感动，虽然无人讲道hō͘ lín听，犹原会明白上帝ê旨意。可惜汉字真oh学，会读ê人少，因此阮另外来设法，用白话字来印册，hō͘ lín khah容易看bat。阮最近tī府城安置一座印册机，thang印chit种读物。希望众人ài出力学习白话字; 以后阮若印什么册，lín lóng看会bat。Mài有人认为看会bat汉字，就m̄免学白话字，mā mài看轻伊，认为是细汉gín-á ê把戏。两种字lóng有用处，不过因为chit种白话字容易学容容易bat，因此必须先kā伊学，以后如koh再学读汉字koh-khah妙；但是beh先学白话字，以免因为无学读白话字，á看m̄-bat阮以后所印ê。劝lín众人、信徒、慕道友、男女老幼、bat字或m̄-bat字lóng赶快来学，án-ne lín就会读报纸以及其他ê册kap圣经，希望lín学习道理愈深，德性愈完备。」「台湾府城教会报」，就是「《台湾教会公报》」ê前身，白话字公报最后一期是1049、1050期合刊，时1969年三月。

十七世纪荷兰人在台宣教，成绩不差，但荷兰政权被逐出，基督教mā真紧失去。其原因neh? 巴牧师认为是无kā圣经译成本地语言，soah致使无人ē-tàng看圣经来互相继承其信仰。实在可惜ê是，当in tī荷兰印好本地语言ê福音册ê时, 已经siuⁿ慢loh。(Band. “Barclay of Formosa”)。按1661年新港腔马太福音，由宣教师倪但理(Daniel Gravius)译出刊行。 　 (华语原载：《台湾教会公报》第1894期 主后1988年6月19日)