《赖永祥讲书》

 | | | 转寄

《教会史话》修订1_042 祖籍新港ê李顺义

作者 赖永祥 2019.12.08

岗á林李顺义是故台湾教会公报社主笔李嘉嵩牧师（1914 ～ 1978）ê 阿祖。李嘉嵩《100 年来》（1979 年人光出版社）第一章「先祖先」讲：旗后有正式礼拜ê时，布道所里lóng ē-tàng看tio̍h我ê 阿祖一家人。Tùi台南县山地崎岖岗á林到高雄旗后，以今á日ê汽车、火车、加上步lián，来回尚且需要 10 个点钟。

Tī 100 年前，阿祖beh率领一家人去旗后看马医生，而且听道作礼拜，就一定tio̍h tī礼拜六天光前，带火把出发，一直ǹg南行足足一工一瞑ê路程，tī礼拜日早起时才能去到旗后。Hit中间路途劳顿三顿不定，iáu tiāⁿ-tiāⁿ有土匪出入，过路人m̄-nā财务tiāⁿ-tiāⁿ有hông抢劫ê危险，to̍h是性命mā tiāⁿ-tiāⁿ有难保之虞。阿祖带厝里ê人去旗后做礼拜ê时，in一阵人一定tio̍h带ê物件有粮食、武器枪械kah粉鸟等三样物件。粮食做án怎用途，当然免讲mā知；武器枪械chiah是用来防御途中突来打击抢劫ê匪徒，讲tio̍h粉鸟，to̍h是等到一阵人安抵旗后，tī礼拜日早起kā它放出hō͘它飞tńg来岗á林， 太妈kah家咱人看tio̍h便thang放心，知影in已平安去到旗后。（是gōa-ni̍h-á感动ê故事！）……1867 年阿祖就奉献地皮kah建筑物，chit-má教会会址iáu tī当时仝一个地点……。

M̄-koh《100 年来》起头讲：听讲阿祖李义顺，自从马医生tī台南开设布道所兼诊所ê时（chit本册注 1865 年 6 月 15 日，m̄-koh 16 开设chiah tio̍h），就bat偕同故乡岗á林同村ê病友到台南马医生处求医……。Chit段是「听讲」，非历史事实。亲像你读必麒麟tio̍h Pioneering in Formosa （中译：老台湾）就知影马医生kah岗á林人士头一pái接触是 1865 年 11 月，马医生已受逼退出台南而tī旗后。

Koh《100 年来》卷头有岗á林李家简谱；记祖先源流讲：祖先相傅来自江苏省新港府，乘渔船过海漂流现高雄白沙仑地方，转台南府居欉á林，后转

新港to̍h是chit-má新市乡，而扩到山顶乡，到文贵公（按顺义之阿祖）始入岗林（通称岗á林）开拓到taⁿ……。其实，江苏省而且无设置新港府。「满车功五品衔顺义李公佳墓」是同治甲戌（13 年）腊月所立者；有刻祖籍「新港」，伊ê所应该是平埔四大社之一新港社。Koh再读必麒麟册，就知必麒麟先访新港，得乡长绍介，偕马雅各医生往访有同族人ê番社，第一khiā岗á林，见头目，该员向清政府负责社务。此头目thang推断是李顺义，而伊是新港社ê同族人。李顺义传五子二女，长女凉娘、大kiáⁿ登旺、第二kiáⁿ登发、第三kiáⁿ登富（过三房）、四子登炎，五子登科、末女发金。（登发是嘉嵩ê阿公。）

《100 年来》是一本台湾教界难得ê传教者自传，自先阿公们讲起，包括一生回顾kah展望。听讲接替徐谦信牧师tī台湾神学院授「台湾教会史」ê吴文雄牧师特别要求学生tī第一礼拜阅读chit本册云。


――《台湾教会公报》1917 期 主后 1988 年 11 月 27 日