《赖永祥讲书》

 | | | 转寄

《教会史话》修订1_030, 巴克礼增补杜辞典

作者 赖永祥 2019.09.15

巴克礼牧师是1873年春天毕业格拉斯哥大学神学院ê。晚年伊回忆讲： Tī我大学ê生涯内底，我无想tio̍h海外宣教，直到siōng尾一年……有一工，院长杜乔治博士（Dr. George Douglas）ê小弟，to̍h是厦门tńg来ê杜嘉德牧师，来到学校招募前往中国ê宣教师。……暗时，院长邀请一kóa学生kah杜嘉德牧师见面，当时杜牧师当teh从事厦门腔汉英辞典ê出版工作。伊hō͘ 阮看辞典ê校对稿样，我kā伊讲看起来印kah iáu bē bái。伊讲：「无m̄-tio̍h！当你来到中国，相信你一定ē发见chit-ê字典有非常ê用途」。以后伊写phoe劝我，随时kah伊动身，m̄免koh再读完神学课程，tī中国宣教师ê需要是迫切ê……m̄-koh，我当时无答应伊ê建议（Band, Barclay of Formosa, pp. 17-18）。巴克礼ê来台是1875年。

杜嘉德牧师编着ê《厦英大辞典》一向是宣教师学习厦门腔siōng好ê参考书。M̄-koh，出版以后经过将近半世纪之间，中国大变，新科学用语（亲像电器方面）、社会用语以及真chē新字lóng无tī chit本辞典内面。为tio̍h适应时代ê需要，1913年tī台湾kah厦门ê众同工，请巴克礼牧师做补遗ê工作。In知影巴牧师几十年来一直teh学习当地ê语言，而且kā所听tio̍h ê用语，m̄管好bái lóng做记录。巴牧师受托，就tī续落来ê十年中间，利用làng-phāng时间，整理伊收集杜牧师大辞典所无ê字汇片语。众同工mā提供真chē资料，其中梅监务牧师（Rev. Campbell N. Moody）提供四百gōa张字汇kah备忘录siōng-kài可贵。

资料收集齐全以后，巴博士tī厦门用三、四个月ê时间编纂整理，tī 1922年自英国休假tńg来以后，随时前往上海，交商务印书馆印刷。当时受选协助巴博士牧师作siōng尾ê校订kah监印者是杨士养牧师（1898–1975）。杨牧师tī 1919年tùi台南神学院毕业，受选ê时tú tùi日本东京明治学院深造tńg来，任传道师；tòe巴牧师赴上海监印ê时，只好「暂别含情脉脉ê新娘（黄千金）kah tú出世五个月ê kiáⁿ（长男凤生）」。

隔tńg年1923年，《增补厦英大辞典》（ “Supplement to Dictionary of the Vernacular of Spoken Language of Amoy”），终其尾出版。序kah说明5页，辞典276页，篇幅约有杜原着ê二分之一。原着无汉字对照，m̄-koh增补就有汉字；伊ê拚音方法尽可能kah原着一致。因为伊ê资料收集完备、说明清楚详尽，出版后随时受tio̍h普遍ê欢迎。1970年台北古亭书屋kā杜原着kah巴增补合订重版，加题中文书名《厦英大辞典》。

――《台湾教会公报》1904期 主后1988年8月28日



增补杜辞典