《赖永祥讲书》

 | | | 转寄

《教会史话》(2_138)刘光求族系

作者 赖永祥 2010.02.28

「台南刘..家」是台湾基督教家族siōng早ê其中一ê。刘光求（1826-1887年）是府城二老口教会ê老信徒。其中无仝老爸ê小弟高耀（高德耀）是府城siōng早受洗7-ê ê其中一ê，做府城初代ê长老。Góa tit-tio̍h刘锡五纂「刘光求来台湾族系纪录」（稿影本），真欢喜。

刘光求，幼名壠，是刘昆华、李晋ê孤kiáⁿ，tī福建省泉州府孝悌巷出世，5岁老爸死..去。1849年来台湾，入兵营，官章春生，送五品军功，諡瑞祥。因为长久以来lóng是leh无闲军务所以无siahN2财产，一直lóng tiām-tiām-á信教。来台湾ê时阵户籍tī府城温陵妈庙西北统领巷，后来sòe厝tòa tī上帝庙后壁、太平境、元会境ê后，tio̍h搬去二老口医馆附近。Kàu chit-má伊ê后代koh真chē人tòa tī这附近，就是博爱路、青年路、兴华街。

光求妻李朗（1840-1899年）真久以来lóng m̄肯tùi翁婿入教，所以in两ê kiáⁿ头一ê受洗ē是高德耀收养ê第三ê kiáⁿ麒凤（瑞山）。台南太平境教会有保存「台南市姓名簿」（1872-1915年），是1914年重新整理kòe..ē。chit本册登记第1号，同治11年8月20（即1872年9月22）倪牧师（倪为霖，Rev. William Macgregor, 厦门来者）施洗，名高麒凤，高耀子，五岁。麒凤tī 1867年12月18出世。[黄茂卿写讲：「太平境马雅各教会设教九十年史」第99页，无小心断做高天赐受洗]。瑞山后来复姓刘。

光求长男麒麟（又名瑞仁）是1884年5月18由巴克礼牧师领洗..ē，1909年2月13 kòe身（台南教会报228期1909年3月p.24）。四男锡五（幼名天福，koh叫做瑞临）受洗koh-khah晚，tī 1913年3月30由高金声牧师领洗。二男大粒（端琛）无归主。

光求第3代多人有「主」ê名，原因就是信主。「主」kap「子」，闽南音仝款，所以tiāⁿ-tiaⁿ相通。麒麟生（大房）ê有，主能（主龙）、主恩（子恩）、主护（子厚）、主足（主爵）；瑞山所生（三房）有，主灯（青云）、主安、主祥（子祥）、主来（青江）、主忠（青和）、主义（青波）；锡五所生（四房）有，主送（清风）、主照（青黎）。瑞山七子青眼（意思是欢喜正视者ê目睭；「白眼」ê倒péng），倒是例外，m̄-koh伊是仝辈唯一有牧师名ē。

王瑞山大kiáⁿ主灯，后来lóng用林燕臣牧师（是秀才）hō ê学名「青云」（古人讲志愿远大ia̍h是高洁志操是青云之志）。青云ê大汉后生改造，tī 1985年正月编印「刘光求来台族系族谱」油印分分hō͘亲族，收录光求裔，无分男女，翁á某ê名lóng有记，真详细。族人tī社会往教会ê事绩，另gōa记。

《台湾教会公报》 2032期 主后1991年2月初10