《押韵启应诗篇》

 | | | 转寄

台语押韵启应诗篇 90

作者 Tīⁿ Jî-gio̍k 2007.11.04

90　　Siōng-tè ê lâng Mô͘-se ê kî-tó.

1　CHÚ AH, LÍ TA̍K SÈ-TĀI CHÒE GÓAⁿ KHIĀ-KHÍ Ê SÒ͘-CHĀI.
　　主 啊，你 逐 世 代 做 阮 居 起 的 所 在。

2a　Chiah-ê soaⁿ iáu-bē siⁿ-chhut soaⁿ-chē,
　　诸 些 山 尚 未 生 出 山 寨，
　　tōe kap sè-kài Lí iáu-bē chō-chiâⁿ pòaⁿ-tè ,
　　地 及 世 界 你 尚 未 造 成 半 块，

2b　　　Tùi éng-oán kàu éng-oán Lí sī Siōng-tè .
　　　　自 永 远 到 永 远 你 是 上 帝。

3a　Lí hō͘ lâng kui-thô͘,
　　你 使 人 归 土，

3b　　　Kóng, Lín sè-kan lâng tio̍h kui-chó͘.
　　　　讲， 恁 世 间 人 着 归 祖。

4a　In -ūi chāi Lí khòaⁿ,
　　因 为 在 你 看，
　　chi̍t-chheng nî chhin-chhiūⁿ í -keng kè--khì ê chā-ji̍t ; 　　
　　一 千 年 亲 像 已 经 过 去 的 昨 日；

4b　　　Koh chhin-chhiūⁿ mî-kan ê chi̍t-kiⁿ siau-sit .
　　　　又 亲 像 暝 间 的 一 更 消 失。

5a　Lí chhin-chhiūⁿ ēng tōa-chúi kā in lâu--khì;
　　你 亲 像 用 大 水 给 伊 流 去；
　　in chhin-chhiūⁿ khùn chi̍t-chhíⁿ,
　　伊 亲 像 睡 一 醒，

5b　　　Chá-khí-sî in chhin-chhiūⁿ chháu hoat-siⁿ.
　　　　早 起 时 伊 亲 像 草 发 生。

6a　Chá-khí-sî hoat-siⁿ bō͘-sēng;
　　早 起 时 发 生 茂 盛；

6b　　　Ē- hng-sî siū-koah chiū ko͘-tâ chēng-chēng.
　　　　暝 昏 时 受 割 就 枯 焦 静 静 。

7a　In-ūi goán tùi Lí ê siū-khì chiū siau-bia̍t bô miâ,
　　因为 阮 对 你 的 怒 气 就 消 灭 无 名，

7b　　　Koh goán tùi Lí ê hoat-sèng lâi kiaⁿ-hiâⁿ.
　　　　又 阮 对 你 的 发 性 来 惊 惶。

8a　Lí chiong goán ê chōe-ok pâi tī Lí ê bīn-chêng,
　　你 将 阮 的 罪 恶 排 在 你 的 面 前 ，

8b　　　Chiong goán ún-ba̍t ê pháiⁿ pâi tī Lí ê bīn ê kng-bêng.
　　　　将　　阮 隐 密 的 恶 排 在 你 的 面 的 光 明。

9a　Goán ê ji̍t-chí lóng keng-kè tī Lí ê tōa siū-khì;
　　阮 的 日 子 拢 经 过 在 你 的 大 怒 气；

9b　　　Goán ê nî-hè kè liáu,chhin-chhiūⁿ thó͘ chi̍t-ê khùi chiū bô--khì.
　　　　阮 的 年 岁 过 了，亲 像 吐 一 个 气 就 无 去。

10a　Goán it-seng ê nî-ji̍t sī chhit-cha̍p hè ,
　　　阮 一 生 的 年 日 是 七 十 岁，

10b　　　Nā-sī ióng-chòng thang kàu poeh-cha̍p hè ,
　　　　　若 是 勇 壮 通 到 八 十 岁，

10c　Chóng-sī kî-tiong só͘ khoa-kháu--ê , put-kò sī lô-khó͘ iu-chhiû;
　　　总 是 其 中 所 夸 口 的, 不 过 是 劳 苦 忧 愁 ；

10d　　　I kín-kín kè , goán chiū pe-khì phiau-liû .
　　　　　它紧 紧 过，阮 就 飞 去 飘 流。

11a　Siáⁿ-lâng chai Lí siū-khì ê koân-sè ,
　　　甚 人 知 你 怒 气 的 权 势，

11b　　　Ia̍h chiàu Lí eng-kai siū ê kèng-lé , chai Lí ê siū-khì bô thè?
　　　　　亦 照 你 应 该 受 的 敬 礼，知 你 的 怒 气 无 退？

12a　Kiû Lí kà-sī goán, cháiⁿ-iūⁿ sǹg ka-kī ê ji̍t-chí;
　　　求 你 教 示 阮， 怎 样 算 自 己 的 日 子；

12b　　　Hō͘ goán tit-tio̍h tì-hūi ê sim siú kí .
　　　　　使 阮 得 着 智慧 的 心 守 己。

13a　Iâ-hô-hoa ah, beh kàu tī-sî--ni̍h? Kiû Lí tò-tńg;
　　　耶 和 华 啊，要 到 底 时 呢？ 求 你 倒 返；

13b　　　Ūi-tio̍h Lí ê lô͘-po̍k lâi hôe Lí ê sim nńg.
　　　　　为 着 你 的 奴 仆 来 回 你 的 心 软。

14a　Kiû Lí chá-khí-sî ēng Lí ê chû-ài kā goán chiok-hok,
　　　求 你 早 起 时 用 你 的 慈 爱 给 阮 祝 福，

14b　　　Hō͘ goán chi̍t-sì-lâng hoaⁿ-hí khoài-lo̍k.
　　　　　使 阮 一 世 人 欢 喜 快 乐。

15a　Kiû Lí chiàu Lí khó͘-chhó͘ goán ê ji̍t-chí,
　　　求 你 照 你 苦 楚 阮 的 日 子，

15b　　　Chiàu goán tú-tio̍h hoān-lān ê nî , hō͘ goán hoaⁿ-hí .
　　　　　照 阮 遇 着 患 难 的 年，使 阮 欢 喜。

16a　Goān Lí ê só͘-chòe tùi Lí ê lô͘ -po̍k hián-hiān,
　　　愿 你 的 所 做 对 你 的 奴 仆 显 现，

16b　　　Lí ê êng-kng tùi in ê kiáⁿ-sun chhut-kiàn.
　　　　　你 的 荣 光 对 伊 的 子 孙 出 见。

17a　Goān Chú goán ê Siōng-tè ê bí-biāu,
　　　愿 主 阮 的 上 帝 的 美 妙，

17b　　　Tiàm-tī goán ê téng-bīn hoat-chhut êng-iāu.
　　　　　站 在 阮 的 顶 面 发 出 荣 耀。

17c　Goān Lí kian-kò͘ goán ê chhiú só͘ chòe ê kang,
　　　愿 你 坚 固 阮 的 手 所 做 的 工，

17d　　　Goán ê chhiú só͘ chòe ê kang, goān Lí kian-kò͘ i bô tín-tāng.
　　　　　阮 的 手 所 做 的 工， 愿 你 坚 固 它 无 振 动。