《押韵启应诗篇》

 | | | 转寄

台语押韵启应诗篇 88

作者 Tīⁿ Jî-gio̍k 2007.10.14

88　　Khó-la̍h hō͘-è ê si-koa , chiū-sī Í-sū-la̍h-lâng Hi-bān kà-sī ê si ; kau hō͘ Ga̍k-koaⁿ ;　tiāu , ēng Mô͘-ha̍p-la̍h Lī-àm-ngô͘ .

1a　Iâ-hô-hoa , kiù góa ê Siōng-tè ah ,
　　耶 和 华， 救 我 的 上 帝 啊，

1b　　　Góa mî-ji̍t tī Lí ê bīn-chêng kiû-kiò lah,
　　　　我 暝 日 在 你 的 面 前 求 叫 啦，

2a　Goān góa ê kî -tó kàu Lí ê bīn-chêng;
　　愿 我 的 祈 祷 到 你 的 面 前 ；

2b　　　Kiû Lí àⁿ hī-khang thiaⁿ góa ê kiû-chêng.
　　　　求 你 俯 耳 孔 听 我 的 求 情 。

3a　In -ūi góa ê sim móa-móa hoān-lān,
　　因 为 我 的 心 满 满 患 难，

3b　　　Góa ê sìⁿ-miā kūn tī im-kan.
　　　　我 的 性 命 近 在 阴 间。

4a　Góa sǹg kap lo̍h-hia̍t ê lâng tâng-lia̍t tī thô͘-khang;
　　我 算 与 落 穴 的 人 同 列 在 土 孔 ；

4b　　　Iā chhin-chhiūⁿ bô tit-tio̍h pang-chān ê lâng.
　　　　也 亲 像 无 得 着 帮 助 的 人。

5a　Góa siū hiat-ka̍k kap sí-lâng tông-chāi,
　　我 受 弃 掷 与 死 人 同 在，

5b　　　Chhin-chhiūⁿ siū-thâi ê lâng tó tī bōng-lāi;
　　　　亲 像 受 杀　　的 人 倒 在 墓 内；

5c　In sī Lí bô koh kì--tit-- ê ,
　　伊 是 你 无 复 记 得 的，

5d　　　Tùi Lí ê chhiú keh-tn̄g--ê .　　
　　　　对 你 的 手 隔 断 的。

6a　Lí hē góa tī ke̍k-chhim ê hia̍t;
　　你 置 我 在 极 深 的 穴；

6b　　　Tī chhim-ian o͘-àm ê tōe-hng bōe hun-pia̍t.
　　　　在 深 渊 黑暗 的 地 方 不 分 别。

7a　Lí ê siū-khì tāng-tāng teh góa;
　　你 的 怒 气 重 重 压 我；

7b　　　Lí ēng Lí it-chhè ê hái-éng khó͘-chhó͘ khún-pek góa.
　　　　你 用 你 一 切 的 海 浪 苦 楚 窘 迫 我。

8a　Kap góa sio-bat ê lâng Lí hō͘ in m̄-káⁿ kūn-óa góa,
　　与 我 相 识 的 人 你 使 伊 不 敢 近 倚 我，
　　 hō͘ in iàm-ò͘ⁿ góa;
　　 使 伊 厌 恶 我；

8b　　　Góa siū koaiⁿ-kìm, bōe-tit chhut-lâi chhōe oa̍h.
　　　　我 受 关 禁， 不 得 出 来 寻 活。

9a　Góa ê ba̍k-chiu in-ūi khùn-khó͘ phah-pháiⁿ;
　　我 的 眼 睛 因 为 困 苦 打 坏；

9b　　　Iâ-hô-hoa ah , góa ji̍t-ji̍t kiû-kiò Lí ê úi -tāi ,
　　　　耶 和 华 啊，我 日 日 求 叫 你 的 伟 大，
　　　　góa ǹg Lí kia̍h-chhiú kúi nā pái.
　　　　我 向 你 举 手 几 若 次。

10a　Lí kiám beh kiâⁿ kî-sū hō͘ sí-lâng khòaⁿ mah?
　　　你 岂 要 行 奇 事 使 死 人 看 吗？

10b　　　Chóng-bô im-hûn iáu ōe khí-lâi o -ló Lí ah ?
　　　　　总 无 阴 魂 犹 会 起 来 赞 美 你 啊？

11a　Kiám ōe tī bōng-lāi kóng-khí Lí ê chû-ài mah?
　　　岂 会 在 墓 内 讲 起 你 的 慈 爱 吗？

11b　　　Kiám ōe tī bia̍t-bô ê tiong-kan kóng-khí Lí ê sìn-si̍t mah?
　　　　　岂 会 在 灭 无 的 中 间 讲 起 你 的 信 实 吗？

12a　Tī o͘-àm ê só͘-chāi, kiám ōe chai Lí ê kî- sū mah?
　　　在 黑 暗 的 所 在， 岂 会 知 你 的 奇 事 吗？

12b　　　Tī bōe-kì-tit tāi-chì ê tōe-hng,kiám ōe chai Lí ê kong-gī mah?
　　　　　在 不 记 得 事 情 的 地 方，岂 会 知 你 的 公 义 吗？

13a　Iâ-hô-hoa ah , góa ū kî-kiû Lí bô thêng,
　　　耶 和 华 啊，我 有 祈 求 你 无 停，

13b　　　Tī chá-khí-sî góa ê kî -tó beh thàu kàu Lí ê bīn-chêng.
　　　　　在 早 起 时 我 的 祈 祷 要 透 到 你 的 面 前。

14a　Iâ-hô-hoa ah , Lí siáⁿ-sū khì-sak góa?
　　　耶 和 华 啊， 你 甚 事 弃 舍 我？

14b　　　Siáⁿ-sū ng Lí ê bīn, m̄ khòaⁿ góa?
　　　　　甚 事 掩 你 的 面， 不 看 我？

15a　Góa tùi siàu-liân siū-khó͘, hiám-hiám sí ;
　　　我 对 少 年 受 苦， 险 险 死；

15b　　　Góa siū-tio̍h Lí ê kiaⁿ-hiâⁿ, tì-kàu sim loān-loān--khì.
　　　　　我 受 着 你 的 惊 惶 ， 致 到 心 乱 乱 去。

16a　Lí ê tōa siū-khì im-ba̍t góa;
　　　你 的 大 怒 气 淹 密 我；

16b　　　Lí ēng kiaⁿ-hiâⁿ tû-bia̍t góa.
　　　　　你 用 惊 惶 除 灭 我。

17a　Chiah-ê thong-ji̍t chhin-chhiūⁿ chúi ûi góa;
　　　诸 些 通 日 亲 像 水 围 我；

17b　　　Chi̍t-chôe lâi ûi-khùn góa. 　　
　　　一 齐 来 围 困 我。

18a　Lí chiong góa ê liông-pêng bi̍t-iú keh-khui hn̄g-hn̄g;
　　　你 将 我 的 良 朋 密 友 隔 开 远 远；

18b　　　Hō͘ góa só͘ saⁿ-bat ê lâng ji̍p tī o͘-àm ê tōe-hng.
　　　　　使 我 所 相 识 的 人 入 在 黑暗 的 地 方。