《押韵启应诗篇》

 | | | 转寄

台语押韵启应诗篇 73

作者 Tīⁿ Jî-gio̍k 2007.06.17

73　　A-sat ê si.

1a　Siōng-tè si̍t-chāi hó khoán-thāi Í -sek-lia̍t,
　　上 帝 实 在 好 款 待 以 色 列，

1b　　　Hó khoán-thāi hiah-ê lâng sim chheng-kiat.
　　　　好 款 待 那 些 人 心 清 洁。

2a　Chóng-sī lūn-kàu góa, góa ê kha hiám-hiám ta̍h-thu̍t--khì,
　　总 是 论 到 我， 我 的 脚 险 险 踏 臼 去，

2b　　　Góa ê kha hiám-hiám chhū--lo̍h-khì.
　　　　我 的 脚 险 险 趄 落 去。

3a　In-ūi góa khòaⁿ-kìⁿ pháiⁿ-lâng kap kiau-ngō͘ ê lâng heng-ōng,
　　因为 我 看 见 歹 人 及 骄 傲 的 人 兴 旺，

3b　　　Hit-sî góa chiū put-pêng hoat-kông.
　　　　彼 时 我 就 不 平 发 狂。

4a　In-ūi in sí ê sî bô thàng-thiàⁿ,
　　因 为 伊 死 的 时 无 疼 痛，

4b　　　In ê khùi-la̍t iā ióng-kiāⁿ.
　　　　伊 的 气 力 也 勇 健。

5a　In bô chhin-chhiūⁿ pa̍t-lâng lô-khó͘,
　　伊 无 亲 像 别 人 劳 苦，

5b　　　Iā bô chhin-chhiūⁿ pa̍t-lâng siū chai-ē ná beh lo̍h-thô͘.
　　　　也 无 亲 像 别 人 受 灾 祸 若 要 落 土。

6a　Só͘- í ēng kiau-ngō͘ chòe liān-á kòa tī in ê ām-kún,
　　所 以 用 骄 傲 做 链 仔 挂 在 伊 的 颔 颈，

6b　　　Ēng pō-gio̍k chòe i-chiûⁿ jia in ê seng-khu ê hoe-bûn.
　　　　用 暴 虐 做 衣 裳 遮 伊 的 身 驱 的 花 纹。

7a In in -ūi sin-thé pûi-chut-chut,
　　伊 因 为 身 体 肥 淬 淬，

7b　　　Ba̍k-chiu chiū phòng-chhut;
　　　　眼 睛 就 膨 出 ；


7c　In só͘ tit-tio̍h-ê ,
　　伊 所 得 着 的，

7d　　　Iâⁿ-kè sim só͘ ài--ê .
　　　　赢 过 心 所 爱 的。

8a　In ki-chhì, chiàu pháiⁿ ì -sù kóng chè-ap lâng ê ōe ;
　　伊 讥 刺， 照 歹 意 思 讲 制 压 人 的 话；

8b　　　In kóng tōa-ōe .
　　　　伊 讲 大 话。

9a　In ê chhùi siat-to̍k thiⁿ,
　　伊 的 嘴 亵 渎 天，

9b　　　In ê chi̍h ho͘-hoah choân-tōe kàu hái-piⁿ.
　　　　伊 的 舌 呼 喊 全 地 到 海 边。

10a　Só͘- í in ê peh-sìⁿ iā kui-óa in ,
　　所 以 伊 的 百 姓 亦 归 倚 伊，

10b　　　Chiap-la̍p in kap in tàu-tīn. 　　
　　　接 纳 伊 与 伊 到 阵。

11a　In kóng: Siōng-tè thái-thó ōe chai mah?
　　　伊 讲： 上 帝 岂 可 会 知 吗？

11b　　　Chì-koân--ê kiám ōe hiáu-tit mah?
　至 高 者 岂 会 晓 得 吗？

12a　Khòaⁿ, chiah-ê chiū-sī pháiⁿ-lâng;
　　　看 ， 诸 些 就 是 歹 人；

12b　　　In siông-siông an-ia̍t, châi-pó ná ke-tāng.
　　　　　伊 常 常 安 逸， 财 宝 愈 加 重。

13a　Góa sóe-chheng góa ê sim si̍t-chāi khang-khang;
　　　我 洗 清 我 的 心 实 在 空 空 ；

13b　　　Góa sóe chhiú piáu-sī bô chōe iā sī khang-khang.
　　　　　我 洗 手 表 示 无 罪 也 是 空 空 。

14a　In-ūi góa thong-ji̍t tú-tio̍h chai-ē ,
　　　因 为 我 通 日 遇 着 灾 祸，

14b　　　Ta̍k chá-khí siū chek-pī tio̍h khut-kē .
　　　　　逐 早 起 受 责 备 着 屈 低。

15a　Góa nā siūⁿ, góa beh án-ni kóng chin,
　　　我 若 想， 我 要 按 呢 讲 真，

15b　　　Che sī ēng kan-chà khoán-thāi Lí āu-tāi ê chú-bîn.
　　　　　这 是 用 奸 诈 款 待 你 后 代 的 子 民。

16a　Góa teh siūⁿ ài bêng-pe̍k chit-ê lí ,
　　　我 在 想 爱 明 白 此 个 理，

16b　　　Khòaⁿ-liáu si̍t-chāi ûi-lân sit-chì.
　　　　　看 了 实 在 为 难 失 志。

17a　Kàu góa ji̍p Siōng-tè sèng--ê só͘-chāi,
　　　到 我 入 上 帝 圣 的 所 在，

17b　　　Siōng-tè siūⁿ in ê kiat-kio̍k.
　　　　　上 帝 想 伊 的 结 局。

18a　Lí si̍t-chāi chiong in hē tī ku̍t-ku̍t ê tōe,
　　　你 实 在 将 伊 下 在 滑 滑 的 地，

18b　　　Hō͘ in poa̍h tī tîm-lûn ê tiong-kan bô tóe.
　　　　　使 伊 跌 在 沈 沦 的中 间 无 底。

19a　In ba̍k-nih-kú chiâⁿ-chòe hiah-ni̍h chhiⁿ-chhìn;
　　　伊 目 瞬 久 成 做 许 呢 凄 凊；

19b　　　In hō͘ kiaⁿ-hiâⁿ bia̍t kàu it- chīn.
　　　　　伊 使 惊 惶 灭 到 一 尽。

20a　Lâng khùn cheng-sîn cháiⁿ-iūⁿ khòaⁿ i ê bāng-siōng,
　　　人 睡 精 神 怎 样 看 他的 梦 相，

20b　　　Chú ah , Lí cheng-sîn iā beh án-ni khòaⁿ-khin in ê iáⁿ-siōng.
　　　　　主 啊，你 精 神 也 要 按 呢 看 轻 伊 的 影 像。

21a　In-ūi góa ê sim chin sng ak-chak,
　　　因 为 我 的 心 真 酸 烦 躁，

21b　　　Góa ê chōng-hú chhì-chha̍k.
　　　　　我 的 脏 腑 刺 凿。

22a　Góa chit-khoán ê gû-gōng bû -ti ;
　　　我 此 款 的 愚 戆 无 知；

22b　　　Tī Lí ê bīn-chêng chhin-chhiūⁿ chi̍t-poaⁿ ê cheng-siⁿ.
　　　　　在 你 的 面 前 亲 像 一 般 的 牲 畜。

23a　Chóng-sī góa siông-siông kap Lí tī--teh,
　　　总 是 我 常 常 与 你 在 的，

23b　　　Lí khan góa ê chiàⁿ-chhiú khiā--teh.
　　　　　你 牵 我 的 右 手 khiā 着。

24a　Lí beh ēng Lí ê kà-sī ín-chhōa góa hiòng chiâu-chn̂g.
　　　你 要 用 你 的 教 示 引 导 我 向 齐 全，

24b　　　Āu-lâi beh chiap-la̍p góa ji̍p tī êng-kng.
　　　　　后 来 要 接 纳 我 入 在 荣 光。

25a　Lí í- gōa tī tōe--ni̍h góa ū siáⁿ-lâng teh khòaⁿ-kò͘ ?
　　　你 以 外 在 地 里 我 有 谁 人 在 看 顾？

25b　　　Lí í- gōa tī tōe--ni̍h góa bô só͘ him-bō͘ .
　　　　　你 以 外 在 地 里 我 无 所 欣 慕。

26a　Góa ê jio̍k-thé, góa ê sim-tn̂g siau-bô kàu bô chi̍t-ê khoán.
　　　我 的 肉 体，我 的 心 肠 消 无 到 无 一 个 款 。

26b　　　Chóng-sī Siōng-tè sī góa sim-koaⁿ ê la̍t-goân,
　　　　　总 是 上 帝 是 我 心 肝 的 力 源，
　　　　iā sī góa ê ki-gia̍p ti̍t-kàu éng-oán.
　　　　　也 是 我 的 基业 直 到 永 远。

27a　Lī-khui Lí hn̄g-hn̄g--ê ,
　　　离 开 你 远 远 的，

27b　　　Tek-khak sí-bô ;
　　　　　的 确 死 无；

27c　Hoān-nā pàng-sak Lí kiâⁿ kan-îm--ê ,
　　　凡 若 放 舍 你 行 奸 淫 的，

27d　　　Lí lóng kā in bia̍t-bô .
　　　　　你 拢 使 伊 灭 无。

28a　Chóng-sī góa chiū-kūn Siōng-tè sī góa ê hó kai-chài,
　　　总 是 我 就 近 上 帝 是 我 的 好 该 哉，

28b　　　Góa ēng Chú Iâ-hô-hoa chòe góa siám-pī ê só͘-chāi,
　　　　　我 用 主 耶 和 华 做 我 闪 避 的 所 在，

　　　　THANG HŌ͘ GÓA KÓNG-KHÍ LÍ IT-CHHÈ Ê SÒ͘-CHÒE KAP KAU-TĀI.
　　　　　通 使 我 讲 起 你 一 切 的 所 做 与 交 代。