《押韵启应诗篇》

 | | | 转寄

台语押韵启应诗篇 66

作者 Tīⁿ Jî-gio̍k 2007.04.15

66　　Chi̍t-phiⁿ si-koa; kau hō͘ Ga̍k-koaⁿ.

1a　Choân-tōe lóng tio̍h tùi Siōng-tè ,
　　全 地 拢 着 对 上 帝，

1b　　　Lâi chhut hoaⁿ-hí ê siaⁿ tâng-chê.
　　　　来 出 欢 喜 的 声 同 齐。

2a　Chhiùⁿ-koa o -ló I ê miâ ê êng-kng;
　　唱 歌 赞 美 他 的 名 的 荣 光；

2b　　　Ēng o -ló ê ōe lâi hián-bêng I ê êng-kng.
　　　　用 赞 美 的 话 来 显 明 他 的 荣 光。

3a　Tio̍h tùi Siōng-tè kóng-bêng,
　　着 对 上 帝 讲 明，

3b　　　Lí ê só͘-chòe kàu hiah thang kiaⁿ!
　　　　你 的 所 做 到 许 通 惊！

3c　In -ūi Lí ê tōa koân-lêng,
　　因 为 你 的 大 权 能，

3d　　　Lí ê tùi-te̍k beh hâng-ho̍k Lí bô siaⁿ.
　　　　你 的 对 敌 欲 降 服 你 无 声。

4a　Choân-tōe beh kèng-pài Lí , gîm-si o -ló Lí ;
　　全 地 要 敬 拜 你， 吟 诗 赞 美 你；

4b　　　Beh gîm-si o -ló Lí ê miâ ji̍t kap mî .
　　　　要 吟 诗 赞 美 你 的 名 日 及 暝。

5a　Lín tio̍h lâi ,
　　恁 着 来，

5b　　　Lâi khòaⁿ Siōng-tè só͘-kiâⁿ ê sū tī tāi -tāi,
　　　　来 看 上 帝 所 行 的 事 在 代 代，

5c　I tùi sè-kan-lâng só͘-chòe--ê ,
　　他 对 世 间 人 所 做 的，

5d　　　Put-chí thang kiaⁿ teh kéng-sè .
　　　　不 止 通 惊 在 警 世。

6a　I chiong hái piàn-chòe ta -tōe;
　　他 将 海 变 做 干 地；

6b　　　I pō͘-kiâⁿ kè hô-khoe; tī hia goán hoaⁿ-hí , in-ūi I ê só͘-chòe.
　　　　他步 行 过 河 溪； 在 彼 阮 欢 喜，因为 他的 所 做。

7a　I ēng I ê koân tī -lí ti̍t kàu éng-oán;
　　他 用 他 的 权 治 理 直 到 永 远；
　　I ê ba̍k-chiu kàm-chhat lia̍t-pang bô tî -oān,
　　他 的 目 珠 鉴 察 列 邦 无 迟 缓，

7b　　　Pōe-ge̍k ê lâng m̄-thang chū-ko chū-choan.
　　　　悖 逆 的 人 不 通 自 高 自 专 。

8a　Bān peh-sìⁿ ah , lín tio̍h o -ló goán ê Siōng-tè ;
　　万 百 姓 啊， 恁 着 赞 美 阮 的 上 帝；

8b　　　Hō͘ lâng thiaⁿ-kìⁿ o -ló I ê siaⁿ tī thiⁿ-ē .
　　　　使 人 听 见 赞 美 他 的 声 在 天 下。

9a　I hō͘ goán ê sìⁿ-miā oa̍h-teh ū ǹg-bāng,
　　他 使 阮 的 性 命 活 着 有 盼 望 ，

9b　　　Ia̍h bô hō͘ goán ê kha iô-tāng. 　　
　　亦 无 使 阮 的 脚 摇 动。

10a　Siōng-tè ah , Lí bat chhì-giām goán;
　　　上 帝 啊，你 曾 试 验 阮；

10b　　　Chhin-chhiūⁿ thoàn-liān gûn chi̍t-iūⁿ iā thoàn-liān goán.
　　　　　亲 像 锻 练 银 一 样 也 锻 练 阮。

11a　Lí hō͘ goán ji̍p lô-bāng lâi kín-tiuⁿ,
　　　你 使 阮 入 罗 网 来 紧 张，

11b　　　Ēng tāng-tàⁿ hē tī goán ê sin-chiūⁿ.
　　　　　用 重 担 放 于 阮 的 身 上。

12a　Lí hō͘ lâng chē chhia-bé ,
　　　你 使 人 坐 车 马，

12b　　　Pôaⁿ-kè goán ê thâu-khak;
　　　　　过 阮 的 头 壳；

12c　Goán keng-kè chúi-hé .
　　　 阮 经 过 水 火。

12d　　　Chóng-sī Lí hō͘ goán kàu pù-ū ê thó͘-tē .
　　　　　总 是 你 使 阮 到 富 有的 土 地。

13a　Góa beh ēng sio-chè chìn-ji̍p Lí ê chhù;
　　　我 要 用 烧 祭 进 入 你 的 厝；

13b　　　Góa beh tùi Lí siā góa ê goān kú-kú.
　　　　　我 要 对 你 谢 我 的 愿 久 久。

14a　Chiū-sī tī góa hoān-lān ê sî ,
　　　就 是 在 我 患 难 的 时，

14b　　　Góa ê chhùi-tûn só͘ kóng khí, góa ê chhùi só͘ hē-goān ê tāi-chì .
　　　　　我 的 嘴 唇 所 讲 起，我 的 嘴 所 下 愿 的 事 情。

15a　Góa beh ēng pûi ê cheng-siⁿ ê sio-chè lâi hiàn hō͘ Lí ,
　　　我 要 用 肥 的 精 牲 的 烧 祭 来 献 给 你，

15b　　　Kap kang-iûⁿ ê phang-bī hiàn hō͘ Lí ;
　　　　　及 公 羊 的 芳 味 献 给 你；
　　　　Koh ēng kang ê gû , kang ê soaⁿ-iûⁿ, lâi hiàn hō͘ Lí .
　　　　　复 用 公 的 牛，公 的 山 羊，来 献 给 你。

16a　Hoān-nā kèng-ùi Siōng-tè ê lâng, lín lóng tio̍h lâi thiaⁿ;
　　　凡 若 敬 畏 上 帝 的 人， 恁 拢 着 来 听；

16b　　　Góa beh kóng-khí I ūi góa só͘ kiâⁿ ê sū chi̍t-kiāⁿ chi̍t-kiāⁿ.
　　　　　我 欲 讲 起 他 为 我 所 行 的 事 一 件 一 件。

17a　Góa bat ēng góa ê chhùi kiû-kiò I ;
　　　我 曾 用 我 的 嘴 求 叫 他；

17b　　　Ēng góa ê chi̍h o -ló I chòe koân bû -jī .
　　　　　用 我 的 舌 赞 美 他 做 高 无 二。

18a　Góa nā sim-lāi chù-tiōng chōe-ok,
　　　 我 若 心 内 注 重 罪 恶，

18b　　　Chú tek-khak bô beh thiaⁿ góa ê kiû-thok.
　　　　　主 的 确 无 要 听 我 的 求 托。

19a　Chóng-sī Siōng-tè si̍t-chāi ū teh thiaⁿ,
　　　总 是 上 帝 实 在 有 在 听，

19b　　　Í- keng àⁿ-lo̍h thiaⁿ góa kî -tó ê siaⁿ.
　　　　　已 经 俯 落 听 我 祈 祷 的 声。

20a　Siōng-tè sī eng-kai siū o-ló ,
　　　上 帝 是 应 该 受 赞美，

20b　　　I bē-bat the-sî góa ê kî -tó ,
　　　　　他 未 曾 推 辞 我 的 祈 祷，
　　　　ia̍h bē-bat hō͘ I ê chû-ài kā góa phah bô .
　　　　　亦 未 曾 让 他 的 慈 爱 给 我 打 无。