《押韵启应诗篇》

 | | | 转寄

台语押韵启应诗篇 55

作者 Tīⁿ Jî-gio̍k 2007.01.28

55　　Tāi-pi̍t kà-sī ê si ; kau-hō͘ Ga̍k-koaⁿ ; ēng si-hiân ê ga̍k-khì.

1a　Siōng-tè ah , kiû Lí àⁿ hī-khang thiaⁿ góa ê kî-kiû,
　　上 帝 啊，求 你 俯 耳 孔 听 我 的 祈 求，

1b　　　M̄-thang tiàm-ba̍t , m̄ thiaⁿ góa ê khún-kiû.
　　　　不 通 站 密， 不 听 我 的 恳 求。

2a　Kiû Lí àⁿ-lo̍h thiaⁿ góa, ìn góa;
　　求 你 俯 落 听 我，应 我；

2b　　　Góa pi-siong bô pêng-an , haiⁿ-haiⁿ-chhan ná thâng-thōa.
　　　　我 悲 伤 无 平 安，哼 哼 孱 若 虫 豸。

3a　Lóng sī in-ūi tùi-te̍k ê siaⁿ teh hoah, pháiⁿ-lâng ê chè-ap bô soah,
　　拢 是 因 为 对 敌 的 声 在 喝 ， 歹 人 的 制 压 无 息，

3b　　　In-ūi in chiong chōe-kòa chhia hō͘ góa, ēng siū-khì pek góa.
　　　　因为 伊 将 罪 过 推 给 我，用 受 气 迫 我。

4a　Góa ê sim tī góa lāi-bīn chin khó͘-thàng; 　　
我 的 心 在 我 内 面 真 苦 痛；

4b　　　Sí-bô ê kiaⁿ-hiâⁿ kàu tī góa ná pháiⁿ-bāng.
　　　　死 无 的 惊 惶 到 在 我 若 歹 梦。

5a　Kiaⁿ-hiâⁿ ngia̍uh-ngia̍uh-chhoah kàu tī góa,
　　惊 惶 蠕 蠕 惙　　到 在 我，

5b　　　Kiaⁿ-hiâⁿ im-ba̍t góa.
　　　　惊 惶 淹 密 我。

6a　Góa chiū kóng khí, goān góa tit-tio̍h si̍t nn̄g-ki,chhin-chhiūⁿ kap án-ni,
　　我 就 讲 起， 愿 我 得 着 翅 两 支, 亲 像 鸽 按 呢,

6b　　　Góa chiū pe--khì, tit-tio̍h an-jiân khiā-khí.
　　　　我 就 飞 起，得 着 安 然 居 起。

7a　Góa beh pe--khì hn̄g-hn̄g,
　　我 欲 飞 去 远 远，

7b　　　Hioh tī khòng-iá tiong-ng .
　　　　歇 在 旷 野 中 央。

8a　Góa beh kín-kín cháu kàu siám-pī ê só͘-chāi,
　　我 欲 紧 紧 走 到 闪 避 的 所 在，

8b　　　Thoat-lī kông-hong pò-thâu thang chū-chāi.
　　　　脱 离 狂 风 飑 头 通 自 在。

9a　Chú ah , kiû Lí thun-bia̍t in , pun-khui in ê chi̍h;
　　主 啊，求 你 吞 灭 伊，分 开 伊 的 舌；

9b　　　In-ūi góa tī siâⁿ-lāi bat khòaⁿ-kìⁿ kiông-pō kap saⁿ-chiⁿ.
　　　　因为 我 在 城 内 曾 看 见 强 暴 及 相 争。

10a　In mî-ji̍t kiâⁿ-se̍h tī siâⁿ-chhiûⁿ-téng;
　　　伊 暝 日 行 踅 在 城 墙 顶；

10b　　　Tī siâⁿ-lāi ū hu-ké ok-to̍k ap-kéng.
　　　　　在 城 内 有 虚 假 恶 毒 压 境。

11a　Siâ-ok tī hit lāi-bīn o͘- o͘ . 　　
　邪 恶 在 彼 内 面 乌 乌。

11b　　　Ap-chè kan-chà bô lī-khui i ê koe-lō͘ .
　　　　　压 制 奸 诈 无 离 开 它的 街 路。

12a　In-ūi húi-pòng góa--ê ,
　　　因为 毁 谤 我 的，

12b　　　M̄-sī tùi-te̍k ê siat-kè , siat-sú sī , chiū iáu ōe lún--chi̍t-ē .
　　　　　不 是 对 敌 的 设 计，设 使 是，就 犹 会 忍 一 下。

12c　Chū-ko kong-kek góa- -ê ,
　　　自 高 攻 击 我 的，

12d　　　M̄ -sī oàn-hūn góa ê lâng teh mē ,
　　　　　不 是 怨 恨 我 的 人 在 骂，
　　　　 siat-sú sī , chiū ōe bih lâi siám--kè .
　　　　　设 使 是， 就 会 匿 来 闪 过。

13a　Bô phah-sǹg sī lí , to sī kap góa pîⁿ-pòe--ê jī -í ,
　　　无 打 算 是 你，都 是 与 我 平 辈 的 而 已，

13b　　　Góa ê iú-phōaⁿ, góa ê pêng-iú ti- kí ,
　　　　　我 的 友 伴 ， 我 的 朋 友 知 己。

14a Lán pêng-sò͘ saⁿ-kap tâm-lūn chin chhin-bi̍t, bô má-hu,
　咱 平 素 相 及 谈 论 真 亲 密，无 马 虎，

14b　　　Lán kap chèng-lâng saⁿ-kap kiâⁿ tī Siōng-tè ê chhù.
　　　 　　咱 及 众 人 相 及 行 在 上 帝 的 厝。

15a　Goān sí- bô hut-jiân kàu tī in ,
　　　愿 死 无 忽 然 到 在 伊，

15b　　　Hō͘ in oa̍h-oa̍h lo̍h im-kan ê lāi-bīn.
　　　　　使 伊 活 活 落 阴 间 的 内 面。

15c　In -ūi siâ-ok tī in khiā-khí ê só͘-chāi,
　　　因 为 邪 恶 在 伊 居 起 的 所 在，

15d　　　Tī in tiong-kan ê tōe-tài.
　　　　　在 伊 中 间 的 地 带。

16a　Lūn-kàu góa, góa beh kiû-kiò Siōng-tè ;
　　　论 到 我， 我 要 求 叫 上 帝；

16b　　　Iâ-hô-hoa beh kiù góa thoat-lī chai-ē .
　　　　　耶 和 华 要 救 我 脱 离 灾 祸。

17a　Ê -hng, chá-khí, ji̍t--tàu, góa beh ai-siong thó͘-khùi;
　　　 暝 昏， 早 起，日 昼， 我 欲 哀 伤 叹 气；

17b　　　I ia̍h beh thiaⁿ góa ê siaⁿ lâi sù un-hūi.
　　　　　他亦 要 听 我 的 声 来 赐 恩 惠。

18a　I kiù-sio̍k góa ê sìⁿ-miā lâi tháu-pàng,
　　　他救 赎 我 的 性 命 来 释 放，

18b　　　Thoat-lī kong-kek góa ê lâng;
　　　　　脱 离 攻 击 我 的 人 ；

18c　Hō͘ góa tit-tio̍h pêng-an ;
　　　使 我 得 着 平 安；

18d　　　In -ūi hoán-tùi góa ê lâng kui-bān.
　　　　　因 为 反 对 我 的 人 归 万。

19a　Tùi kó͘-chá siông-siông tī-teh ê Siōng-tè ,
　　　对 古 早 常 常 在 的 之 上 帝，

19b　　　Beh thiaⁿ-kìⁿ, ia̍h beh pò-èng in ê khúi-kè ,
　　　　　要 听 见，亦 要 报 应 伊 的 诡 计，
　　　　chiū-sī hiah-ê bô kóe-pìⁿ, bô kèng-ùi Siōng-tè--ê .
　　　　　就 是 彼 个 无 改 变，无 敬 畏 上 帝 的。

20a　Góa chêng ê pêng-iú chhun-chhiú kong-kek kap i saⁿ-hô ê lâng;
　　　我 前 的 朋 友 伸 手 攻 击 与 他 相 和 的 人；

20b　　　I í -keng pōe iok hō͘ lâng sit-bāng.
　　　　　他已 经 背 约 使 人 失 望。

21a　I ê chhùi ku̍t-tia̍h, chhin-chhiūⁿ leng-iû ;
　　　他的 嘴 滑 泽， 亲 像 奶 油；

21b　　　I ê sim khǹg kau-chiàn chhin-chhiūⁿ iá-siù.
　　　　　他的 心 藏 交 战 亲 像 野 兽。

21c　I ê ōe jiû-loán, khah-iâⁿ ko-iû,
　　　他的 话 柔 软， 较 赢 膏 油，

21d　　　Kî-si̍t sī to chhut-siù .
　　　　　其 实 是 刀 出 鞘。

22a　Tio̍h chiong lí ê tàⁿ, sià hō͘ Iâ-hô-hoa;
　　　着 将 你 的 担，卸 给 耶 和 华；

22b　　　I beh hû-chhî lí , I éng-éng bô hō͘ gī-lâng iô-choah.
　　　　　他欲 扶 持 你, 他 永 永 无 使 义 人 摇 泏。

23a　Siōng-tè ah , Lí beh hō͘ in hām-lo̍h tī bia̍t-bô ê hām-khiⁿ;
　　　上 帝 啊，你 欲 使 伊 陷 落 在 灭 无 的 陷 坑；

23b　　　Thâi-sí lâng kiâⁿ kan-chà chiū sí ,
　　　　　杀 死 人 行 奸 诈 就 死，

23c　In bōe oa̍h kàu tiong-liân-kî ,
　　　伊 不 活 到 中 年 期，

23d　　　To̍k-to̍k góa beh óa-khò Lí .
　　　　　独 独 我 要 倚 靠 你。