《押韵启应诗篇》

 | | | 转寄

台语押韵启应诗篇 51

作者 Tīⁿ Jî-gio̍k 2006.12.31

51　　Tāi-pi̍t kap Poa̍t-sī-pa tâng-pâng í-āu, Sian-ti Ná-tan lâi kìⁿ i. 　　　　I chòe chit-ê si kau hō͘ Ga̍k-koaⁿ.

1a　Siōng-tè ah , chiàu Lí ê chû-ài lîn-bín góa,
　　上 帝 啊，照 你 的 慈 爱 怜 悯 我，

1b　　　Chiàu Lí hong-sēng ê chû-pi chhat-siau góa ê chōe-kòa.
　　　　照 你 丰 盛 的 慈 悲 擦 消 我 的 罪 过。

2a　Chiong góa ê chōe-ok it-chīn sóe-tû ,
　　将　　我 的 罪 恶 一 尽 洗 除，

2b　　　Ia̍h sóe-chheng góa kàu bô sū .
　　　　亦 洗 清 我 到 无 事。

3a　In-ūi góa ka-kī chai góa ê kè-sit,
　　因 为 我 自 己 知 我 的 过 失，

3b　　　Góa ê chōe siông-siông sī góa bīn-chêng ê hiān-si̍t .
　　　　我 的 罪 常 常 是 我 面 前 的 现 实。

4a　Góa só͘ hoān-tio̍h--ê , chiū-sī tek-chōe Lí nā-tiāⁿ,
　　我 所 犯 着 的，就 是 得 罪 你 若 定 ，

4b　　　Tī Lí ê ba̍k-chiu chêng chòe chit-hō pháiⁿ àn-kiāⁿ.
　　　　在 你 的 目 珠 前 做 此 号 歹 案 件。

5a　Tì-kàu Lí kóng-ōe ê sî , hián-bêng chòe gī .
　　致 到 你 讲 话 的 时，显 明 做 义。

5b　　　Phòaⁿ-toàn ê sî , hián-bêng kong-tō lí -khì.
　　　　判 断 的 时，显 明 公 道 理 气。

6a　Góa sī tī chōe-ok tiong siⁿ ê chōe-jîn,
　　我 是 在 罪 恶 中 生 的 罪 人，

6b　　　Tī chōe ê tiong-kan, góa ê lāu-bú lâi hoâi-īn .
　　　　在 罪 的 中 间， 我 的 老 母 来 怀 孕。

7a　Lí ài lâng sim-lāi sêng-si̍t lâi thó͘-khùi,
　　你 要 人 心 内 诚 实 来 叹 气 ，

7b　　　Tī góa ê pak-lāi , Lí beh hō͘ góa tit-tio̍h tì-hūi.
　　　　在 我 的 腹 内， 你 必 给 我 得 着 智 慧。

8a　Kiû Lí ēng giû-chhek-chháu sóe góa,
　　求 你 用 牛 膝 草 洗 我，

8b　　　Góa chiū chheng-khì bô chōe-kòa.
　　　　我 就 清 气 无 罪 过。

9a　Kiû Lí sóe góa ná sng-seh,
　　求 你 洗 我 若 霜 雪，

9b　　　Góa chiū pí seh khah pe̍h.
　　　　我 就 比 雪 较 白。

10a　Kiû Lí hō͘ góa tit-tio̍h thiaⁿ-kìⁿ hoaⁿ-hí khoài-lo̍k ê siaⁿ,
　　　求 你 给 我 得 着 听 见 欢 喜 快 乐 的 声，

10b　　　Hō͘ Lí só͘ at-chi̍h ê kut thang hoaⁿ-hí Lí ê miâ.
　　　　　使 你 所 揠 折 的骨 通 欢 喜 你 的 名。

11a　Kiû Lí ng Lí ê bīn, bô khòaⁿ góa ê chōe-ok,
　　　求 你 掩 你 的 面，无 看 我 的 罪 恶，

11b　　　Chhat-siau góa it-chhè ê chōe chòe kiat-sok.
　　　　　擦 消 我 一切 的 罪 做 结 束。

12a　Siōng-tè ah , kiû Lí kā góa chhòng-chō chheng-khì ê sim-sèng,
　　　上 帝 啊，求 你 给 我 创 造 清 气 的 心 性，

12b　　　Hō͘ góa ê lāi-bīn ū ōaⁿ-sin chèng-ti̍t ê sîn-lêng.
　　　　　使 我 的 内 面 有 换 新 正 直 的 神 灵。

13a　Góa chiū chiong Lí ê tō -lō͘ chí-sī ū kè-sit ê lâng,
　　　我 就 将 你 的 道 路 指 示 有 过 失 的 人，

13b　　　Ū chōe ê lâng chiū beh kui-sūn Lí tit ǹg-bāng.
　　　　　有罪 的 人 就 欲 归 顺 你 得 盼 望。

14a　Siōng-tè ah , kiù góa ê Siōng-tè sī Lí ,
　　　上 帝 啊，救 我 的 上 帝 是 你，

14b　　　Góa ê chi̍h beh tōa-siaⁿ gîm-si o -ló Lí ê gī .
　　　　　我 的 舌 欲 大 声 吟 诗 赞 美 你 的 义。

15a　Chú ah, kiû Lí khui góa ê chhùi-tûn chhut-siaⁿ,
　　　主 啊，求 你 开 我 的 嘴 唇 出 声，

15b　　　Góa ê chhùi chiū beh pò-iông Lí ê hó miâ-siaⁿ.
　　　　　我 的 嘴 就 要 报 扬 你 的 好 名 声。

16a　In-ūi Lí bô ài chè-mi̍h, nā ài , góa chiū beh hiàn,
　　　因为 你 无 爱 祭 物，若 爱，我 就 要 献，

16b　　　Sio-chè Lí ia̍h bô hoaⁿ-hí in ê ian.
　　　　　烧 祭 你 亦 无 欢 喜 伊 的 烟。

17a　Siōng-tè só͘ ài ê chè, chiū-sī iu-siong ê sim-sîn,
　　　上 帝 所 爱 的 祭，就 是 忧 伤 的 心 神，

17b　　　Siōng-tè ah , iu-siong thòng-hóe ê sim, Lí bô beh khòaⁿ-khin.
　　　　　上 帝 啊，忧 伤 痛 悔 的 心，你 无 要 看 轻。