《押韵启应诗篇》

 | | | 转寄

台语押韵启应诗篇 50

作者 Tīⁿ Jî-gio̍k 2006.12.24

50　　A-sat ê si.

1a　Choân-lêng ê Siōng-tè Iâ-hô-hoa ū kóng--ê ,
　　全 能 的 上 帝 耶 和 华 有 讲 的，

1b　　　Lâi tiàu phó͘-thiⁿ-ē ;
　　　　来 召 普 天 下；

　　　　Tùi ji̍t-chhut kàu ji̍t-lo̍h ê só͘-chāi choân-tē .
　　　　从 日 出 到 日 落 的 所 在 全 地。

2a　Tùi chiâu-chn̂g súi ê Sek-an ,
　　从 齐 全 美 的 锡 安，

2b　　　Siōng-tè ū hoat-chhut kng pò pêng-an .
　　　　上 帝 有 发 出 光 报 平 安。

3a　Goán ê Siōng-tè beh lâi,
　　阮 的 上 帝 要 来，

3b　　　Koat-toàn bô chēng-chēng lâi;
　　　　决 断 无 静 静 来；

3c　Ū hé tī I ê bīn-chêng teh sio,
　　有 火 在 他 的 面 前 在 烧，

3d　　　Ū hong tī I ê sì -ûi teh thàu teh iô .
　　　　有 风 在 他 的 四 围 在 透 在 摇。

4a　I beh tùi téng-bīn kiò tōe kap thiⁿ,
　　他要 从 顶 面 叫 地 与 天，

4b　　　Ūi -tio̍h beh sím-phòaⁿ I ê peh-sìⁿ;
　　　　为 着 要 审 判 他 的 百 姓；

5a　Kóng, tio̍h chio-chi̍p Góa sèng--ê peh-sìⁿ lâi Góa chia,
　　讲， 着 召 集 我 圣 的 百 姓 来 我 此，

5b　　　Chiū-sī hiah-ê ēng chè-sū kap Góa li̍p-iok ê lâng lâi chia.
　　　　就 是 那 些 用 祭 祀 与 我 立 约 的 人 来 此。

6a　Chiah-ê thiⁿ beh hián-bêng I ê kong-gī éng-sè ;
　　诸 些 天 要 显 明 他 的 公 义 永 世；

6b　　　In -ūi Siōng-tè pún-sin sī chòe sím-phòaⁿ--ê .
　　　　因 为 上 帝 本 身 是 作 审 判 者。

7a　Góa ê peh-sìⁿ ah, lín tio̍h thiaⁿ, Góa beh kóng kàu sì-kè ,
　　我 的 百 姓 啊，恁 着 听， 我 要 讲 到 四 界，

7b　　　Góa sī Siōng-tè , lí ê Siōng-tè .
　　　　我 是 上 帝，你 的 上 帝。

8a　Góa bô in -ūi lí ê chè-sū chek-pī lí bô khiân-sêng,
　　我 无 因 为 你 的 祭 祀 责 备 你 无 虔 诚，

8b　　　Lí ê sio-chè siông-siông tī Góa ê bīn-chêng.
　　　　你 的 烧 祭 常 常 在 我 的 面 前。

9a　Góa bô tùi lí ê chhù chhú kang ê gû ,
　　我 无 对 你 的 厝 取 公 的 牛，

9b　　　Lí ê tiâⁿ ê kang ê soaⁿ-iûⁿ, Góa ia̍h bô chhú.
　　　　你 的 庭 的 公 的 山 羊，我 亦 无 取。

10a　In-ūi chhiū-nâ-lāi ê pah-siù,
　　　因 为 树 林 内 的 百 兽，

10b　　　Chheng-soaⁿ ê cheng-siⁿ, lóng sī Góa teh kò͘-siú .
　　　　　千 山 的 畜 牲， 拢 是 我 在 顾 守。

11a　Soaⁿ-tiong ê pe-chiáu, Góa lóng chai;
　　　山 中 的 飞 鸟， 我 拢 知；

11b　　　Khòng-iá ê cháu-siù ia̍h lóng sio̍k tī Góa tiâu-lāi .
　　　　　旷 野 的 走 兽 亦 拢 属 在 我 厩 内。

12a　Góa nā iau, bô beh kā lí kóng siông-sè ,
　　　我 若 饿， 无 欲 与 你 讲 详 细，

12b　　　In-ūi sè-kài kap kî-tiong só͘ chhiong-móa--ê , lóng sī Góa--ê .
　　　　　因 为 世 界 与 其 中 所 充 满 的，拢 是 我 的。

13a　Góa kiám beh chia̍h gû-káng ê bah,
　　　我 岂 欲 吃 牛 牡 的 肉，

13b　　　Á -sī lim soaⁿ-iûⁿ-káng ê huih mah?
　　　　　或 是 喝 山 羊 牡 的 血 吗？

14a　Lí tio̍h ēng kám-siā chòe chè, hiàn hō͘ Siōng-tè ;
　　　你 着 用 感 谢 作 祭， 献 给 上 帝；

14b　　　Koh tio̍h tùi Chì-koân--ê , siā lí ê goān lâi kūi--teh.
　　　　　又 着 从 至 高 者，谢 你 的 愿 来 跪 在。


15a　Tī hoān-lān ê ji̍t tio̍h kiû-kiò Góa;
　　　在 患 难 的 日 着 求 叫 我；

15b　　　Góa beh kiù lí , lí ia̍h beh êng-kng Góa.
　　　　　我 要 救 你，你 亦 要 荣 光 我。

16a　Nā-sī Siōng-tè tùi pháiⁿ-lâng kóng--lah,
　　　若 是 上 帝 对 坏 人 讲 啦，

16b　　　Lí thái-thó káⁿ thoân Góa ê lu̍t-lē lâi khi-chà,
　　　　　你 岂 可 敢 传 我 的 律 例 来 欺 诈，

　　　　chhùi kóng-khí Góa ê iok ah ?
　　　　　嘴 讲 起 我 的 约 啊？

17a　Kî-si̍t lí iàm-chiān kà-sī iáu bô kàu,
　　　其 实 你 厌 贱 教 示 尚 不 够，

17b　　　Chiong Góa ê ōe hiat tī lí ê ka-chiah-āu.
　　　　　将 我 的 话 弃 在 你的 ka 脊 后。

18a　Lí khòaⁿ-kìⁿ chha̍t, chiū kap i tâng-sim tâm-lūn;
　　　你 看 见 贼， 就 与 他 同 心 谈 论；

18b　　　Koh kap kiâⁿ kan-îm ê lâng saⁿ-kap ū hūn.
　　　　　又 与 行 奸 淫 的 人 相 与 有 份。

19a　Lí hō͘ lí ê chhùi siông-siông kóng pháiⁿ-ōe ,
　　　你 使 你 的 嘴 常 常 讲 歹 话，

19b　　　Lí ê chi̍h chō-chok kan-chà ké-ōe .
　　　　　你 的 舌 造 作 奸 诈 假 话。

20a　Lí chē-teh húi-pòng lí ê hiaⁿ-tī ;
　　　你 坐 着 毁 谤 你 的 兄 弟；

20b　　　Bû-lōa lí ê tông-pau beh hāi -sí .
　　　　　诬 赖 你的 同 胞 要 害 死。

21a　Lí kiâⁿ chiah-ê sū , Góa chēng-chēng bô kóng;
　　　你 行 这 些 事， 我 静 静 无 讲 ；

21b　　　Lí phah-sǹg Góa tú-tú kap lí chi̍t-iūⁿ teh kau-thong.
　　　　　你 打 算 我 抵抵 与 你 一 样 在 交 通。

21c　Kî-si̍t Góa beh chek-pī lí bô thêng;
　　　其 实 我 要 责 备 你 无 停 ；

21d　　　Chiong chiah-ê sū pâi tī lí ê ba̍k-chiu-chêng.
　　　　　将 这 些 事 排 在 你 的 目 珠 前。

22a　Lín bōe-kì-tit Siōng-tè ê lâng, tio̍h siūⁿ chit- ê in-iû ,
　　　恁 不 记 得 上 帝 的 人， 着 想 这 个 因 由，

22b　　　Bián-tì Góa chiong lín thiah-chhùi, bô lâng chín-kiù.
　　　　　免 致 我 将 恁 撕 碎， 无 人 拯 救。

23a　Kìⁿ-nā ēng kám-siā hiàn chòe chè--ê ,
　　　凡 若 用 感 谢 献 作 祭 的，

23b　　　Chiū-sī êng-kng Góa--ê ;
　　　　　就 是 荣 光 我 的；

23c　Kín-sīn kiâⁿ ê lâng,
　　　谨 慎 行 的 人，

23d　　　Góa beh hō͘ i khòaⁿ-kìⁿ Siōng-tè ê kiù-un bô làng.
　　　　　我 要 使 他 看 见 上 帝 的 救 恩 无 阆。