《押韵启应诗篇》

 | | | 转寄

台语押韵启应诗篇 48

作者 Tīⁿ Jî-gio̍k 2006.12.10

48　　Khó-la̍h hō͘-è ê si-koa.

1a　Iâ-hô-hoa chì-tōa, eng-kai tōa tōa tit-tio̍h o-ló ê siaⁿ,
　　耶 和 华 至 大，应 该 大 大 得 到 赞美 的 声，

1b　　　Chiū-sī tī lán Siōng-tè ê siâⁿ, tī I sèng ê soaⁿ-niá.
　　　　就 是 在 咱 上 帝 的 城， 在 他 圣 的 山 岭。

2a　Sek-an-soaⁿ, tōa kun-ông ê siâⁿ-pôaⁿ,
　　锡 安 山， 大 君 王 的 城 磐，

　　tī pak-bīn, koân-tōa koh hó-khòaⁿ,
　　在 北 面，高 大 又 好 看，

2b　　　Hō͘ choân-tōe só͘ hoaⁿ-hí ê soaⁿ.
　　　　使 全 地 所 欢 喜 的 山。

3a　Siōng-tè tī I ê keng-tiān-lāi ,
　　上 帝 在 他 的 宫 殿 内，

3b　　　Ka-kī hián-bêng chòe koân-tâi.
　　　　自 己 显 明 作 高 台。

4a　Khòaⁿ--ah , lia̍t-ông chi̍p-chê,
　　看 啊，列 王 集 齐，

4b　　　In saⁿ-kap tùi chia keng-kè .
　　　　伊 相 与 从 此 经 过。

5a　In khòaⁿ--kìⁿ chiū gông-ngia̍h;
　　伊 看 见 就 惊 愕；

5b　　　Kiaⁿ-hiâⁿ kín-kín siám-phiah.
　　　　惊 惶 紧 紧 闪 避。

6a　In tī hia ngia̍uh-ngia̍uh-chhoah,
　　伊 在 彼 愕 愕 擦，

6b　　　Thàng-thiàⁿ chhin-chhiūⁿ siⁿ-kiáⁿ ê hū-jîn-lâng ai-hoah.
　　　　疼 痛 亲 像 生 子 的 妇 仁 人 哀 喊。

7a　Lí ēng tang-hong kap o͘-hûn,
　　你 用 东 风 及 黑 云，

7b　　　Phah-phòa Tha-si ê chûn.
　　　　打 破 他 施 的 船。

8a　Goán tī bān-kun ê Iâ-hô-hoa ê siâⁿ-tiong,
　　阮 在 万 军 的 耶 和 华 的 城 中，

8b　　　Chiū-sī goán ê Siōng-tè ê siâⁿ-tiong,
　　　　就 是 阮 的 上 帝 的 城 中，

8c　Só͘ khòaⁿ-kìⁿ--ê , tú -tú chiàu goán só͘ thiaⁿ-kìⁿ;
　　所 看 见 的，抵 抵 照 阮 所 听 见；

8d　　　Siōng-tè beh hō͘ chit-ê siâⁿ kian-kò͘ kàu éng-oán ê thiⁿ.
　　　　上 帝 要 使 这 个 城 坚 固 到 永 远 的 天。

9a　Siōng-tè ah , goán tī Lí ê tiān-lāi ,
　　上 帝 啊， 阮 在 你 的 殿 里，

9b　　　Siàu-liām Lí ê chû-ài .
　　　　数 念 你 的 慈 爱。

10a　Siōng-tè ah , Lí só͘ siū ê o-ló sī chek-ke̍k,
　　　上 帝 啊，你 所 受 的 赞美 是 积 极，

　　tú -tú kap Lí ê miâ saⁿ-ha̍p kàu tī tōe-ke̍k.
　　抵 抵 与 你 的 名 相 合 到 于 地 极。

10b　　　Lí ê chiàⁿ-chhiú móa-móa kong-gī koân-le̍k.
　　　　你 的 右 手 满 满 公 义 权 力。

11a　In-ūi Lí ê phòaⁿ-toàn kong-gī , Sek-an-soaⁿ tio̍h hoaⁿ-hí ,
　　　因为 你 的 判 断 公 义， 锡 安 山 着 欢 喜，

11b　　　Iû-tāi ê siâⁿ Sek-an tio̍h khoài-lo̍k bô -pí .
　　　　　犹 大 的 城 锡 安 着 快 乐 无 比。

12a　Lín tio̍h se̍h Sek-an , sì -ûi kiâⁿ i ,
　　　恁 着 绕 锡 安，四 围 行 它，

12b　　　Sǹg i ê siâⁿ-lâu kàu ta̍k-kak-sì .
　　　　　算 它 的 城 楼 到 逐 角 势。

13a　Siông-sè khòaⁿ i ê siâⁿ-chhiûⁿ chāi-chāi,
　　　详 细 看 它 的 城 墙 在 在，

　　séng-chhat i ê ông-kiong ê lâu-tâi ,
　　　省 察 它 的 王 宫 的 楼 台，

13bb　　　Beh hō͘ lín soan-thoân tī āu-tāi .
　　　　　要 使 恁 宣 传 在 后 代。

14a　In-ūi chit-ê Siōng-tè éng-éng oán-oán chòe lán ê Siōng-tè;
　　　因 为 此 个 上 帝 永 永 远 远 作 咱 的 上 帝；

14b　　　I beh chhōa lán kàu tī sí ê sî iā bô thè.
　　　　　他要 带 咱 到 于 死 的时 亦 无 退。