《押韵启应诗篇》

 | | | 转寄

台语押韵启应诗篇 44

作者 Tīⁿ Jî-gio̍k 2006.11.12

44　Khó-la̍h hō͘-è kà-sī ê si, kau hō͘ Ga̍k-koaⁿ.

1a　Siōng-tè ah , Lí tī kó͘-chá goán ê lia̍t-chó͘ ê sî ,
　　上 帝 啊， 你 在 古 早 阮 的 列 祖 的 时，

　　só͘ kiâⁿ ê sū góa chhin-hī thiaⁿ-kìⁿ,
　　所 行 的 事 我 亲 耳 听 见，

1b　　　Goán ê lia̍t-chó͘ ia̍h ū tùi goán kóng-khí.
　　　　阮 的 列 祖 亦 有 对 阮 说 起。

2a　Lí bat ēng Lí ê chhiú kóaⁿ lia̍t-kok,
　　你 曾 用 你 的 手 管 列 国，

　　lâi chai-pôe goán ê lia̍t-chó͘ chòe Lí ê bîn-cho̍k,
　　来 栽 培 我 的 列 祖 作 你 的 民 族，

2b　　　Lí khó͘-chhó͘ hiah-ê ī-cho̍k, lâi hō͘ lia̍t-chó͘ heng-khí pang-kok.
　　　　你 苦 楚 那 些 异 族，来 给 列 祖 兴 起 邦 国。

3a　In -ūi in m̄-sī tùi to-kiàm hō͘ thó͘-tōe kui-tī in ,
　　因 为 伊 不 是 对 刀 剑 使 土 地 归 在 伊，

3b　　　Ia̍h m̄ -sī in ê chhiú kiù in ,
　　　　亦 不 是 伊 的 手 救 伊，

3c　Chiū-sī Lí ê chiàⁿ-chhiú, Lí ê chhiú-kut, Lí ê bīn ê kng kiù in ,
　　就 是 你 的 右 手， 你 的 手 骨，你 的 面 的 光 救 伊，

3d　　　In -ūi Lí hoaⁿ-hí in .
　　　　因 为 你 欢 喜 伊。

4a　Siōng-tè ah , Lí sī góa ê Ông,
　　上 帝 啊，你 是 我 的 王，

4b　　　Kiû Lí chhut-lēng, chín-kiù Ngá-kok, goán ê chó͘-kong.
　　　　求 你 出 令， 拯 救 雅 各，阮 的 祖 公。

5a　Goán óa-khò Lí ê ui-le̍k,
　　阮 倚 靠 你 的 威 力，

5b　　　Beh chhia-tó goán ê tùi-te̍k.
　　　　要 推 倒 阮 的 对 敌。

5c　Goán óa-khò Lí ê miâ-bāng,
　　阮 倚 靠 你 的 名 望，

5d　　　Beh thún-ta̍h hiah-ê khí-lâi kong-kek goán ê lâng.
　　　　要 践 踏 那 些 起 来 攻 击 阮 的 人。

6a　In -ūi góa bô beh óa-khò góa ê keng,
　　因 为 我 无 要 倚 靠 我 的 弓，

6b　　　Góa ê to ia̍h bōe chòe kiù góa ê lō͘- ēng.
　　　　我 的 刀 亦 不 作 救 我 的 路 用。

7a　To̍k-to̍k Lí bat kiù goán thoat-lī tùi-te̍k,
　　独 独 你 曾 救 阮 脱 离 对 敌，

7b　　　Hō͘ oàn-hūn goán ê lâng kiàn-siàu siau-ke̍k.
　　　　让 怨 恨 阮 的 人 见 诮 消 极。

8a　Goán thong-ji̍t in-ūi Siōng-tè lâi khoa-kháu,
　　阮 通 日 因 为 上 帝 来 夸 口，

8b　　　Goán beh o -ló Lí ê miâ kàu éng-oán bô sî -hāu.
　　　　阮 要 赞 美 你 的 名 到 永 远 无 时 候。

9a　Chóng-sī hiān-kim Lí pàng-sak goán,
　　总 是 现 今 你 放 拺 阮，

　　hō͘ goán siū lêng-jio̍k chin m̄-goān,
　　让 阮 受 凌 辱 真 不 愿，

9b　　　Bô kap goán ê kun-peng saⁿ-kap chhut-khì biān-tùi chiàn-loān.
　　　　无 和 阮 的 军 兵 相 与 出 去 面 对 战 乱。

10a　Lí hō͘ goán tī tùi-te̍k ê bīn-chêng oa̍t-tńg-sin cháu,
　　　你 使 阮 在 对 敌 的 面 前 越 转 身 跑，

　　hiah-ê oàn-hūn goán ê lâng tui kàu,
　　　那 些 怨 恨 阮 的 人 追 到，

10b　　　Chhut-chāi in chhiúⁿ-thàu-thàu.
　　　　　出 在 伊 抢 透 透。

11a　Lí hō͘ goán chhin-chhiūⁿ iûⁿ chòe lâng ê chia̍h-mi̍h,
　　　你 使 阮 亲 像 羊 作 人 的 食 物，

11b　　　Hō͘ goán sì-sòaⁿ tī lia̍t-pang-tiong--ni̍h.
　　　　　让 阮 四 散 在 列 邦 中 里。

12a　Lí bōe Lí ê peh-sìⁿ, ia̍h bô thàn-chîⁿ,
　　　你 卖 你 的 百 姓， 亦 无 趁 钱，

12b　　　Só͘ tit-tio̍h ê kè-chîⁿ, Lí ê hó-gia̍h iā bô ke-thiⁿ.
　　　　　所 得 着 的 价 钱， 你 的 好 额 也 无 加 添。

13a　Lí hō͘ goán siū keh-piah kok ê lêng-jio̍k,
　　　你 使 阮 受 隔 壁 国 的 凌 辱，

13b　　　Siū sì- ûi ê lâng thí-chhiò ki-chhì bú-jio̍k.
　　　　　受 四 围 的 人 耻 笑 讥 刺 侮 辱。

14a　Lí hō͘ goán tī lia̍t-pang-tiong chòe ōe -pìⁿ;
　　　你 使 阮 在 列 邦 中 作 话 柄；

14b　　　Hō͘ chèng peh-sìⁿ tùi goán iô-thâu hàiⁿ-hī .
　　　　　让 众 百 姓 对 阮 摇 头 甩 耳。

15a　Góa ê lêng-jio̍k thong-ji̍t tī góa ê thâu-chêng,
　　　我 的 凌 辱 通 日 在 我 的 头 前 ，

15b　　　Góa ê bīn ê kiàn-siàu jia-khàm góa chēng-chēng.
　　　　　我 的 面 的 见 诮 遮 盖 我 静 静。

16a　Sī in-ūi hit -ê lóe-mē húi-pòng ê lâng ê siaⁿ,
　　　是 因 为 彼 个 詈 骂 毁 谤 的 人 的 声，

16b　　　Koh in-ūi tùi-te̍k kap pò-oan ê lâng lâi kiaⁿ-hiâⁿ.
　　　　　又 因 为 对 敌 和 报 冤 的 人 来 惊 惶。

17a　Chiah-ê lóng lîm-kàu goán, goán bô bōe-kì-tit Lí ,
　　　诸 些 拢 临 到 阮， 阮 无 不 记 得 你，

17b　　　Ia̍h bô ké-iáⁿ siú Lí ê iok phiàn Lí .
　　　　　亦 无 假 影 守 你 的 约 骗 你。

18a　Goán ê sim bô pōe Lí ê tō -lō͘ ,
　　　阮 的 心 无 背 你 的 道 路，

18b　　　Goán ê kha-pō͘ bô phian-lī Lí ê lō͘ .
　　　　　阮 的 脚 步 无 偏 离 你 的 路。

19a　Lí kèng-jiân tī soaⁿ-káu ê só͘-chāi teh siong goán,
　　　你 竟 然 在 山 狗 的 所 在 在 伤 阮，

19b　　　Ēng sí ê ìm-ńg jia-khàm goán.
　　　　　用 死 的 荫 影 遮 盖 阮 。

20a　Siat-sú goán bōe-kì-tit goán ê Siōng-tè ê miâ,
　　　设 使 阮 不 记 得 阮 的 上 帝 的 名，

20b　　　Á -sī ǹg pa̍t-ê sîn-bêng kia̍h-khí chhiú lâi kiû miā.
　　　　　或 是 向 别 的 神 明 夯 起 手 来 求 命。

21a　Siōng-tè kiám bô kàm-chhat chit-ê sū ?
　　　上 帝 岂 无 监 察 此 个 事？

21b　　　In-ūi I chai lâng sim-lāi ê ún-su .
　　　　　因为 他 知 人 心 内 的 隐 私。

22a　Goán in-ūi Lí ê iân-kò͘ , thong-ji̍t siū sat,
　　　阮 因 为 你 的 缘 故， 通 日 受 杀，

22b　　　Khòaⁿ chòe chhin-chhiūⁿ iûⁿ beh siū tô͘-sat .
　　　　　看 作 亲 像 羊 要 受 屠 杀。

23a　Chú ah , kiû Lí cheng-sîn, siáⁿ-sū teh khùn?
　　　主 啊，求 你 精 神， 啥 事 在 睡？

23b　　　Kiû Lí khí--lâi , m̄-thang éng-oán khì-sak goán ná thô͘-hún.
　　　　　求 你 起 来，不 通 永 远 弃 拺 阮 若 土 粉。

24a　Lí siáⁿ-sū ng Lí ê bīn bô kiù-chè ?
　　　你 啥 事 掩 你 的 面 无 救 济？

24b　　　Siáⁿ-sū bōe-kì-tit goán só͘ siū ê khó͘-lān kap ap-chè?
　　　　　啥 事 不 记 得 阮 所 受 的 苦 难 和 压 制？

25a　In-ūi goán ê sìⁿ-miā phak tī thô͘-hún,
　　　因 为 阮 的 性 命 趴 在 土 粉，

25b　　　Goán ê pak-tó͘ liâm tī tōe-bīn teh phah-phún.
　　　　　阮 的 腹 肚 黏 在 地 面 在 打 歕。

26a　Kiû Lí khí-lâi pang-chān goán,
　　　求 你 起 来 帮 助 阮，

26b　　　Tài-liām Lí ê chû-ài kiù-sio̍k goán.
　　　　　带 念 你 的 慈 爱 救 赎 阮。